دەقی ڕاگەیەندراوەکەی دەزگای ڕۆشنبیری و ڕاگەیاندنی #پارتی دیموکراتی کوردستان#:
وەک پیشەی هەمیشەیی، ستران عەبدوڵا، لەسەر پەلاماردانی پارتی بەردەوامە. ئەمجارەیان داستانی کۆڕێی پێشمەرگە دلێرەکانی کوردستانی کردووەتە بیانوو. لەمەیاندا تێکچوونی باڵانسی خۆی و تەگبیرکەرانی بەڕوونی وەک ڕۆژی ڕووناک دیارە. ئەم قسانەی دوایی ستران، لەسەر یەک گریمانەی خواروخێچ هەڵچنراون ، گوایە پارتی دەیەوێت دەستکەوت و ئازایەتی خەڵکی تر بۆ خۆی بەرێت!! گریمانەکە بوختانێکی ئاشکرایە بە دوێنێ و بەتەواوەتیش دژبەرە لەگەڵ وەزعی ڕاهینی کوردستاندا.
پێش ئەوەی وەڵامێکی سەرپێی ئه و گریمانە و لادیوارە خوارخێچ و پەلامارانە بدەینەوە، با جارێ لە خودی بیانووەکەوە دەست پێ بکەین؛ خەڵکی کوردستان و هەموو ئەوانەی کەمێک ئاگاداری ڕووداوەکانی کوردستانن دەزانن، داستانی کۆڕێ، پێشمەرگەکانی پارتی دیموکراتی کوردستان و سەرکردە و فەرماندەکانی پارتی بە هاوکاریی ژمارەیەک پێشمەرگەی لایەنەکانی دیکە و بە خوێنی ئاڵی شەهیدانی ئه و داستانە تۆمار کراوە. ئەمە مێژووە.. حەقیقەتی مێژوویی، بوختانی وەک ئەمانەی سترانی پێدەکرێت و، بۆ ڕازیکردنی ئەم و ئه و دەشێوێندرێت، وەلێ بە هیچ کلۆجێک کاریگەریی لەسەر کرۆکی حەقیقەت و ڕاستی ڕووداوەکان و لێکەوتەوە مێژووییەکانی نابێت.
پارتی، کە لە یەکەمین ڕۆژییەوە تا ئەمڕۆ، متمانەی زۆربەی خەڵکی کوردستان و نەتەوەی کوردی هەیە، چ پێویستیەکی بەوەیە خۆی لە کاری خەڵکی دیکە بکاتە خاوەن؟ پارتی، کە ئەم هەموو سەروەرییە مێژووییە و خاوەنی دەستکەوتی زۆری نیشتیمانیی و نەتەوەییە، چۆن دەچێتە ئەقڵەوە خۆی بکاتە خاوەنی کارە سەقەتەکانی خەڵکی دیکە؟ مێژووی کوردستان شاهیدە، پارتی هەمیشە دەستپێشخەری داکۆکی لە کوردستان و خەڵکەکەی بووە و سەربەستانە هەڵویستی وەرگرتووە، خۆیشی بە خاوەنیان زانیووە و دیفاعی لێکردوون و ئامادەی لێکەوتەوە و باجەکەشی بووە، ئەوە خەڵکی دیکەن پێویستیان بە چاوەڕێی ئەنجامەکان و لاساییکردنەوە و کڕین و فرۆشتن هەبووە و هەیە، ئاقیبەتی لاساییکردنەوە و سەوداکاریش دیارە و هەر ئەوەی لێ شین دەبێت کە ئەمڕۆ بەداخەوە لە شاری هەڵمەت و قوربانی، شاری #سلێمانی# دەیبینین... نسکۆی شۆڕشی ئەیلوول، بۆیە ڕوویدا تا کەرکووک و ناوچە کوردستانییەکانی ماددەی 140ی ئێستای دەستوور لەدەست نەدرێت، بەڵام خەڵکی دیکە چی کرد؟ هاتن خۆیان بە بەدیلی پارتی تەرح کرد، بەم خۆتەرحکردن و لاساییکردنەوەیە، خەنجەرێکی ژەهراویان لە جەستەی نیشتمان و خەڵکی ئه و ناوچانە و تەواوی نەتەوەی کورد دا کە برین و خەمێکی قووڵی نەتەوەیی لێ کەوتەوە.
ئاگا لێنەبوون عەیب نیە، عەیبە ئەوەیە ئاگات لێ نەبێت و وا نیشان بدەیت ئاگاداری. لە بەرنامەداڕشتنی ڕاپەڕیندا کە ستران هەوڵ دەدات لە سەروەرییەکی نەتەوەییەوە بچووکی بکاتەوە بۆ چالاکییەکی حزبیی! ڕەحمەتی مام جەلال، لە کوردستان نەبوو، کاتێکیش لە ڕێی پێشخابوورەوە گەڕایەوە بۆ کوردستان بەشی هەرە زۆری ڕاپەڕینی شارەکانی کوردستان تەواو بوبوون.
هەر لە باسی کەرکووک و ڕاپەڕینی ئاداری 1991ی خەڵکی کوردستاندا، شەهیدەکانی مەعسکەر خالید و ئازایەتی فەرماندە و پێشمەرگەکانی پارتی، شاهیدی بەشێکی کەم و حاشاهەڵنەگری سەروەرییەکانی پارتی و دیفاعکردنی بەردەوامی پارتین لە کەرکووک و تەواوی ئه و ناوچانه و ، ناڕاستیی ئیدیعاکانی ستران_یش دەردەخەن. وەک چۆن شەهیدان و بریندارانی پێشمەرگەکانی پارتی لە داستانی کۆڕێدا، گریمانە بێسەروبەرەکەی ستران و تەگبیرکەرانی تەفروتونا دەکەن.
چەواشەکاریی و ئیدیعا قەبەکانی ستران لەبارەی ڕاپەڕینەوە، لەباریاندا نیە، ڕاستییە مێژووییەکانی سەر ئەرز بگۆڕن.
ناوبراو، دەڵێ: دواڕۆژ هی ئێمەیە!! قسە و درووشم گوتنەوە ئاسانە، بەڵام بە چی دیارە داهاتوو هی ئێوەیە؟ بە کارە جوانەکانتان بەرانبەر خەڵکی سلێمانی و گەرمیان؟ بە تاڵانکردنی ڕووقایمانەی بانکەکانی سلێمانی و دزینی پارە و مووچەی فەرمانبەران و تەخسیسانی خزمەتگوزارییەکانی سلێمانی؟ بە سەرانە سەندن و ڕاووەدوونان و دەرپەڕاندنی سەرمایەدانی شار؟ بە دەستگوشین و باوەشپێداکردنی ئەوانەی مووشەک دەگرنە هەولێر؟ بە دەستخۆشی لێکردنی ئەوانەی درۆن دەنێرن تا ئارامی و سەقامگیریی کوردستان تێکبدەن و زەبر لە ژێرخانەکەی بدەن؟ بەڕاست ئەوەی زۆر بە ئاشکرا ئەم کارانە ئەنجام بدات و ئیدیعای خاوەندارێتی داهاتوو بکات، لە غەیری سووکسەرنجدانی خەڵکی کوردستان چ مانایەکی دیکەی هەیە؟
باسی وەزعی ڕاهین دەکات، بێئاگا لەوەی وەزعی ڕاهینی کوردستان بەرهەمی متمانەی خەڵکی کوردستانە، داهاتووش بە ئیدیعا و درووشمبازی و چەواشەکاریی و هەڵگێڕانەوەی ڕاستییە بەرجەستەکان، ناگۆڕێت. ئاخر وەکوچۆن وەزعی ڕاهین بەری متمانەی خەڵکی کوردستانە، داهاتوو و دواڕۆژیش، متمانەی هەمان ئه و خەڵکە بڕیاری لێ دەدات.
کاتێک پارتی دیموکراتی کوردستان شۆڕشی ڕاگەیاند، خۆ لەسەر ساحەی کوردستان خەڵکی دیکەش هەبوون، بەڵام ئەوە خەڵکی کوردستان و زۆربەی هەرە زۆری نەتەوەی کورد بوو کە متمانەیان بەخشیە سەرکردایەتی ئه و شۆڕشە. کەسانێک کە ئەوکات و ئێستاش متمانەی خەڵکی کوردستان و نەتەوەکەیان بەدەست نەهێنابێت، باشترە بەخۆیان و سیاسەت و هەڵوێستەکانیاندا بچنەوە نەک پەلاماری پارتی بدەن.
ئەوەی هەر تۆزقاڵێک سەری لە سیاسەت دەرچێت، دەرک بەوە دەکات؛ متمانەی خەڵک بە سیاسەتی ڕاستوڕەوان، خزمەتکردنی خەڵک بە دەست دێت. متمانەی خەڵک، پێویستی به و مرۆڤە گەورانەیە کە لە خەمی نیشتیمان و خەڵک و نەتەوەکەیاندان. خەڵک باوەڕ و متمانەی به و لایەن و سەرکردانەیە کە ڕۆحیان بەسەر هەڤاڵ و هاوکارەکانیانەوە دەردەچێت، نەک بە فۆتۆشوپ هەوڵی لەکەدارکردنیان و ناوزڕاندنیان بدەن، یان بێ مرووەتانە تا ئاستی مردن، برا و هەڤاڵەکانیان ژەهرخوارد بکەن...
لە کۆتاییدا، ئێمە دەزانین ستران عەبدوڵا و خەڵکانی وەک ئەو، لە یاری ماروپەیژەدا گەیشتوونەتە ئه و جێیەی ئێستایان، بۆیە پێیانوایە بە پەلاماردانی پارتی، جێیان قایمتر دەکەن، بەڵام مێژووی ململانێی سیاسی لە کوردستاندا ئه و ڕاستیەی سەلماندووە؛ ئەوەی بە پەیژەی پەلاماردانی پارتیدا هەڵگەڕابێت، ڕۆژێک، بە کلکی مارەکەدا تا خواری خوارەوە گلۆر بووەتەوە.
بەشی ڕۆژنامەوانیی دەزگای ڕۆشنبیری و ڕاگەیاندنی
پارتی دیموکراتی کوردستان
10ی نیسانی 2022[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!