بەڕێز #سیامەند موعینی# هاوسەرۆکی پاڕتی ژیانی ئازادی کوردستان(پژاک)، پەیامێکی بۆ خەڵکی کوردستان بڵاو کردەوە.
$دەقی پەیامەکە$
خەڵکی ڕاپەڕیوی کوردستان
سڵاو دەنێرم بۆ خەڵکی ڕاپەڕیوی کوردستان
زوڵم و زۆرداری و بێ قانونی کۆماری ئیسلامی ئێران لە ماوەی ئەم ساڵانەی دەستەڵاتداریدا، گیانی هەزاران گەنج و ئینسانی تێکۆشەری کردۆتە قوربانی. #ژینا ئەمینی# کچە کوردی بێ ناز لە پایتەختی ئێران کرا بە قوربانی خوێنخۆری و زێهنیەتی پیاوسالاری ڕژیمی کۆنەپەرەستی ئێران. ژنان، گەلان، کرێکاران و بەواتایەکی ترهەموو دانیشتوانی ئێران بە دەستی حاکمیەتێکی تۆتالیتەر و دیکتاتۆر ئیسلامی سیاسی لە ناو سنورەکان ئێراندا بەند کراون و هەموو مافەکانیان لێ زەوت کراوە. ژن هەموو مافێکی سروشتی لێ هەستێندراوە و وەک کۆیلەیەک لە ناو ئەم سیستمە و سونەتی دواکەوتوی ئێراندا قەتیس کراوەتەوە.
ژنانی ڕاپەڕیوی کوردستان بونەتە نمونەی قارەمانێتی و سومبولی بەرخۆدان و پێشەنگایەتی خەباتی ئازادیخوازی لە هەموو کوردستان و ئێستاش بە کردەوە ژنانی کوردستان پێشەنگی هەموو ژنانی ئێران دەکەن. گەلی قارەمانی ڕۆژهەڵاتی کوردستان بە کردەوە نیشانیان دا کە لایقی ئازادی و سەربەستین و ئیتر کۆیلەتی لە هیچ حاکمیەتێکی دیکتاتۆر و داگیرکەر قبوڵ ناکەن. ڕۆژی دووشەممە کرا بە قۆناخێکی وەرچەرخان و خەڵکی شارەکانی کوردستان یەک دەنگ نیشانیان دا کە ئامێزیان بۆ ئازادی کوردستان کردۆتەوە و بە درۆشمی “شەهید نامرن” و “ژن ژیان ئازادی” بە هەموو خەڵکی ئێرانیان ڕاگەیاند کە گەلی کورد یەکگرتوە و یەکگرتوش زوڵم قبوڵ ناکات و بە دژی داگیرکاری تێکۆشان دەکەن. ئیتر ئەم سەردەمە، گەلی کورد لە چوارچێوەی نەتەوەی دێمۆکڕاتیک پێشەنگایەتی گەلانی چەوساوەی ئێران دەکات و بۆ ئازادی و کەرامەتی ئینسانی پڕۆژەی خۆی هەیە و شۆونیزم و کۆنەپەرەستی حاکمیەتی ناوەندی بەتەواوی ڕەد کردۆتەوە.
لە کۆتاییدا سەرەخۆشی لە دایکی ژینا و کەس و کاری دەکەم و سێبوریان بۆ دەخوازم و هیوادارم برینداران و زەرەرمەندبوانی ئەم ئێعترازە هەرچی زوتر چاک ببنەوە. بە پێشەنگی ژنان و بەردەوامی نارەزایەتی و تێکۆشان تۆڵەی هەموو شەهیدانی کوردستان لە داگیرکەران و کۆنەپەرەستان دەکەینەوە.
سیامەند موعینی
هاوسەرۆکی پاڕتی ژیانی ئازادی کوردستان(پژاک)
#19-09-2022#
[1]