راگەیاندنی ئەنجومەنی باڵای سیاسی و بەرژەوەندیی یەکێتی
گەلی ئازادیخوازی کوردستان!
کەسوکاری شەهیدان!
هەڤاڵانی یەکێتی!
دەنگدەرە بەئەمەکەکانی یەکێتیەکەی مام جەلالمام جەلال!
لە هەلومەرجێکدا، قەیرانە ئابوریەکانی جیهانگیری، بەتایەتی سیاسەتی سودگەرایی لیبرالیزمی نوێ دەسەپێنرێ، کێشەی گەلان زیاتر پەراوێز دەخرێ، جیاوازی کۆمەڵایەتی درێژەی هەیە و لەشکری بێکاری.. زۆرتر دەبێ.. و سەرئەنجام، بۆ یەکەمین جارە لەمێژوودا، هاوزەمان لە ئەمریکای لاتین، ڕۆژهەڵاتی ناوەڕاست، وڵاتانی ئاسیا.. بۆ دژایەتی گەندەڵی و بەدیهێنانی دادپەروەری، ڕاپەڕین بەرپا دەکرێ و ستەمکارەکان، یان دەڕوخێن، یاخود لەبەردەم داخوازی ڕاپەڕینەکاندا، پاشەکشە دەکەن.
لەم دۆخەدا، ئاکامی شکستی حکومەتەکانی عێراق، کێشەی چەشناوچەشنی دەستوری و ئابوری و سیاسی لەعێراقدا، پەنگیان خواردووەو هەرێمی کوردستان پێویستی بە پرۆژەیەکی نوێی دانوستان و چارەسەری دەستوری و ئابوری و سیاسی هەیە؛ هێزە کوردستانیەکانیش، لەبەرامبەر ڕوداوەکانی ناوچەکەدا، ئەرکمانە ناکۆکی حیزبایەتی کەم بکەینەوە و ئەرکە هاوبەشە گشتیەکان بکەینە ستراتیژی قۆناغەکە..
لەو بارودۆخەدا، کە هێشتا مەترسیەکانی داعشداعش، بەتاکتیکی ڕەشەکوژی پارتیزانی لەئارادایەو پێشمەرگەش، گیان لەسەردەست کوردستان و حکومەتەکەیان دەپارێزن، لەدوای کۆچی ڕابەری هەڵکەوتومان سەرۆک مام جەلال، بە ئامادەبونی (1126) نوێنەری ئۆرگانەکان، بەپێی ئەو بەرنامەیەی کۆمیسۆنی باڵای ئامادەکاری کۆنگرە و کۆمیتەی پەیڕەوی ناوخۆ، گەڵاڵەیان کردبوو، یەکێتیی چوارەمین کۆنگرەی سازدا.
دڵنیاین، دۆست و نەیاران، لەپێشەوەیاندا کادرو ئەندامە پەرۆشەکانی یەکێتی و پێشمەرگە دلێرەکان، چاودێریی چۆنیەتی بەستنی کۆنگرەکەیان دەکرد. بۆ؟ چونکە دۆخی سیاسی، گۆڕانکاریی کۆمەڵایەتی، کێشە ئابوری و سیاسەیەکان، فشاریان لەسەر ژیانی حیزبایەتی و چۆنیەتی چارەسەرکردنی گرفتەکان هەبوو. سەرئەنجام، بە بەرنامەیەکی گونجاو سەبارەت بە کێشەو پێکهاتەی یەکێتی، لەناو سیستەمێکی نایابی بەڕێوەبردنی کۆنگرەدا، کاتژمێر (11)ی ڕۆژی (21/12/2019) کۆنگرە، بە خوێندنەوەی ڕاپۆرتی کۆمسیۆنی باڵای ئامادەکار لە لایەن حاکم قادرەوە و پاشان، بە خوێندنەوەی ڕاپۆرتی سیاسیی جێگری سکرتێری گشتی، هەڤاڵ کۆسرەت ڕەسوڵ عەلی، دەستیپێکرد. ئینجا، ڕێوشوێنی چۆنیەتی هەڵسەنگاندنی ڕاپۆرتی سیاسی و پەیڕەوی ناوخۆ، خرایە دەنگ و چۆنیەتی هەڵبژاردنی (ئەنجومەنی باڵای سیاسی بە سەرۆکایەتی هەڤاڵ کۆسرەت ڕەسوڵ عەلی) بۆ پاراستنی بەرژەوەندی و پەیڕەوی ناوخۆ و هەڵبژاردنی (ئەنجومەنی گشتی یەکێتی) تێکڕا پەسەندکران. پاشان، دەرگای خۆپاڵاوتن، کرایەوە.
ئەنجومەنی باڵا، لەکاتێکدا، سوپاسی ئەندامانی کۆنگرەو کۆمسیۆنی ئامادەکار و لیژنەی پەیڕەوی ناوخۆ، هەروەها پارێزەرانی ئەمنی هۆڵەکە، بۆ ماندووبونیان دەکات.. هاوکات، لە یەکەمین کۆبونەوەی ئەمڕۆیدا بنچینەی سیاسەتی خۆی، بۆ ڕاپەڕاندنی ئەرکەکانی کە کۆنگرە پەسەندیکردون، دیاری کردو لەماوەیەکی کورتدا لەڕێی لیژنەی هاوبەشی ئەنجومەنی باڵاو ئەنجومەنی گشتیشەوە، دەسەڵاتەکانی لە پەیڕەوی ناوخۆدا، هەروەکو لەکۆنگرەدا بڕیاری لێدرا، دەچەسپێنرێ؛ لە کۆبونەوەکەدا جەخت کرایەوە، کە دەستەبەری سیاسەت و بەرژەوەندیی یەکێتی دەبێ، لەهەموو ئاست و ئاراستەکاندا. دوا تواناشی دەخاتەکار، ئۆرگانەکان، پابەندی بڕیارەکانی کۆنگرەو ڕێبازی یەکێتی و سەرۆک مام جەلال بن، کە ڕێبازی دادپەروەری ڕەنجدەرانی بیروبازووە؛ ڕێبازی کوردایەتی مافی چارەی خۆنوسینە بۆ سەرانسەری کوردستان؛ ڕێبازی مافی مرۆڤ و ژینگەپارێزی و یەکسانی ژن و پیاوە..
جەماوەری کوردستان!
ئەنجومەنی باڵا، سور دەبێ لەسەر جێبەجێکردنی بڕیار و بەرنامەکانی کۆنگرە. لەڕێی جێبەجێ کردنی بڕیارەکانی کۆنگرەشەوە، یەکێتی، لە حکومەتی عێراق و کوردستاندا، دەتوانێ داکۆکی ڕاستەقینە بکات لە چارەسەرکردنی کێشەکانی خەڵک. لەپێشەوەدا، کێشە ئابوریەکان. هەتا کێشە ئابوریەکانی خەڵکیش، لەپێشەوەدا موچە و و بودجە، هەروەها دانەوەی پاشەکەوتی موچەخۆران، چارەسەرنەکرێ و پرۆژەکان نەخرێنەوە کار.. بانکەکان متمانە وەرنگرنەوەو قەرزی سەرمایەداران نەدرێتەوە.. یەکێتی ناتوانێ، جەماوەر ئاشت بکاتەوەو ئاشتی کۆمەڵایەتی و لێبوردەیش، ناچەسپێنرێ.
لە سەردەمێکی نوێی جیهانگیری و هەژمونی سۆسیال- میدیادا، لەدوای چوارەمین کۆنگرەوە، یەکێتی پێ دەنێتە قۆناغێکی نوێی حیزبایەتی و ململانێی سیاسی و کۆمەڵایەتیەوە. لەکاتێکدا ئەرکمانە، یەکڕیزی هێزە سیاسیەکان و دۆستایەتی پشتیوانەکانمان، پەرە پێبدەین، ناشبێ، جیاوازی ڕێبازی فەلسەفەی سیاسی و کۆمەڵایەتیشمان بە سیاسەتێکی ئەقڵانی، وەکو حیزبێکی سۆسیال-دیموکرات، گەش دەرنەخەین. یەکخستنی هێزە سیاسیەکان و ڕێکخستنی ململانێ کۆمەڵایەتیەکان، تایبەت لە بۆتەی خەباتی پیشەیی و جەماوەری و مەدەنیدا، بنچینەی ئەرکە دیموکراسیەکانن، لەم قۆناغەی گوزەری دیموکراسیدا، بەرەو سیستەمی دیموکراسی ڕاستەقینەو دادپەروەری کۆمەڵایەتی و خۆشگوزەرانی.
ئیتر بۆ پێشەوە بەرەو بەدیهێنانی ئەرکەکانی چوارەمین کۆنگرە
-نەمری بۆ شەهیدان
سەرکەوتن بۆ خەباتی چارەخۆنوسینی نەتەوەکان
-بێتەدی دیموکراسی و خۆشگوزەرانی و دادپەروەری
ئەنجومەنی باڵای سیاسی و بەرژەوەندی
یەکێتیی نیشتمانیی کوردستانیەکێتیی نیشتمانیی کوردستان
26-12-201926-12-2019