نامې: بەرهەم
نازنام: بەرهەم ساڵح
نامې تاتەی: ئەحمەد
تاریخو پېڎابیەی: #12-09-1960#
یاگې پېڎابییەی: #سلېمانی#
ژیواینامە:
بەرهەم ئەحمەد ساڵح، تاریخو (12-09-1960) دلې شارو سلېمانی، پانیشتو کورڎەسانی ئامان پېڎا. هەر جە سلېمانی وانای سەرەتایی و میانی و ئاماڎەییش تەمامنان. ساڵەو (1979) دوېجار بە دەسو ئەمنەکا ڕژېمو بەعسی دەسگیرکریان، پەی ماوەو (43) ڕوا دلې زیڼانو کەرکوکینە کەنارگیر کریان. دمای ئازاڎکەرڎەیش وانای ئاماڎەییش بە پلەی یەکەم تەمامنان. دماتەر بە مەڵامەتو چەمڎاری چڕی دەزگا ئاساییشەکا بەعسی، ناچار سلېمانی جیامازۊن و مەلۊ پەی وڵاتو بەریتانیای.
بڕوانامەو بەکالوریۊسیش جە ئەندازیاری شارەسانی و تەلارسازینە ساڵەو (1983) دلې زانکۊ کاردیف جە بەریتانیا گېرتەن. دماتەر دکتوراش جە ویارو ئامار و پراکتیزەو کۊمپیوتەری جە ئەندازیاریی گردینەنە بەدەسئاردەن.
بەرهەم ساڵح، کۊتاو ساڵەو (1976) پېوەڼیش بە ڕیزەکانو یەکیەتی نیشتیمانی کورڎەسانی کەرڎەن، پېسە ئەندامو یەکیەتی جە ئۆروپا هەرمانەش کەردېنە، هەم وەرپەرسو پېوەڼیەکانو یەکیەتی بییەن جە لەندەن.
یەکەمین کونفرانسی حېزبینە کە دماو ڕزگارکەرڎەی پانیشتو کورڎەسانی چېرو دەسا ڕژېمو بەعسینە بە ئەندامو سەرداری یەکیەتی هورچنیان و ئەرکو سەرپەرەشی ئۆفیسو یەکیەتیش جە ئەمەریکا پەنە ئەسپاریان. چەنی مەرزیارەی ئېراقی تازەی، بەرهەم ساڵح چڼیین پۊستې باڵێش دلې حکومەتو ئېراقی و هەم کورڎەسانینە وەرگېرتېنې.
ساڵەو (2002) دلې کەردێ تیرورستینە حۆلې کوشتەیش دریێ، بەڵام ڕزگارش بی.
بەرهەم ساڵح، هامسەرگیریش چەنی سەرباخ ساڵح، وەرپەرسە و ئەندامەو ئەرەمەرزنەو دەزگاو ڕوەکی کوردی و ژڵېوکارەو مافو ژەنا کەرڎەن، بەرهەمو هامسەرگیریەکەیشان دوې زاروڵېنې.
ساڵەو (2010) دلې کۊنگرەو یەرەمو یەکیەتی نیشتمانیی کوردەستانینە سەرو داواو جەلال تاڵەبانی، سکرتېری گردینو یەکیەتی، چەنی کۊسرەت ڕەسوڵ عەلی، دلې دەنگدایێ ئاشکراینە بە ئەندامې ئەنجوومەنی سەرداری هورچنیێوە، هەردوېشان پېسە یاگەنشینانو سکرتېری گردینی دیاریې کریێ.
زانکۊ ئەمەریکیش دلې شارو سلېمانینە مەرزنارەو وېش بی بە سەردارو ئەمینداری زانکۊکەی.
دکتور بەرهەم ئەحمەد ساڵح، سەرپەرەشتی تۊڕێ فراوانەو پېوەڼیەکانو کورڎەسانی و ئېراقی و هەرېمایەتی و میاندۆڵەتیش کەردەن و پېسە ڕامیارێ میانڕەوی چەنی تەمامو هېز و ڕۆتە ڕامیاریەکانو وڵاتی گونجیان و پېوەنیێ پتەوش چەنیشان هەن.
بەرهەم ساڵح کەسایەتیێ ئەشناسیاو دیارەن دلې کایە سیاسییە کوردەسانی و میاندۆڵەتیەکانە، پانەی کە زەمەنێ فرە جبەرو وڵاتیۆ مەژیوان و بەشداریش دلې کۊششە ڕامیاریەکانە کەردەن و مەسەلې کوردیش بە میانە میاندۆڵەتیەکانی ئەشناسێنەو حۆلې ئانەیش دێنې کە مەسەلې کوردی و ناڕەحەتیەکاش و بېمافیش بیاونۊ پەنەشان، ئەچاگە بەرکۆتی سیاسیش کەردەن و ئەشناسیان. کەسێ زوانزان و زواڼڕەوانی هېمنەن، نەرم و نیان و وېگونجنەن، هاگاڎارو سیاسەتی میاندۆڵەتین و پەی کاروبارو پەنادارانی و پەنابەرانی شارەزاییش هەن، هەر پەوکەی پېسە کەسایەتیێ دلې چن نەفەرێنە هورچنیان پەی ئا پۊستەیە.
فەترەو سەرداریکەرڎەی حکومەتینە حۆلې فرېش دێ پەی ئانەی بارو ژیوای خەڵکی خاس بکەرۊن، چڼیین کۊمەکې وەڵینېش پەی هامسەرگیری گەنجانی و بیناکەرڎەی یانە و بانی و پرۊژە گولانا پېشکەشو خەڵکی کەردې. ئەچا سەردەمو دەسەڵاتو ئاڎینە ژیویایێ خاس هەرېمو پانیشتیش گېرتۆ، بېهەرمانی تاکو حەڼێوە عال وەستەرە، خەڵک خەریکو سەرمایەگوزاری و یاونای پروژەکا بې.
ئەنتۆنیۆ گۆتێرێس سەردارو ڕېکوزیاو نەتەوەیۊگېرتەکا، بەپاو بڕگەو 13ی پاڕەو دلېنەو (UNHCR)، بەفەرمی هورچنیەی دکتور بەرهەم ساڵح، سەرکۊمارو وەڵینو ئېراقیش پېسە کۊمسیاری باڵاو پەنابەرانو ڕېکوزیاکەی ئەشناسا کە پەی ماوەو پەڼج ساڵا ئا پۊستەیە ڕاوەبەرۊن جە تاریخو (01-01-2026) تاکو (31-12-2030).
ئەسعەد ڕەشید. [1]