$رۆژهەڵاتی کوردستان$
- ڕێکخراوی هەنگاو بۆ مافەکانی مرۆڤ ڕایگەیاند، بەرەبەیانی ئەمڕۆ هەینی، هێزە ئەمنیەکانی ئێران لە بەرزاییەکانی سنوری (عەمووخانزاد)ی چالدێران تەقەیان لە #کۆڵبەر#ان کردوە و لە ئاکامدا کۆڵبەرێک گیانی لە دەستداوە. ئاماژەی بەوەشکردوە، ئەو کۆڵبەرەی کوژراوە ناوی (ڕەزا پور ئیسماعیل)ەو خەڵکی گوندی خزرلو بوە.[4]
$باشووری کوردستان$
- یەکەم ڕۆژی جەژنی قوربان بەبێ نوێژ و بەبێ حەجکردنی حاجییانی باشووری کوردستان بەڕێوەچوو.
- کاتژمێر 19:50 فڕۆکە جەنگیەکانی سوپای داگیرکەری تورک سێ جار لە شاروچکەی #مانگێشک#ی #دهۆک#ی بۆردومان کرد.[1][2]
- کولۆنێل مایلز کەینگز، گوتەبێژی هاوپەیمانی نێودەوڵەتی دژی #داعش# لە کۆنفرانسێکی ڕۆژنامەوانیدا لە شاری #سلێمانی# ڕایگەیاند: بوونی هێزەکانی هاوپەیمانان لە عێراق و مانەوەیان، لەسەر داواکاری حکومەتی عێراقە، ئامانجی سەرەکی ئێمە لەناوبردنی چەکدار و شانە نوستووەکانی داعشە. گوتەبێژی هاوپەیمان گوتی: خەڵک زۆر هەیە لە کوردستان ژمارەیەک ئازیزیان لە شەڕی دژی داعش لەدەستداوە، یەکێک لەو ئافرەتە دڵسۆزانە دایکە عائیشەیە، کە سێ کوڕی لە شەڕی دژی داعش لەدەستدا و لە یەک کاتدا شەهیدبوون، زۆر ئافرەتی دیکەی وەک دایکە عائیشە لە کوردستان هەن کە ڕۆڵەکانیان لە شەڕی دژی داعش لەدەستداوە.[3]
- وەزارەتی تەندروستیی هەرێمی کوردستان ئاماری نوێی تووشبوون و گیانلەدەستدانی تووشبووانی #کۆرۆنا#ی بڵاوکردەوە و دەڵێت، 243 تووشبووی نوێ تۆمارکراون و 13 تووشبووی دیکەش گیانیان لەدەستداوە.[2]
$دەرەوەی کوردستان$
- لە چوارچێوەی داکەوتنی قەواڵەی تورکی، بەهای لیرە بەرامبەر بە دۆلار داڕمانی نوێ تۆماردەکات. لە دوایین مامەڵەکاندا، قەواڵەی تورکی گورزێکی نوێی بەرکەوت و بەوهۆیەوە چوار ڕۆژی لەسەر یەکە لیرەی تورکی داکەوتن تۆمار دەکات، بەجۆرێک بەهای لیرەی تورکی بەرێژەی 0.5% دابەزی و هەر دۆلارێک یەکسان بوو بە 7 لیرە و 60 قوروش، ئەوەش نزمترین بەهایە لەوەتەی نیوەی دووەمی مانگی ئایارەوە تا ئێستا.[3]
- مستەفا کازمی، سەرۆک وەزیرانی عێراق وادەی ئەنجامدانی هەڵبژاردنی پێشوەختەی ڕاگەیاند. بەگوێرەی میدیا عێراقییەکان، کازمی دووپاتی کردەوە، لە 6ی حوزەیرانی ساڵی داهاتوو هەڵبژاردنی پێشوەختە لە عێراق ئەنجام دەدرێت.[3]