(دەستووری هەرێم) ڤاکسینی (پەتای پەرتەوازەیی) کوردستانە!
#کارۆخ خۆشناو#
مێژووی کەشتی وڵاتان پڕیەتی لە هەڵبەز و دابەز و هەوراز و نشێو، بەڵام هەرکاتێک کەشتییەکەیان لە کەنارێکی ئارامدا ئۆقرەی گرتبێت، ئەوا (بیرمەند و سەرکردە و داڕێژەرانی بڕیار) هەڵوەستەیان کردووە و هەڵساون بە داڕشتنی نەخشەڕێگایەکی تۆکمە بۆ ئەوەی کەشتییەکەیان لە داهاتوودا بەرگەی هەڵبەز و دابەزی شەپۆلەکان بگرێت، ئەم نەخشەڕێگایەش بریتی بووە لە نووسینەوەی دەستوور کە گرێبەستێکی کۆمەڵایەتییە و بە دایکی یاساکان پێناسە دەکرێت و وەک داینەمۆی پێشکەوتنی وڵاتان لە قەڵەم دەدرێت.
هەرێمی کوردستان دوای پڕۆسەی ئازادی ئێراق لە ساڵی (2003) قەوارەیەکی دەستووری و یاسایی لە (ئێراقی نوێ)دا بۆ فەراهەم بووە، ئەم قەوارەیەش لە ماددەکانی (117و 120و 121)ی دەستووری ئێراقدا دانی پێدانراوە، بۆیە پاراستنی ئەم قەوارەیە (هێڵی سوورە) و نابێت بەهیچ جۆرێک و لەژێر هیچ پاساوێکدا، سازشی لەسەر بکرێت.
بەداخەوە دوای تێپەڕبوونی (15) ساڵ، تاکوو ئێستا (داڕێژەرانی بڕیاری هەرێم) نەیانتوانیوە کەڵک لەو مافە دەستووریە وەربگرن کە لە ماددەی (120)ی دەستووری ئێراقدا ئاماژەی پێکراوە و بەڕوونی ماف بە هەرێمی کوردستان دراوە کە خاوەن دەستوورێکی تایبەت بە خۆی بێت، کەچی هێشتا هەرێمی کوردستان نەبووەتە خاوەن دەستووری خۆی!
لێرەدا پرسیار ئەوەیە:
کێ بەرپرسیارە لەم کەمتەرخەمیە؟
بۆچی تاکوو ئێستا (ڕەشنووسی) دەستووری هەرێم، لە پەڕڵەمانی کوردستان نەکراوەتە سپینووس؟
بۆچی لیژنەی نووسینەوەی دەستوور کارا نەکراوەتەوە، یاخود بۆچی لیژنەیەکی نوێ بۆ نووسینەوەی دەستوور درووست ناکرێت؟
ئەگەرچی پێویست بوو دوای پڕۆسەی ئازادی و نووسینەوەی دەستووری ئێراق، یەکەم هەنگاوی سەرکردایەتی سیاسی کوردستان نووسینەوەی دەستوورێکی هاوچەرخ بێت بۆ هەرێم، لە جیاتی واژووکردنی (ڕێککەوتننامەی ستراتیژی لە تەمموزی 2007 و دواتریش ڕێککەوتننامەی دەباشان لە ئایاری 2016) چونکە پێم وایە کێشەی سەرەکی هەرێمی کوردستان نەبوونی (دەستوورێکی هاوچەرخ) و ڕێزلێگراوە، کە ماف بە هەموو پێکهاتەکان بدات بۆ ئەوەی لەژێر سایەیدا هەموو دام و دەزگا مەدەنی و سەربازییەکان یەکبخرێن و سنوور بۆ هەرسێ دەسەڵاتی (یاسادانان و جێبەجێکردن و دادوەری) دیاریبکرێن، تاکوو بتوانرێت ئەرکی خۆیان بە شێوەیەکی شەفاف ئەنجام بدەن، لە پێناو گەیاندنی کەشتی هەرێمی کوردستان بە کەناری ئارامی هاوشێوەی (هەرێم و وڵاتە) پێشکەوتووەکانی جیهان، لە پێناو ڕێگریکردن لە گەندەڵی و بەدیهێنانی دادی کۆمەڵایەتی، بە جۆرێک کە دەرفەتی کاری یەکسان بۆ سەرجەم دانیشتووان بڕەخسێنرێت و ئەرک و ماف بەشێوەیەکی دادپەروەرانە دابەش بکرێت، بە بێ ڕەچاوکردنی جۆری ڕەگەز و ڕەنگ و ئایین و ئایدیۆلۆژیا.
بەڵام ئێستاش نەچووە بچێت، مادام زانستی پزیشکی توانیبێتی لە ڕێگای کۆمپانیای (فایزەر)ەوە ڤاکسینێک بۆ پەتای (کۆرۆنا) بدۆزێتەوە، دەکرێت سەرکردایەتی سیاسی کوردستانیش هەوڵ بدات (دەستوور) بکاتە ڤاکسینی پەتای (پەرتەوازەیی کورد) بۆ ئەوەی زاڵ بێت بەسەر ئاستەنگەکانی ئەم قۆناغە هەستیارە، چونکە ڕاستییەکی حاشاهەڵنەگرە کە (پەتای پەرتەوازەیی) کوردستان ترسناکترە لە (پەتای کۆرۆنا).
ئێمەی کوردیش پێویستە کەڵک لە ئەزموونی وڵاتان وەربگرین و ئەوەمان لەبەرچاو بێت کە زۆربەی وڵاتانی پێشکەوتوو بەهۆی نووسینەوەی (دەستوور)ەوە توانیویانە بەسەر کۆسپەکاندا زاڵ بن و کۆدەنگی درووست بکەن و سەقامگیری بەرپا بکەن، بۆ نموونە سەرەکیترین فاکتەری گەشەسەندن و زلهێزبوون و سەرکەوتنی ئەمەریکا، هەبوونی دەستوورێکی کورت و پوخت و پڕ مانایە، کە تەنیا لە (7) ماددە پێکهاتووە و لەسەر ئاستی جیهان بە کۆنترین دۆکیۆمێنتی نووسراوی کارپێکراو هەژمار دەکرێت، کە تەمەنی (231) ساڵە و تاکوو ئێستاش کاری پێ دەکرێت.
ئەگەر باوکانی دامەزرێنەری ئەمەریکا (231) ساڵ لەمەوبەر توانیبێتیان هەنگاوێکی لەم شێوەیە بهاوێژن و دەستوورێک بنوو#سنە#وە، بۆچی ئێمەی کورد نەتوانین کەڵک لە ئەزموونی ئەوان وەربگرین و هەنگاوێکی لەم شێوەیە بهاوێژین؟
ڕاستییەکی تاڵە کە دەڵێین کەشتی هەرێمی کوردستان بەهۆی پەرتەوازەیی و هەندێک کەموکووڕی دیکەوە کونی تێبووە، بەڵام خۆشبەختانە هێشتا نقووم نەبووە، بۆیە دەکرێت نووسینەوەی (دەستوورێکی هاوچەرخ) ببێتە فریادڕەس بۆ ڕزگارکردنی ئەم کەشتییە بە مەرجێک دەستوورێکی ڕێزلێگیراو بێت و بخرێتە بواری جێبەجێکردنەوە، نەک تەنیا وەک مەرەکەبی سەر کاغەز بمێنێتەوە!
لە کۆتاییدا گرنگە بزانین کەوا هەموومان دانیشتووی ئەم کەشتییەی هەرێمی کوردستانین و ئەرکی سەر شانی هەموولایەکمانە، بە گیانێکی نەتەوەیی و نیشتمانی چارەسەرێک بۆ کون و کەلەبەرەکانی ئەم کەشتییە بدۆزینەوە، بۆیە پێم وایە تاکە چارەسەر تەنیا نووسینەوەی (دەستوورێکی هاوچەرخ)ە بۆ ڕزگارکردنی ئەم کەشتییە، چونکە بە نقوومبوونی ئەم کەشتییە نەک تەنیا باشووری کوردستان زەرەر دەکات، بەڵکوو تاکە ئومێدی هەر سێ پارچەکەی تری کوردستانی گەورەش لەبار دەچێت! [1]