سۊتەی دارسانەکا
نویستەی: #ئاکۆ مارانی#
ئی هامنە زېیاتەر چە ساڵا تەری دارسانەکۍ سۊتۍ، پۆرتوگال، یۆنان، تورکییە، ئێران و چڼ یاگېۋۍ تەرۍ.
هەرچڼە چە ئێران حکومەت چە کورڎەسانەنە بە ئەنقەست دارسانەکا سۊچنۊ، هەر پېسە سەردەمو بەعسییەکا، کە کەشەکۍ کورڎەسانی سۊچنیېنۍ.
چە توکییە و وڵاتەکا تەرو ئۆرۇپای سەرەڕاو ئەرو ئانەیە هەن، کە مەڵامەتەکە کەمتەرخەمیی گەشتیارا بۊ، بەڵام بەپاو ئا زانیارا کە کاناڵە هەۋاڵییەکا ئۆرۇپای ۋەڵاشا کەراۋە، ئۍ ساڵ پڵەو گەرمای دۋۍ (2) پلۍ بەرزتەر بېیەن، ئانەیچە بېیەن بە مەڵامەتو زېیاتەر بېیەی سۊتەی دارسانەکا کە چە یەک هەفتەنە چە تورکییۆ تاکو ئیسپانیا دارسانەکۍ سۊتۍ و چڼ هەفتۍ ۋەڵتەر چە سلۆڤێنیا و ئارۊ چە تورکیە و یۆنان و بولگاریا، لافاۋ گۆرەتەرین نەهامەتییېش سەرو دەگایا و ناوچە کشتیارییەکارە ئارڎەن و تەنانەت ئۆتۆمبێلېش ۋزتېنېنە دەریا.
ئانە بېژگە ساڵانە چېر-ئاۋ-کۆتەی ناوچە قەراخییەکا بەنگلادېشی و ئەندەنۇسیای و ...تد.
ۋەرپەرسو ئا گرڎە ۋېران بېیەیە، ئاژەڵە دۋە پێکېنۍ؛ دەسەڵاتدارۍ، سەرمایەدارۍ، بەکاربەرۍ نادەربەسۍ، کە پەی لەزەتۍ کاتیی وېشا هەر ڕۊ بە پڕۊکە/فڕۊکە گەشتۍ کەرا، گرڎ ڕۋېۋ مۆدێلو چېۋەکاشا فاشا، پلاستیک و مادۍ کیمیایی فڕەمڎا، وارڎە فڕەمڎا و پېسەو کەسە ئەحمەقەکەی بە مشار لقەدارو چېرو پەیا وېشا بڕاۋە؛ تاۋانبارو ئا کارەساتا خەڵکو ئا یاگە ئێر-گېرتا و لافاۋ-بەرڎا نېیەنۍ، بەڵکو گەشتیارۍ یاگەکا تەری هەنۍ؛ من، تۊ، ئاڎ و ئاڎە.[1]