با هەموومان لە ڕێکەوتنی نەتەوەیی و نیشتیمانی بەرخۆدانی مەخمور، خاوەندارێتی بکەین.
لە سەر لە بەیانی ئەمڕۆوە بە دواوە، لە پێناو پاراستنی مەخمور، گەریلاکانی (ه پ گ) هێزی پاراستنی گەل، (ی ژ ئا – ستار) یەکینەکانی ژنانی ئازاد – ستار و پێشمەرگەکانی (ی ن ک) و (پ د ک)، تێکۆشان و بەرخودانی هاوبەش لە یەک سەنگەر دا دەست پێدەکەن.
ئێمە بۆ ئەو هەماهەنگی و یەک سەنگەریەی پارێزەرانی خاک و وڵاتی کوردستانیان سڵاو ئەکەین. لە هەمان کاتدا ئێمە یەک سەنگەری گەریلاکانی ه پ گ، ی ژ ئا – ستار و پێشمەرگە نەبەزەکانی ی ن ک و پ د ک بە مایەی ئازادی گەلی کورد دەبینین، تێکۆشان و بەرخۆدانی هاوبەشی ئەوان بە هەنگاوێکی پیرۆز دەنرخێنین.
لەو باوەڕە داین کە ئەو هەماهەنگی و ڕێکەوتنەی لە نێوان هێزە چەکداریەکانی کوردستان لە بەرەکانی مقاومەت و پارێزگاری گەل و نیشتیمان پێکهاتووە، لە کاتێکی نزیکدا لە سەرانسەری کوردستان ئەو یەکێتی و یەکڕیزی یە باڵئەکێشێتە سەر تەواوی ئاستە سیاسی و کۆمەڵایەتیەکانی کوردستان. بۆ ئەم مەبەست و پێوەرە ئومێد بەخشە، ئێمە بانگی گەلی کوردستان بە گشتی دەکەین کە بە دڵسۆزی و گیانفیدایی وبە هەست بەبەرپرسیاریەتیکردنەوە، تێکۆشان و یەکسەنگەری هێزەکانی گەریلا و پێشمەرگە خاوەندارێتی بکەن.
سەرکەوتنی گەلەکامان لە ڕۆژئاوای کوردستان لە بەرامبەر چەتە تیرۆرستەکان، شایەتی ئەوە دەدەن کە هیچ هێز و ڕێکخستنێک ناتوانێ زەفەر بەهێزی لەبننەهاتو و قارەمانێتی مێژووی کوردستانیان ببات. خۆڕاگری و جەنگاوەری هاوبەشی گەلانی کوردستان، هەمیشە هێزی دوژمنانیان تێکشکاندووە. چەتە تیرۆرستەکانیش وەکو شمشێری دەموکلێس و داقوقی هیماندی لە دژی گەلان بەکاردەهێنرێن، بۆ ئەوەی حیسابیان بۆ بکرێ، لە ڕێگای میدیا کانیانەوە گەورە دەکرێن و بە هێزێکی لەبننەهاتوو پیشانی دونیایان دەدەن.
ئەو چەتە تیرۆرستانە، لە ڕۆژئاوا تێکشکێنران، ئێستاش ئەیانەوەی ڕق و کینی ئەو دۆڕاندنەیان لە باشور تۆڵە بکەنەوە. لە شنگال دەستیان بە هێرشی دڕندانەی خۆیانیان کرد و ئەیانەوەی بەرەو شارەکانی تری کوردستان هەڵکشێن.
لە شنگال، بەرخۆدانی یەکینەکانی پاراستنی گەل (ی پ گ) و یەکینەکانی پاراستنی ژنان (ی پ ژ) لە هەرچوارپارچەی کوردستان بە جۆش و خرۆش و دڵخۆشیەوە دەنگی دایەوە. ئەمڕۆ لە مەخموریش، ڕێکەوتنی تێکۆشان و ویەکسەنگەری، لەسەر بنەمای هەمان ئەو باوەڕی و جۆش و خرۆشە مەزنە بێکهاتووە. بۆیە ئەم سەرکەوتنە مەزن و مێژووییانە بەرفراوانتر دەبن.
لەو قۆناغە گرنگ و مێژووییە دا، بانگی هێزە سیاسی و ڕێکخراوە مەدەنیەکان بە گشتی دەکەین کە لە بەرامبەر ئەم هەنگاوە پیرۆزەی پاراستنی نەتەوەیی و نیشتیمانیە، ئەرک و بەرپسیارێتی خۆیان جێبەجێ بکەن.
گومانی تێدا نی یە کە یەکیەتی، یەکڕیزی و هاوسەنگەری ئازادی و سەرفەرازی مسۆگەر دەکات.
ئێمە بانگی هێزە هەرێمی و نێودەوڵەتیەکان دەکەین، ئەو یەکیەتیە نەتەوەیی و نیشتیمانییەی کە لە کوردستان سەریهەڵداوە وەکو تەهدیدێک چاولێنەکەن، بەڵکو وەکو مسۆگەرکردنی ئاشتەوایی لە ڕۆژهەڵاتی ناوەڕاست مامەڵەی لەگەڵدا بکرێ. ئەم هەنگاوە مێژووییە وەک دەرفەت وهێزی هاتنەکایەوەی ئاشتی وئارامی لە هەرێمەکە دا بنرخێندرێت، هەروەها لە بەرامبەری ئەوەش بەرپرسیاری و ئەرکداری بەجێبگەیەنرێن.
داعش، دەستەیەک چەتەن کە لە کوردستان و ڕۆژهەڵاتی ناوەڕاست دا کردارو تاوانی دژە مرۆیی ئەنجام دەدەن. لە بەرامبەر ئەم ماشێنی تاوان و دڕندانەیە، پێویستە هێزەکانی هەرێمی و ئێودەوڵەتی هەڵوێستی دژە تیرۆری خۆیان جێبەجێبکەن. ئەو دەوڵەتانەی کە ئەو چەتە دڕندانەی داعش ئاکتیڤ دەکەن و یارمەتیان دەدەن، بە بەرپەرچدانەوەی سیاسی – ئابوری و دیپلۆماتیک و یاسایی زسا بدرێن.
لە بەر ئەوەی کە چەتەکانی داعش، بە یارمەتی دان و ئاکتیڤکردن لە لایەن چەند وڵاتێکەوە دروستکراون و بە هاوکاری ئەوان تاوانی گەورەیان دژبە بەشەریەت ئەنجامداوە، لەو چوارچێوەدا ئێمە چاوەڕوانی لە سەروویانەوە : لە نەتەوە یەکگرتوەکان، هەمو هێزە نێونەتەوەییەکان، خەمخۆرانی مرۆڤایەتی کە هاوکاری مرۆیی و پێداویستیەکانی پاراستن هەرچی زووە بگەیەنرێنە ناوچەکە و زەرەرپێکەوتوانی ئەو تاوانە دژ بە مرۆڤایەتیە لە کوردستان.
بۆ ئەم مەبەستە، ئێمە لە کۆنگرەی نەتەوەیی کوردستان کنک، ئەو ڕێکەوتنەی نێوان هێزە کوردستانیەکان و ئەو هێزانەی کە تێکۆشان و بەرخۆدان دەکەن بۆ پاراستنی گەل و وڵات، جارێکی تر سڵاو دەکەین و بە پیرۆزیەکی مەزنەوە دەینرخێنین و بە ئومێدی سەرکەوتن.
کۆنسەی بەڕێوەبەری کۆنگرەی نەتەوەیی کوردستان
08-08-2014 برۆکسل

هەر وەک هەمولاێک دەزانن هەر دوو دەوڵەتی داگیرکەرو سەرەڕۆی تورکیە و ڕژیمی دیکتاتۆری ئاخوندی ئێران ماوەی چەندین ساڵە بە بێ گوێدانە یاسا نێونەتەوەییەکان و ڕێزگرتن لە سەروەری وڵاتانی دراوسێ، بە مووشەک و توپباران و بۆمبارانی هەوایی کەمپ و شوێنی نیشتەجێی ئاوارە و پەنابەرانی کورد، لە ناو خاکی هەرێمی کوردستانیان کردۆتە ئامانجی هێرشە هەوایی و مووشەکی و توپخانەکانیان و سەرەڕای پێشێلکردنی یاسای نێو نەتەوەیی، زیانێکی گیانی و ماڵی زۆریان بە دانیشتوانی بێ دیفاعی سەرسنوورەکان گەیاندوە ژن و منداڵ و کاسبکاری کوردیان شەهید کردون.
لە هێرشی فڕۆکە بۆمب هاوێژەکانی دەۆڵەتی تورکیە بۆ سەر کەمپی مەخمور لە ڕۆژی 27ی خاکەلێوە بێجگە لە خەسارەتی ماڵی، سێ ئافرەتی پەنابەری بێ تاوان شەهید بوون و چەند کەسیش بریندار بوون.
سازمانی خەباتی کوردستانی ئێران وێڕای هاو هەخەمی بۆ بنەماڵەی ئەو شەهیدانه و هومێد بە چاک بوونەوە بۆ بریندارەکان، بۆمبارانی کەمپی کوردانی ئاوارە لە مەخمور بەتوندی شەرمەزار و ڕیسوا دەکا و داوا لە ناوەندە نێونەتەوەیی و ڕێکخراوە مرۆڤ دۆستەکان دەکات کە لە بەرانبەر دەست درێژی ئەم حکومەتە سەرەڕۆ و بێ درەربەستەکان بە ئاسایش و ئۆقرەیی ناچەکەو جیهان، هەڵوێست بگرن و لەوە زیاتر ئیجازە نەدەن مرۆڤە لێقەوماو و بێ دەرەتان و پەنابەرەکان بکەونە بەر هێرش و پەلاماری بێ بەزەیانەیان.
سازمانی خەباتی کوردستانی ئێران، 16ی ئاپریلی

بۆ ڕای گشتی
ئێمە وەکو حزب و لایەنە سیاسیەکانی قەزای مەخمور و نوێنەرایەتی کەمپی ئاوارەکانی کوردانی باکور.
بە توندی ئیدانەی لەشکرکێشی سوپای تورکیا دەکەین بۆ سەر شار و شارۆچکەکانی باکوری کوردستان، کە لە ئەنجامی سەرکەوتنی ئیرادەی گەلی کورد لە باکور و تێپەڕاندنی بەربەستی لە 10%ی هەڵبژاردنەکانی بۆ چوونە ناو پەرلەمانی تورکیا.
لەبەرامبەردا ڕژێمی شۆڤینی تورکیا ئۆپەراسیۆنێکی سەربازی و ئەمنی توند و مەترسیداری دەستپێکردووە کە ڕۆژانە لەبەر چاوی دونیاوە دەیان منداڵ و گەنج و پیر دەکاتە قوربانی ڕەگەزپەرستی خۆی.
لەهەمانکاتدا وەک حزب و لایەنە سیاسیەکانی مەخمور پشتگیری و هاوهەڵوێستی خۆمان بۆ خوشک و براکانمان لە باکور دووپاتدەکەینەوە و داواش لە نەتەوە یەکگرتووەکان و کۆمەڵگەی نێودەوڵەتی و وڵاتانی زلهێز دەکەین فشار بخەنە سەر ڕژێمی تورکیا بۆ ئەوەی :
1- بە زوترین کات دەست لە شەهیدکردنی خەڵکی سڤیل هەڵبگرن.
2- هێزەکانی لە ناو شارەکانی بباتە دەرەوە و قەدەغەکردنی هاتووچۆ هەڵبگیرێت.
3- دان نان بە داواکاری هاوڵاتیانی کورد کە خۆی لە خۆ بەڕێوەبەرایەتی دەبینێتەوە.
4- چارەسەر کردنی دۆزی کورد لە باکوری کوردستان بە شێوەیەکی دیموکراسیانە کە دووربێت لە توندوتیژی.
5- هەڕەشە و شەڕفرۆشیەکانی سوپای تورکیا بۆ سەر کوردانی باشور و باکور و ڕۆژئاوا شەرمەزار دەکەین و داوا دەکەین دەست هەڵگرن لە هاوکاری ویارمەتیدانی گروپە تیرۆرستییەکان و دژایەتی کردنی بەرژەوەندی گەلی کورد لە ناوچەکەدا.
6 داوا لە هەرسێ سەرۆکایەتیەکەی هەرێمی کوردستان دەکەین لە ئاست ڕووداوەکانی باکوری کوردستان هەڵوێست بنوێنن.
.........نەمری و سەربەرزی بۆ شەهیدانی ڕێگای ڕزگاری کورد و کوردستان........
حزب و لایەنە سیاسیەکان
________________
1- یەکێتی نەتەوەیی دیموکراتی کوردستان
2- یەکگرتووی ئیسلامی
3- حزبی شیوعی کوردستان
4- کۆمەڵی ئیسلامی
5- حزبی زەحمەتکێشانی کوردستان
6- بزووتنەوەی گۆڕان
7- پارتی دیموکراتی کوردستان
8- یەکێتی نیشتیمانی کوردستان
9- نوێنەرایەتی کەمپی مەخمور
27-01-2016
باشوری کوردستان

هەولێر - ئەم بەیانیە، ئەندامانی سەر بە حکومەتی هەرێمی کوردستان و هێزەکانی پاراستنی نەوتی کەرکووک جوڵان لەپێناو پاراستنی ئاساییشی کێڵگە نەوتیەکانی بای حەسەن و ناوچەی مەخمور پاش ئەوەی زانرا بەرپرسانی وەزارەتی نەوتی فیدراڵی لە بەغدا فەرمانیان کردووە بە زیانگەیاندن بەو هێڵی بۆریەی کە بەم دواییانە دوو لایەنە ڕێکەوتنی لەسەر کرابوو و کێڵگەی ئاڤانا دۆم دەبەستێتەوە بە کێڵگەی خورمەڵەوە.

ئێستا کێڵگەی بای حەسەن و کێڵگەکانی تری قەزای مەخمور بە سەلامەتی لەژێر بەڕێوەبردنی حکومەتی هەرێمی کوردستاندان. حکومەتی هەرێمی کوردستان چاوەڕواندەکات بەرهەمهێنان لەم کێڵگانەدا بەشێوەیەکی ئاسایی بەردەوام بێت. کارمەندانی کۆمپانیای نەوتی باکوور کە پێشتر ئەم کێڵگانەیان ئیشپێکردووە ئاگادارکراونەتەوە کە لە سبەینێوە چاوەڕێیان لێدەکرێت هاوکار بن لەگەڵ بەڕێوەبردنی حکومەتی هەرێمی کوردستاندا. ئەوانەی نایانەوێت هاوکاربن دەتوانن بڕۆن.

مەبەست لە نەخشەکێشان و دروستکردنی ئەو بۆریە نوێیەی کە خورمەڵە بە ئاڤاناوە دەبەستێتەوە بە تەواوی ئاسانکاریکردن بووە بۆ هەناردەکردن لە کێڵگەکانی مەخمور و ئاڤانا و ناوچەکانی کەرکووک لەرێگەی تۆڕی ‌هێڵی بۆری حکومەتی هەرێمی کوردستانەوە لەپێناو یارمەتیدانی زیادکردنی داهات بۆ خەڵکی عێڕاق لەم کاتی پێویستیە زۆرەدا و لە کاتێکدا زۆربەی هێڵی بۆری عێراق– تورکیا لەژێر کۆنترۆڵی داعشدایە.

ئەم ژێرخانە نوێیە لە لایەن حکومەتی هەرێمی کوردستانەوە دروستکراوە و پارەی دراوە و حکومەتی هەرێم بە هاوکاری تەواوەوە کاری لەگەڵ بەرپرسان و ئەندازیارانی کۆمپانیای نەوتی باکووردا کردووە. بەڵام ڕۆژی پێنچشەممە حکومەتی هەرێمی کوردستان زانی کە هەندێک بەرپرسی وەزارەتی نەوتی فیدراڵی فەرمانیان کردووە بە ژمارەیەک لە کارمەندانی کۆمپانیای نەوتی باکوور بۆ ئەوەی هاوکاریان لەگەڵ حکومەتی هەرێمی کوردستاندا بووەستێنن و وەلفەکانی بۆریە نوێیەکە لێبکەنەوە یان لەکاریان بخەن.

کێڵگەکانی ئاڤانا و مەخمور لە مانگی ئازارەوە نەیانتوانیوە هەناردە بکەن چونکە بۆری سەرەکی عێراق– تورکیا بەهۆی هێرشە تیرۆریستیەکانەوە شکێنراوە. هێڵی بۆری سەرەکی عێراق بەزۆری دەکەوێتە ئەو ناوچەیەی کە بەم دواییانە لەلایەن حکومەتی فیدراڵیەوە تەسلیمی داعش کرا.

سەرباری نەتوانینی هەناردەکردن و وەستانی پاڵاوتن لە بێجی، کێڵگەکانی ئاڤانا و مەخمور نزیکەی 110،000 بەرمیل نەوتیان ڕۆژانە بەرهەم دەهێنا و بڕی غازەکەی ناویشیان سوودی لێوەردەگیرا بۆ یارمەتیدانی ئیشپێکردنی کارگەی بوتڵی غازی کەرکووک.

بەڵام لەبری بەکارهێنانی بۆریە نوێیەکەی حکومەتی هەرێمی کوردستان بۆ هەناردەکردنی نەوتە بەرهەمهێنراوەکە، بەپرسانی کۆمپانیای نەوتی باکوور لەلایەن بەغداوە فەرمانیان پێکرا بۆ گێڕانەوەی نەوتەکە بۆ کێڵگەیەکی بچووک و بەکارنەهێنراوی کەرکووک. ئەم بڕیارە، کە پاڵنەری سیاسی لە پشتە، دەبووە هۆی زەرەر و زیانێکی گەورە بە کێڵگەکە و بەفیڕۆچوونی هەمیشەیی زۆربەی ئەو نەوتەی کە گێڕابوەوە. هەروەها دەبووە هۆی بێ بەشکردنی خەڵکی عێراق لە داهاتی هەناردەکردنی نەوت کە لە ئێستادا پێویستیەکی گەورەیە.

لە ئێستا بەدواوە، بەرهەمی ئەو کێڵگە نوێیانەی کە لەژێر کۆنترۆڵی حکومەتی هەرێمی کوردستاندان بەکار دەهێنرێت بۆ پڕکردنەوەی کەمی بەرهەمە پاڵێوراوەکان لە بازاڕی ناوخۆدا. ئەمەش باری سەرشانی هاوڵاتیانی ئاسایی سووک دەکات کە لە ئەنجامی شکستی دەسەڵاتی فیدراڵیەوە بۆ پاراستنی ژێرخانی نەوت لەو ناوچەیەدا دروستبووە.

هەروەها حکومەتی هەرێمی کوردستان پشکی دەستووری داهاتی نەوت کە لەم کێڵگانەوە بەدەستدێت وەردەگرێتەوە بۆ پڕکردنەوەی ئەو کورتهێنانە داراییە گەورەیەی کە بەهۆی بڕینی نایاسایی پشکی 17٪ ی هەرێمی کوردستان لە بودجەی فیدراڵی لەلایەن بەغداوە دروستبووە.

حکومەتی هەرێمی کوردستان دەرگای کراوە بووە و هەمیشەش کراوە دەبێت بۆ هاوکاریکردن و هەماهەنگی کردن لەگەڵ بەغدا بەپێی ماف و بەپرسیارێتیەکانی هەرێمەکان هەر وەک لە دەستووری عێراقدا هاتووە. حکومەتی هەرێمی کوردستان هێشتا ئومێدەوارە کە بەغدا واز بهێنێت لە پیادەکردنی سیاسەتی ئابڵوقەی سیاسی و ئابووری سزائامێز دژی هاوڵاتیانی کوردستان.

رووداوەکانی ئەم بەیانیە دەریانخست کە حکومەتی هەرێمی کوردستان سوورە لەسەر پاراستن و بەرگریکردن لە ژێرخانی نەوتی عێراق هەر کاتێک لەژێر هەڕەشەدا بێت بەهۆی کردەوەی تیرۆریستی یان، لەم حاڵەتەدا، بەهۆی تێکدانێکەوە کە پاڵنەری سیاسی لە پشتەوەیە.

گەمارۆکە هەڵگرن
بەناوی کەسایەتی، پارت و ڕێکخراوە کوردستانییەکان کە ناویان لەژێر ئەم نامەیە هاتووە، داوا دەکەین ئەم گەمارۆیە دەستوبەرد هەڵبگیرێت، پیویست ناکات ئێمە بڵێین کە گەلەکەمان لەوێ هەموو کوردن و زۆربەیان ژن و مەنداڵن، چونکە ئێوە هەموویان دەناسن.
ئێمە ئەم گەمارۆیە لەلایەن ئێوەوە بە شایستە نازانین، ئێمە، ئێوە لەم بابەتە و لەم هەڵویستە گەورەتر دەبینین، چونکە ئێمە بەرپرسیاریتان لە هەرێم فراوانتر لە ئاستی کوردستان دەبینین، هەڵویستی ئێمە لەم بوارەدا، هاوکات پێوەری هەڵویستمان بۆ یەکێتی نەتەوەییە.
ئەم گەمارۆیە شایەنی کەسایەتی ئێوە نییە، بۆیە باوەڕمان وایە کە ئێوە ڕێز لە داواکارییەکامان دەگرن و لە کاتێکی هەرە نزیکدا ئەم گەمارۆیە هەڵدەگرن.
باوەڕمان پێتانە، ئەرێنیانە هیواتان لێدەکەین و پێداگرین لەسەر داخوازییەکەمان، بە سڵاو و ڕێزەوە، چاوەڕوانی وەڵامی ئەرێنیتانیان.
ئەو پارت و ڕێکخراوانەی نامەکەیان واژۆ کردووە:
یەکێتی نیشتمانی کوردستان - یەکێتی
تەڤگەری گۆڕان
کۆنگرەی چڤاکی دیموکراتی- ئەوروپا- کەجەدەئێ
تەڤگەری ژنانی کوردستان- ئەوروپا- تەژەئێ
حزبی شیوعی
حزبی زەحمەتکێشان
پارتی ئازادی و دیموکراسی ئێزدیان- پادێ
تەڤگەری ئازادی
پارتی یەکێتی دیموکراتی- پەیەدە
پارتی دیموکراتی کورد- سوریا
پارتی چەپی کورد- سوریا
پارتی نۆژەنی کوردستانی- سوریا
پارتی دیموکراتی کورد- سوریا- ئەلپارتی
پارتی دیموکراتی پێشڤەڕۆی کورد- سوریا
پارتی چەپی دیموکراتی کورد- سوریا
پارتی یەکێتی دیموکراتی کورد- سوریا
پارتی ڕێککەوتنی کورد- سوریا
پارتی چاکسازی کورد- سوریا
پارتی کەسکی کوردستان- سوریا
#پارتی دیموکراتی کوردستان#- سوریا
پارتی کۆمۆنیستی کوردستان- سوریا
پارتی ئیسلامی کوردستان- پیک
پارتی کۆمۆنیستی کوردستان- کەکەپە
تەڤگەری کاوە
پارتی ژیانی ئازادی کوردستان- #پژاک#
یەکێتی شۆڕشگیرانی کوردستان
کۆمەڵگای دیموکراتیک و ئازادی کوردستان- کۆدار
کۆمەڵگای ژنانی ئازادی ڕۆژهەڵاتی کوردستان- کژار
پلاتفۆرمی هەورام
پلاتفۆرمی زاگرۆس
پلاتفۆرمی یارسان
یاری کورد
Kurdische Gemeinde Stuttgart e.V
فیدراسیۆنی عەلەویانی کوردستان
فیدراسیۆنی کۆمەڵانی ئێزدی
جڤاکی ئیسلامی کوردستان
ئەنستیوتی کورد- ئەڵمانیا
ئەنستیوتی کورد- بروکسل
ئەنجومەنی شەنگال لە دەرەوەی وڵات
یەکێتی مامۆستایانی کوردستان
یەکێتی ئێزدیانی سوری
Kurdisch Gemeinde Brandenburg - Berlîn
Dachverband der Êzidischen Frauenräte
DKF (Deutsch-Kurdisches Forum) e.V Dresden
کۆنگرەی گەلی مەزۆپتامیا
پارتی ئازادی مەزۆپتامیا
Kurdistan Human Rights Association
#15-04-2020#

پەرلەمانتارانی ژنی باکوری کوردستان لە فراکسیۆنی #هەدەپە#، نامەیەکیان ئاراستەی ژنە سیسەتمەدارەکانی باشوور کرد، ئاماژەیان بە هێرشی سەر مەخمور و ئاڵۆزییەکانی زینی وەرتێ کردووە و ڕایانگەیاندووە، کە شەڕی ناوخۆ بە هیچ جۆرێک پەسەند ناکەن، داواشیان لە ژنانی باشووری کوردستان کردووە لە دژی پیلانەکانی داگیرکەران بووەستنەوە و هەڵوێست نیشان بدەن.
پەرلەمانتارانی ژنی باکوری کوردستان لە فراکسیۆنی هەدەپە لە پەرلەمانی تورکیا، لەسەر هێرش بۆ سەر مەخمور و ئاڵۆزییەکانی زینی وەرتێ و هەوڵی داگیرکەران بۆ دروستکردنی شەڕی ناوخۆ، نامەیەکیان بۆ د. ڕێواس فایەق، سەرۆکی پەرلەمانی هەرێمی کوردستان و یەکێتی ئافرەتانی کوردستان، یەکێتی ژنانی کوردستان، یەکێتی خوشکانی ئیسلامی، یەکگرتووی خوشکانی ئیسلامی و ژنانی حیزبی زەحمەتکێشان و ژنانی ئەندام لە حیزبەکانی باشووری کوردستان نارد.
ژنانی هەدەپە، لە نامەکەدا بە ئاماژەدان بە خەباتی ژنان و ئەو زوڵم و زۆرەی لەسەریانە داوایان لە ژنانی باشووری کوردستان کردووە لە دژی پیلانەکانی داگیرکەران بوەستنەوە و هەڵوێستی مێژوویی خۆیان نیشان بدەن و دژی درووستبوونی شەڕی ناوخۆیی بوەستنەوە.
لە بەشێکی دیکەی نامەکەدا، ئاماژە بەوەدراوە کە جوگرافیای کوردستان بە درێژایی مێژوو بووەتە ناوەندی شەڕی نێودەوڵەتی و بۆ ئەوەی کە کوردیش نەبنە یەک هەموو کات دوژمنانی کورد و وڵاتە سەردەستەکان ناکۆکییەکانی ناوخۆیان وەلا ناوە و بوونەتە یەک، نموونەی ئەوەش لە ڕیفراندۆمەکەی ئەم دواییەی باشوردا دەرکەوت، کە هەموو هێزە باڵادەستەکان لەدژی دەرکەوتن، بەڵام هەمیشە ئێش و ئازاریی هەر پارچە و شارێکی کوردستان ئێش و ئازاری هەموو پارچەکانی دیکە بووە و بەردەوام کلتور و خەباتمان یەک بووە و یەکێتی نەتەوەیی لە دڵماندا پێکهاتووە.
لە بەشێکی دیکەی نامەکەدا ژنانی هەدەپە، ئاماژەیان بە هێرشەکەی 15ی ئەم مانگە کردووە کە لە لایەن دەوڵەتی تورکەوە کرایە سەر کامپی مەخمور و بە هۆیەوە 3 ژنی کورد کوژران، ئەوەش لە کاتێکدابوو کە جیهان سەرقاڵی ڕووبەڕووبوونەوەی ڤایرۆسی کۆرۆنا بوو، بەڵام وڵاتانی سەردەست هێرش دەکەنە سەر گەلەکەمان و دەیانەویت ناکۆکی لە نێوان کوردا زیاتر بکەن و شەڕی براکوژی بکەن.
هەروەها ئاماژە بەوەدراوە کە ژنانی کورد هەتا ئێستا بە هەڵوێست و ڕووبەرووبوونەوەی خۆیان وەڵامی واتاداری داگیرکەرانیان داوەتەوە، بۆیە ئەمڕۆش زیاتر لە هەرکات پێویستمان بە یەک دەنگی و یەک هەڵوێستی هەیە، ئەوەشیان خستووەتەڕوو کە ئەوان وەک ژنانی پەرلەمانتاری هەدەپە لە پەرلەمانی تورکیا بەهیچ شێوەیەک ئەوە پەسەند ناکەن، چونکە زیانی زۆریان لە شەڕی خوشک و برا کوژیدا بینیوە و دەتوانین بە بەرزکردنەوەی دەنگمان و یەکێتیمان ڕێگا لە پیلانی داگیرکەران بگرین و وەڵامی واتاداری دوژمنانی کورد بدەینەوە.
ژنانی هەدەپە داواشیان لە تەواوی ژنانی پەرلەمانتاری باشووری کوردستان کردووە لە دژی پیلانەکانی داگیرکەران بوەستنەوە و هەڵوێستی مێژووی خۆیان نیشان بدەن و پێکەوە ڕووبەڕووی پیلانەکانی دوژمان ببنەوە، چونکە جیاوازی لە نێوان هیچ پارتێکدا ناکەین و بەناسنامەی کوردبوون و ژنبوون، بە تێکۆشانی خۆمان پێکەوە دەبین و کات کاتی بەهێزکردنی یەکێتییە.
لە کۆتایی نامەکەشدا جەخت لەوە کراوەتەوە کە بەڵینمانداوە گەلی خۆمان لەهەر جۆرە ڤایرۆس و هێرشێک بپارێزین و یەکێتی ژنی کوردیش بنچینەی یەکێتی گەلی کوردە و ئێمە بە شەڕ گەلێک زیانمان بەر کەوتووە، هەر بۆیە دووبارە ڕایدەگەیەنین کە بەهیچ شێوەیەک شەڕی خوشک و براکوژی قبوڵ ناکەین و بە هەموو هێزمان ڕووبەڕووی دەبینەوە.[1]
#21-04-2020#

$پەروەردەى مەخمور پاڵەوانى بالەى پەروەردەکان بوو$
لە شارى #هەولێر# لە هۆڵى #یانەى وەرزشی ئەکاد# لە شارۆچکەى #عەنکاوە# بەبەشداری حەوت هەڵبژاردەى پەروەردەى شارۆچکەکان و بە سەرپەرشتى بەڕێوەبەرایەتى چالاکی وەرزشی و دێدەوانی سەر بە بەڕێوەبەرایەتی گشتی پەروەردەى هەولێر بۆ ماوەى سێ ڕۆژ یارییەکانى خولى بالەى پەروەردەکانى سنوورى بەڕێوبەرایەتى گشتی پەروەردەى هەولێر کۆتایی هات، دواى ئەنجامدانى چەند یارییەک لەنێوان تیپە بەشداربووەکان هەردوو تیپى پەروەردەى مەخمور و پەروەردەى شەقڵاوە گەیشتنە یارى کۆتایی، لە یارى کۆتایشدا بە ئامادەبوونى ژمارەیەکى زۆرى هەواداری وەرزشیی ئەم یارییە هەردوو پەروەردەکانى شەقڵاوە و مەخمور لە یارییەکى دراماتیکی بەرزى هونەرى یارى بالە ڕووبەڕووى یەکترى بوونەوە، لەم یارییەشدا یاریزانانى هەردوو بە درێژایی سێ گێمی یارییەکە توانیان ئاستێکى هونەری بەرز پێشکەش بکەن لەم یارییە و هەوادارانى خۆیان هێنابووە جۆش و زۆربەى کاتەکانى یارییەکە ئاست و ئەنجامیان لە یەکترى نزیک بوو، سەرئەنجام پەروەردەى مەخمور توانى بە ئەنجامى (2-1) گێم لە پەروەردەى شەقڵاوە بباتەوە و نازناوى خولەکە بۆ خۆیان یەک لاى بکەنەوە، لە کۆتایشدا لەلایەن بەڕێوەبەرى گشتی پەروەردەى هەولێر و ژمارەیەک لە بەرپرسانی پەروەردەیی خەڵات و دیارى بە سەر تیپە سەرکەوتووەکانى خولەکە دابەشکرا، لە بارەى پشتگیری کردنى وانەى وەرزش و چالاکییەکانیش لە ناوەندەکانى خوێندن مامۆستا لوقمان سەعید بەڕێوەبەرى گشتى پەروەردەى هەولێر گوتى: پشتگیری کردنى وەرزش لە ناوەندەکانى خوێندن و سەرجەم پەروەردەکان لە کارە سەرەکییەکانى ئێمەیە، هەموو هەوڵێک دەدەین بۆ ئەوەى سەرجەم چالاکییە وەرزشییەکان ئەنجام بدەین بۆ ئەوەى گرنگى زیاتر بە تواناى ئەو قوتابییانەش بدەین کە ئارەزووی وەرزش دەکەن لە قوتابخانەکان، هەرچى پێویست بێ ئێمە بەردەوام دەبین لە خزمەت کردنى سێکتەرى وەرزش لە ناوەندەکانى خوێندن، بەردەوامیش دەبین لە ئەنجامدانى چالاکییەکانى دیکەش هەرچى لە توانامان بێت خزمەت بە چینى وەرزشکارە قوتابییەکان و مامۆستایان دەکەین لە سنوورى بەڕێوەبەرایەتى گشتی پەروەردەى هەولێر، سوپاسى مامۆستایانى وەرزشیش دەکەین بۆ ئەنجامدانى ئەم چالاکییە وەرزشییانە لە سنوورى بەڕێوەبەرایەتى گشتیى پەروەردەى هەولێر.[1]

دانیشتوانی کەمپی مەخمور لە ڕێکەوتی 02-02-2022 کاتژمێر 11:00 ڕێپێوانێکی جەماوەری دژی هێرشەکانی دەوڵەتی تورکی داگیرکەر ڕێکخرا.
دانیشتوانی کامپەکە بەرەو نوسینگەی نەتەوە یەکگرتووەکان ڕۆشتن و چاوەڕوان دەکرێت لەوێ لێدوانیان دا.[1]

سەرا-مەخمور، گەڕەکی ژمارە(102)ی سەرۆکایەتی شارەوانی(مەخمور)ە، یەکێکە لە گەڕەکەکانی شارەدێی(ناوەند)ی شارۆچکەی(مەخموری)ی پارێزگای(هەولێر)ی پایتەختی هەرێمی کوردستان.[1]

شێروان-مەخمور، گەڕەکی ژمارە(103)ی سەرۆکایەتی شارەوانی(مەخمور)ە، یەکێکە لە گەڕەکەکانی شارەدێی(ناوەند)ی شارۆچکەی(مەخموری)ی پارێزگای(هەولێر)ی پایتەختی هەرێمی کوردستان. [1]