کورد دلۍ چەرخەکا تارېخینە
هۊرئەوەگېڵنای و ئاماڎەکەرڎەی: ئەسعەد ڕەشید
بەشۍ: سەڎ و شاڼزەهەمە
* ساڵەو (1779ز.): ئەچی ساڵېنە زەکی خانو زەندی دلۍ ئەسفەهانینە کوشییان. هەر یەچی ساڵېنە مەحموڎ پاڎشا تاتەو ئۆڕەحمان پاڎشاو بابانی بییەن بە میرو بابانی، ئی میرە دلۍ جەنگو (یەل تیمار)ینە کوشییان، کە چەنی (بوداق خان میرو سابڵاخ)ی مېیانو سەقزی و سابڵاخینە قۊمیان. هەر ئەچی ساڵېنە ئاغا موحەمەڎ خان، دمای مەردەی کەریم خانی، بانگەوازو پاڎشاییش دلۍ ئێرانینە کەرڎەن.
* ساڵەو (1780ز.): ئەچی ساڵ و سەڎەنە چن کارەساتێ و قۊمیێ ڕوەشان دێنە:
* ئەبو فەتح خان، کوڕو کەریم خانو زەندی، بانگەوازو پاڎشاییش کەرڎەن دلۍ ئێرانینە.
* شاعېرو کورڎی (مەلا نوشا) زەنگەنە ئامان دنیاوە.
* غەمناکی شاعېر کۊچی دمایینش کەرڎەن.
* کۊچی دمایینو شاعېر (خانەی داجیوەنی لەک)ی.
* کۊچی دمایینو کەریم خانو زەندی.
* ساڵەو (1781ز.): ئەچی ساڵېنە شاعېر مەلا موحەمەڎو بانەی ئامان دنیاوە. هەر ئەچی ساڵېنە عەبدول موئمینو دوەمو مەردۊخی کۊڵە (کەشکۆڵە) هۊربەسێش نویستەن کە (381) پارچە هۊنیێ ناوچەکانو ئەردەڵان و کرماشان و هۆرامانیش چەنەنۍ. هەر ئەچی ساڵېنە ساڎق خانو زەندی و کوڕەکېش کوشیێنۍ.[1]