وېنەی نامەردان خەندەش مەیۊ پېم...

میرزا ئۆلقاڎر جە نامێوەنە پەی دەسەڵاتدارێ بە نامۍ(میرزا حەیبەڵڵاو موستەوفی)، دمای شوکرانەی و تاریفکەردەیش، زەڕڕابی زەڕسەنج زەڕابخانەی هۊش، پەشتەو پەناو فەقیرا، داواو پۊشاکی وەهارانەیش چەنەکەرۊن، ویرش مەوزۊوە کە وەڵتەر پۊشاکی پایېزانە و زمسانانەش پەی کېیاستەن، ئیتر ئیسە ماچۊ: مونتەزیر خەڵات فەسڵی وەهارم.
ماچۊ: باڵاپۊشەکەم شڕ بییەن چوون وېم، وېنەی نامەردان خەندەش مەیۊ پېم، میرزا بە بەرۋستێوە ئەدەبی جوان داواش وەنەکەرۊن کە سەرەتاو فەسڵو وەهاریەن، خەریکەن داران بەرگی نۊ بپۊشان، با منیچ چەنیشان خەڵاتی تازە بپۊشوو.

ئاغەی مستەوفی مونشی دیوانان
سەدر سەف ‌نشین ئەجڵس خانان
دانای دووڕشناس نادرەی ئەییام
سەردار عەشرەت سوپای خاسوو عام
ڕای تەخت عیرفان تەمام تەی کەردە
پەی وە سەر مەنزڵ خەیاڵات بەردە
حەکیم ئازار گرۊی سەرداران
دەوابەخش دەرد خاتر پەڕخاران
ئوستاد حکمەت دەرس جالینووس
سەرمەشق ئاداب فردەوسی جە تووس
زەڕاب زەڕسەنج زەڕاب‌خانەی هۊش
دەریای کەماڵات بەحر جەیحوون جۊش
پەنای فەقیران بېنەوا و دەروېش
ئومېد عالەم، گرد بېگانە و خوېش
بەخشەندەی بېباک، میرحاتەم تەور
باش باڵا دەس بزورگان دەور
خۊ من غەیر جە تۊ هیچ کەسی نەداروون
دایېم لوتف تۊ وە چەم مەداروون
جەسارەت نەبۊ دیسان هەم جەنۊ
بەندە عەرزم هەن وە خاک پای تۊ
هەر تۊنی سەبەب زیندەگانی من
سەرمایەی شاڎیی و کامەرانی من
نانم جە ئاداب سفرە و بەخت تۊن
نگین بەختم جە پاتەخت تۊن
تەعامم نعمەت دەوڵەت‌خانەی تۊن
بەساتم هیمەت خەسرەوانەی تۊن
زەوقم جە زیڼەت بەزم بادەی تۊن
شەوقم جە شەوکەت خوڎا دادەی تۊن
جە ئەنگوشت پا، تا وە فەرق سەر
گرد هەر عەتای تۊن وە دانای داوەر
ڕەسم پاییز و زووسانم بەردەن
شوکرانەی لوتفت وەجا ئاوەردەن
مەبۊ مەعروز بام چوونکە ناچارم
مونتەزر خەڵات فەسڵ وەهارم
باڵا پۊشەکەم شڕبیەن چوون وېم
وېنەی نامەردان خەندەش مەیۊ پېم
تۆ ویت بزانە کەسێ ئەر بۊ کەس
غەیر جە خوڎا و تۊ، نیەن فەریاد ڕەس
مەبۊ هەر پەنا وە تۊ باوەروون
داد فەقیریم جە لای تۊ کەروون
چوون وە تۊ بەندەن دایېم وجوودم
بەخودڎا هەر وە تۊن، بوود و نەبوودم
ئەرجووم هەن جە لات مائیوسم نەکەی
مەحروم خزمەت لای دۊسم نەکەی
سەردار نیم‌ داشت باڵاپۊش وېت
ساترەی بەدەن حفز دۊش وېت
بکیانە پەرېم شای کەرەمداران
بزورگی کەری چوون بزورگ واران
وەختەن هەم جە لای شای کەرەم بېشۊ
داران گرد خەڵات بپۊشان جە نۊ
هەم چەنی داران وە یەک ئەندازە
منیچ بپوشوون خەڵات تازە
سا ئەر مایەی عومر نەبۊ پایەماڵ
هەتا کافیەن تاکە دووسێ ساڵ
یا شاە تا فەڵەک بۍستوون بەندەن
تا زەمین نە پشت گاو ماهی مەندەن
تا دنیا وەی ‌تەور لەیل و نەهار بۊ
ئاغەی مستۆفی هەر پایەدار بۊ
ڕۊ جە ڕۊ فېشتەر بوڵەند ئېقباڵ بۊ
عومرش زیاتەر جە عومری زاڵ بۊ
(قاڎر) تا زیندەن هەر دۊعاگۊش بۊ
هەر ساڵ مونتەزر خەڵات نۊش بۊ.[1]