إلى المستعجلين من السوريين
شكري شيخانيشكري شيخاني
الحوار المتمدن-العدد:
8206
المحور: مواضيع وابحاث سياسية
وقت كان يقولولك بيلزم
8آلاف دولار بدل خدمة جيش لأبنك كنت تقول والله المبلغ كبير بس لو ببيع حالي لازم دبرو، وماشية ....
وقت كان ابنك يرسب حالو بالجامعة حتى مايروح عسكري وانت مضطر تقبل برسوبه كنت تقول ماشية ...
وقت كانوا يقولولك لازم تدفع رشوى عشرين مليون لتعرف اذا ابوك او اخوك بالسجن عايش او ميت كنت تدفع وتقول مضطر وماشية ....
وقت كنت توقف على حاجز ساعة او اكثر أحياناً للتفييش كنت تقول دولة ومافيك تعترض وماشية ....
وقت كنت تشتاق لابنك او اخوك اللي برا البلد ولا بتقدر تشوفو ولا بيقدر يشوفك كنت تقول قهرتنا هالأزمة، الله يفرج وماشية ....
وقت كانوا يغلوا سعر البنزين ويأخروا وقت الرسالة كنت تروح ع السومرية تعبي بضعف المبلغ وتقول شوبدنا نعمل ...بدنا ندبر امورنا ،وماشية ....
وقت كنت تنقطع من الغاز وتسأل مين عندو جرة وبأي سعر مو مشكلة المهم ندبر طبختنا ونتحمم بتسخين ليتر مي، كانت الأمور ماشية ...
وقت كانوا يعطوك زيادة 40بالمية ويغلوا الاسعار الف بالمية كنت تخيط تمك وتقول ماشي الحال وماشية ...
وقت كنت تتعربش عربشة بالباصات لأنو ما في مواصلات وكان الباص يزمر وأنت تهز براسك وتقول ماشية
وقت قالولك انو البلد في حرب وممكن ما يتحسن الوضع بالوقت القريب كنت تقول بصبر إن الله مع الصابرين وماشية ...
وقت كانوا يقولولك الأسد رمز البلد ح يذلك للأبد كنت تقول بلسانك الله يخليلنا ياه ومن جواتك عم تفور وتغلي و وماشية ...
واليوم وبعد الفرج
اليوم الشباب اللي حطت دمها ع كفها وحررتك من الأسد وعصابتو وقالتلك لا تخاف لا ع ابوك ولا على اخوك ولا على ابنك ..انت حر .
وضحكتك وصلت للسما
ورقصتك صارت على الفايتة والطالعة مع كل حدا بيهتف وقالولك احكي شو مابدك :
ماخطرلك تقول لهالشباب الابطال شكراً
ما خطرلك تقول لهالشباب الله يبارك فيكم ويحميكم ..
بس خطرلك تنق وتنتقد ..
مرة تخاف من اللحية وبعمرك ماخفت ولا انتقدت لحية نصرالله و
تنتقد ارتفاع سعر ربطة خبز و سعر جرة غاز وتأخر في تحسين وضع الكهربا متل ما وعدوك والجماعة قالولك الحالة مؤقتة تحمولنا بينما تنطلق البلد وتصير بلد .
والله يا شباب اذا اعداء الثورة قدروا يفشلوها و دخلنا بأي فتنة او أي خلاف من اي نوع ورب العالمين سلبنا نعمة النصر ونعمة الهدوء النسبي الحاصل لتبكوا ع هالأيام وتقولوا يا ريت عملنا شي وساعدنا .
شو رأيكم نحمي الثورة ونحمي البلد و نرتقي سوا ونعمر البلد سوا والفرج عند الله.
[1]