پەیامی لاهور شێخ جەنگیلاهور شێخ جەنگی بۆ کۆچی دوایی سەرۆک مام جەلالمام جەلال
مامی ورە بەرز، باوکی شۆڕشی نوێی و قیبلەی ڕوونی کوردایەتیی گەلەکەمان کۆچی دوایی کرد.
مام جەلال، ئه و ڕابەرەی هەموو تەمەنی پڕ بەرهەمی خۆی، بۆ ناساندن و چەسپاندن و بەرگریکردن لە مافی کۆمەڵانی خەڵکی کوردستان تەرخان کرد، بەجێی هێشتین.
مامی گەورە و ئازا و ئازادیخواز و پشودرێژ و بەتەدبیر، دیپلۆمات و پڕ ئەزموون و ئاشتیخواز و میانەڕه و و شۆڕشگێڕ، مامی پێشمەرگایەتی و ئازارچەشتووی کۆڵنەدەری ڕێگەی بەرزی کوردایەتی، مامی دڵگەورە و دەم بەخەندە و پشتیوانی حەق و هەژار و سەربڵندی، مامی زیندانیکراوان، مافخوراوان، چەوساوەکان و ڕەنجدەران و مامی یەکیەتیی نیشتمانیی کوردستان، پاش ململانێ لەگەڵ نەخۆشی، ئەمڕۆ لە نەخۆشخانە کۆچی دوایی کرد.
مامۆستای ڕێباز ڕوون و ئامانج ڕەوا، بەرگریکارە سەرسەختەکەی مافی چارەی خۆنوسین، پارێزەری دیموکراسی و ئه و ڕابەرەی هەرچی هەبوو بەخشیی لەپێناو ڕۆژێکی گەشتر بۆ نیشتمانەکەی، بەدڵنیایی و بە کوێرایی چاوی مردن نامرێت. نە سەفین لەبن دێت و نە مام جەلال دەمرێت. مام جەلال، ناو و تێکۆشان و ڕێبازە پڕ لە ڕێبوارەکەی، لە دڵی کادرانی یەکیەتیی وهەموو ئازادیخوازان دا بەزیندوێتی دەمێننەوە.
ئەم ڕابەرە ئەفسونگەرە، کە دڵ و دەرونی کوردەواریی پڕکردووە لە جوانیی خەباتکارانەی خۆی، باوکی شۆڕشی نوێ و مامی من و یەکیەتییەکان و برا و هەڤاڵ و هاوسەنگەری هەموو شۆڕشگێڕە ئازادیخوازەکانی جیهان بوو.
ئەم زاتە، خوڵقێنەری مێژووی هاوچەرخی گەلی کوردە، و لە بێدەنگی و ژێردەستەییەوە، کوردەواریی بۆ بزێوی و ئازادیخوازی، ڕابەرایەتی کردوە. مام جەلال مەردێک بوو گەورەتر لە پۆستەکانی و ئەزموونێک بوو پۆڵایین بۆ بەرگری لە خاک و گەل و بیر و پرەنسیپە بەرزەکانی.
ئەم سەرکردە و بیرمەندە سیاسییە هەڵکەوتوەی کوردستان، کە داینەمۆی خەباتی ساڵانی پێش و پاش گۆڕینی ڕژێمی پاشایەتی عێراقە، جێ دەستی لە ڕوداوە گرنگە سیاسییەکانی ژیانی حزبایەتی کوردستان و عێراقدا دیارە و لە شۆڕشەکانی دواتریش دا، هەم فەرماندەی هێزی پێشمەرگە و هەم داینەمۆی ڕوداوە بەرهەمدارە گەورەکانی گەلەکەمان بووە.
مام جەلال، ڕەچەشکێن، هەڵگیرسێنەری شۆڕشی نوێ، و سکرتێری گشتی یەکیەتیی نیشتمانیی و پێشەنگی ڕاپەڕینی ڕزگاری و ڕوخێنەری ڕژێمی فاشیستی بەعس و یەکەم سەرۆکی کوردی پاش ئازادی و شکێنەری بەندی مێژووی چەوسانەوەی ژیانی گەلانی ژێردەستەی ناوچەکه و جێگای فەخری جوڵانەوە سۆشیال دیموکراتەکانە.
ئەم کەڵە سیاسەتمەدارە ماندونەناسە، تا پرۆسەی ئازادیی عێراق، ئەزموون و توانای خۆی، لە پاراستنی ڕاپەڕین و پێشخستنی سیاسی و باشترکردنی ئاستی ژیان و بژێوی کۆمەڵانی خەڵک و پتەوکردنی پێگەی ڕێکخستن و پێشمەرگایەتی و حوکمڕانیی و دیپلۆماسیی یەکیەتیی نیشتمانیی و کوردستان تەرخان کرد و چەند ساڵی کۆتایی تەمەنی پڕ بەرهەمیشی، بێ دوو دڵی، لە ڕەخساندنی ئاشتەوایی بۆ کوردستان و ناوچەکە بردەسەر.
مام جەلال، ئەم مامە تێکۆشەرە، هێند بە کاریگەرییەوە خەبات و حوکمڕانیی کرد، هێند ژیر بوو لە بەڕێوەبردن و دۆستایەتی و گفتوگۆ و دانوستاندا، کە پاش دوور کەوتنەوەی لە یەکیەتی و کوردستان و عێراق و نەخۆشکەوتنی، دەسکەوتەکانی شۆڕشی نوێ و ئاستی هاوسەنگی و هاوپەیمانی ناوخۆیی، و ئایندەی پرۆسەی ئازادی و ئاوەدانی و ڕادەی متمانە و کارایی حوکمڕانیی، پاشەکشێی کارەساتباریان کرد.
بۆ ئەم پەژارە گەورەیە، لە قوڵایی دڵمەوە سەرەخۆشیتان لێ دەکەم بۆ لەدەستدانی قیبلەی ڕوونی کوردایەتی و تکاکارم لە خوای گەورە، تێکۆشانەکەی مام جەلال، بکاتە ڕووناکی ڕێگە بۆ کەسوکار و هەڤاڵان و ڕێبوارانی ڕاستەقینەی ڕێی پاراستنی سەفینی یەکێتیی و ڕزگاریی گەلەکەمان.
گەلانی دیموکرات و ئازادیخوازانی عێراق و ناوچەکە و جیهان، و بەتایبەتتریش کۆمەڵانی خەڵکی کوردستان و هەڤاڵ و هاوسەنگەرانی یەکیەتیی نیشتمانیی کوردستان، ماتەمباری ئەم کۆستە ناوەختەی گەلەکەمانن و نیگەرانی و خەم و پەژارە و دڵەڕاوکێ و ترس لە ئایندەی نادیار و بێکەسبوون، بەرۆکی گرتوون. لێرەوە و لە ئاست هەر دڵۆپە فرمسێک یا ئاهوپەژارەیەکتان، لە ئاست زەردەخەنەی یادەوەری و هاودڵیی و وەفاداریتان، سەری ڕێز و وەفاتان بۆ نەوی دەکەم، و هەر لێرەوە بەڵێنی ئەوەتان پێدەدەم، کە خوێندکاری ڕێبازەکەی مام جەلال بم و لەگەڵ هاوسەنگەرانم تواناکانم لە بەرگریکردن لە یەکیەتیی نیشتمانیی کوردستان، پاراستن، بژارکردن و بوژاندنەوە و پێشخستنی دا تەرخان بکەم و وەکو خوێندکارێکی مامی ورە بەرز و کۆڵنەدەرم، بەپشتیوانی ئێوە یەکیەتیی و کوردستان و ئەزموونەکەی، لە هەڕەشە و مەترسیی پاشەکشێ و لەناوچوون، بپارێزم و لەم ڕێگەیەدا، لەهیچ قوربانیدانێک سڵنەکەمەوە.
انا لله و انا الیە ڕاجعون
لاهور شێخ جەنگی
03-10-2017