بەڕێوەبەری پێشووی ئەنجوومەنی ئاساییشی ئەمریکا بۆ کاروباری ئێراق، هۆشداریی دەداتە هەرێمی کوردستان لە بەردەوامی ناکۆکییە حیزبییەکان و دەڵێت هەرێمی کوردستان دۆخێکی تایبەتی هەیە و دەبێت هەردوو حیزبە کوردییەکە ئەوە بزانن کە ئەوەی دەیکەین بۆ کوردستان باش نییە و کوردستان لاواز بووە، بەو ڕاستییەی هەردوو حیزب تادێت زیاتر لێک دووردەکەونەوە.
دۆگلاس ئۆلیڤانت، بەڕێوەبەری پێشووی ئەنجوومەنی ئاساییشی ئەمریکا بۆ کاروباری ئێراق لە کاتی بەشداریکردنی لە بەرنامەی ڕووداوی ئەمڕۆدا کە نوێنەر فاتیح پێشکێشی دەکات، باسی ناکۆکییە سیاسییەکانی هەرێمی کوردستان و ئاستەنگەکانی بەردەم چاکسازیی و یەکخستنی هێزەکانی پێشمەرگە دەکات و دەڵێت: ئەمریکا بێهیوا بووە لە ڕێکخستنی هێزەکانی پێشمەرگە لە چوارچێوەی وەزارەتی پێشمەرگە و وەرنەگرتنی فەرمان لە بەرپرسانی حیزبی.
دەقی هەڤپەیڤینەکە:
ڕووداو: ئێستا لە مانگی ئاداری 2023داین، ئەمە دەکاتە 20 ساڵی پاش جەنگی ئێراق، دەمەوێت لەم پرسیارەوە دەستپێبکەم، ئەو ئێراقەی ئەمڕۆ دەیبینیت، بەڕاست ئەمە پلانەکە بوو، ئەمە ئەو خواستە بوو کە ئەمریکا و ئۆپۆزیسیۆنی ئێراقی هەیانبوو بۆ ئێراق؟
دۆگلاس ئۆلیڤانت: لە ڕاستیدا، پێم وایە ڕوونە، بڕوانە، با ڕوونی بکەمەوە کە من بەشێک نەبووم لە بڕیارەکە و هیچ پەیوەندیم بە بڕیارەکەوە نەبوو بۆ داگیرکردنی ئێراق لە 2003، بەڵام پێم وایە ڕوونە کە بە زۆری، ئەمە ئەو ئێراقە نییە کە وێنا کرابوو، بۆیە پێم وایە پێویستە پرسیاری دووەم بکەین، ئایە ئەم ئێراقە باشترە ئەگەر وا نەبووایە؟ دەتوانیت ڕاشکاو بیت و بڵێیت، بێگومان ئەمە ئەو ئێراقە نییە کە کە وێنا کرا و ئەو ئێراقە نییە کە خەڵک هیوای بۆ دەخواست. هێشتاش لە ئاستی زۆر پێشبینیدا نییە، بەڵام ئەمە هێشتا لە ڕژێمی بەعس باشترە، بەشترە لە زۆر لە دراوسێکانی و هیوا هەیە پێشبکەوێت.
ڕووداو: چ هەڵەیەک ڕوویدا کە وایکرد ئەم ئێراقە نەبێتە ئەو ئێراقەی وێنا کرا، پێتوایە بۆ بەرپرسیارێتییەکە دەکرێت لۆمەی ئێراقییەکان خۆیان بکەین کە مەبەستم سیاسەتڤانانە، یان وڵاتانی دیکە وەکوو ئەمریکا و بەریتانیا و هاوپەیمانەکانیان کە هاتنە ئەم وڵاتە و ڕژێمەکەی سەدام حسێنیان خست؟
دۆگلاس ئۆلیڤانت: بێگومان لووتبەرزی لەو بیرۆکەیەدا لە وڵاتەکەی من و بەریتانیا و ئەوانی دیکەدا هەبوو کە دەتوانین حکومەتەکە بڕوخێنین و ئینجا کۆنترۆڵی لێکەوتەکانی بکەین. کاتێک حکومەتێک دەکەوێنیت زۆر زەحمەتە پێشبینی لێکەوتەکانی چۆن دەبن و ئێمەش ئەوەمان بە ڕێگە سەختەکە بۆ دەرکەوت. پێم وایە یەکێک لەو شتانەی کە هەموومان بە کەم بایەخ تەماشامان کرد و لێی تێنەگەیشتین لەو سەردەمە ئەوەبوو کە عێرق چەند زیانبەرکەوتوو بوو، نەک تەنیا ژێرخانەکەی؛ بەڵکوو خەڵکەکەشی لە متمانە و هەستکردن بە ئاساییش، ئەوەش بەهۆی چەندین ساڵی سزاکان، پێم وایە بە کەم تەماشای ئەوەمان کرد کە سزاکان تاوەکووچەند کۆمەڵگەی ئێراقی بە گشتی لەرزۆک کردووە، ئەمەش بە ڕاستی ڕۆڵی هەبوو لەوەی متمانە نەبێت؛ بەشێوەیەک کە حکومەت ڕووخێندرا خەڵک گەڕانەوە بۆ ئایین، نەوتەوە و هۆز و خێزان، ئەوان گەڕانەوە بۆ ئەم کۆمەڵە سەرەتاییانە، چونکە متمانە تێکشکابوو. خەڵکێکی زۆر دەڵێن کە تەنیا خەتای ئێراقییەکان بوو، بەڵام پێم وایە تەنیا ئێراقییەکان بن، بەڵکوو 12 ساڵی سزاکان بوون و 12 ساڵ سزا دەتوانێت ئەوە بە هەر خەڵکێک بکات.
ڕووداو: با بگەڕێینەوە بۆ ئێستا، حکومەتێکی نوێ هەیە لە ئێراق بە سەرۆکایەتیی محەمەد شیاع سوودانی، ئەم حکومەتە لە ڕوانگەی ئەمریکاوە چۆن تەماشا دەکرێت، وەکوو هاوپەیمان، هاوڕێ، یان هێشتا بە قۆناخی تاقیکردنەوەدا تێدەپەڕێت؟
دۆگلاس ئۆلیڤانت: پێم وایە لە قۆناخی تاقیکردنەوەدایە. پێشبینییەکان زۆر لاوازبوون، قسەکان و دیالۆگی گشتی لە ئەمریکا و لە هەندێ شوێنی دیکە لە ناوچەکە لە سەرەتای پێکهێنانی حکومەتەکە ئەوەش لە چوارچێوەی هاوئاهەنگی حیزبە پاڵپشتیکراوەکانی ئێرانن، بۆیە ئەم حکومەتەی کە دێت لەلایەن ئێرانەوە پاڵپشتی دەکرێت و دەیەوێت هەبوونی سەربازیی ئەمریکا نەهێڵێت، کارەسات دەبێت بۆ ئەمریکا و بەرژەوەندییەکانی، بەڵام لە جیاتی ئەوە، حکومەتەکەی محەمەد شیاع سوودانی تاوەکووئەمڕۆ، لانی کەم لە ڕاگەیێندراوەکانیدا بە گشتی میانڕۆ بووە. هیچ قسەیەک نییە لەبارەی دەرکردنی هێزەکانی ئەمریکا، وەکوو هەموومان دەزانین سەرۆکوەزیران سوودانی زووزوو باڵیۆزی ئەمریکا دەبینێت و وا دەردەکەوێت کە ڕاپۆرتی باش هەبن لەنێوان باڵیۆزخانەی ئەمریکا لە بەغدا لەگەڵ نووسینگەی سەرۆکوەزیران، بۆیە بەڵێ، پێم وایە بڕیاردان لەسەر ئەم حکومەتە هێشتا ماوە، چونکە تەنیا پێنج مانگە دەستبەکاربووە و هێشتا بەڕاستی کردارمان نییە تاوەکووحوکمی لەسەر بدەین، تەنیا قسە هەیە، بۆیە هێشتا زۆر زووە بۆ ئێمە کردار ببینین، هێچ کەس پێشبینی ئەوە لە حکومەتێک ناکات بتوانێت لە پێنج مانگدا هیچ کۆمەڵگەیەک بگۆڕێت، بەدیاریکراویش لە ئێراق، بۆیە کاتی زیاتر پێویستە و هێشتا کاتی حوکمدان ماوە، بەڵام دەتوانم بڵێم ئاماژە سەرەتاییەکان باشن و ئێمە بە وریاییەوە گەشبینین کە ڕەنگە ئەم حکومەتە کەمێک جیاواز بێت لە حکومەتەکانی پێشوو.
ڕووداو: ئەو ئاماژانە چین کە گەشبینن لەبارەیانەوە؟
دۆگلاس ئۆلیڤانت: پێم وایە ئەو شتانەن کە محەمەد شیاع سوودانی خۆی باسیان دەکات، باشترکردنی پەیوەندییەکان لەگەڵ دراوسێکان، شتێک بە دیاریکراوی خۆشحاڵین لەبارەیەوە دەستپێشخەرییەتی بۆ وڵاتانی کەنداو، بۆ ئۆردن و میسر، کە دەیەوێت هاوسەنگییەک لەنێو هەموو دراوسێکان ڕابگرێت و تەنیا تەماشای ڕۆژهەڵات نەکات، هەرچەندە ئەو پەیوەندییە گرنگە، بەڵام بەدیاریکراوی تیشکخستنەسەر ژێرخان و خزمەتگوزارییەکان پاش ئەوە بۆ چەندین ساڵ پشتگوێ خرا، کەرتی کارەبا و زیاتر پێشخستنی کەرتی نەوت، بەڕێوەبردنی ئاو.. وا دەردەکەوێت زۆر بایەخ بەو کەرتانە بدات، ئەمەش پێشبینی بۆ کەرتێکی تایبەتی هەمەچەشن و ئابوورییەکانی باشتر درووستدەکات، هەروەها ئابوورییەکانی ئێراق کە تەنیا پشت بە هەناردەکردنی نەوت نابەستێت.
ڕووداو: لە ئیدارەی پێشووی ئەمریکا، لە سەردەمی ئیدارەی ترەمپ، ئەولەوییەتی ئەمریکا لە ئێراق، ئێران بوو. هەروەکو مایک پۆمپیۆ لە پەڕتووکەکەیدا باسی دەکات، ئایا هەمان سیاسەت لە ئیدارەی بایدن ماوە؟
دۆگلاس ئۆلیڤانت: بێگومان ئێران هێشتا گەورەترین نیگەرانی ئەمریکایە لە ناوچەکە، بەڵام پێم وایە جیاوازی هەیە لە ئاستەکەدا، پێم وایە ئیدارەی ترەمپ ئێراقی وەکوو درێژکراوەی کێشەی ئێران دەبینی، بۆیە ئێراق وا تەماشا دەکرا لەو ڕوانگەیەی کە چۆن مامەڵە لەگەڵ ئێران بکەین. پێم وایە ئیدارەی بایدن کەمێک جیاوازتر دەیبینێت، پێموانییە جیاوازتر ئێران دەبینن، بەڵام هەوڵ دەدەن وەکوو خۆی تەماشای ئێراق بکەن بە شتەکانی خۆی، پێویستییەکانی خۆی، کێشەکانی خۆی و دەستپێشخەرییەکانی خۆی، لە جیاتی ئەوەی هەموو بکرێتە یەک چوارچێوەی کێشەوە.
ڕووداو: هەستێک لەم ناوچەیەدا هەیە کە ئەمریکا، با بڵێین بە شێوەیەک لە ناوچەکە دەکشێتەوە، پێتوایە ئەو هەستە لە هیچە وە سەرچاوەی گرتووە؟ ئەم هەستە لەنێو کورددا هەیە، لەنێو ئێراقییەکان و لەنێوان وڵاتانی کەنداویشدا هەیە، ئایا ئەمە بێبنەمایە؟
دۆگلاس ئۆلیڤانت: بنەما ڕێشەییەکان نەگۆڕاون، دەزانیت هێشتا ژمارەیەک زۆر هێزی ئەمریکی لە کۆنسوڵخانەی هەولێر هەن، یەک سەربازی ئەمریکیش لە بنکەی ئاسمانیی قەتەر نەکشاوەتەوە، کەس لە بنکەی دەریایی بەحرەین نەکشاوەتەوە، کەس لە بنکەی سەربازیی لە کوەیت نەکشاوەتەوە. هەموو ئەو ژێرخانەی ئەمریکا لەم ناوچەیە هەیەتی هێشتا لێرەن لە هەمان ئاستی پێشوودا بەگەڕخراوە. بەڵام ئایا ئەمریکا سەرنجی دیکەی هەیە؟ ئایە ئێستا زۆر سەرنجی لەسەر ئۆکراینا نییە؟ ئایا زۆر نیگەرانی چین نییە؟ بەڵێ بێگومان. ئایا سەرنجی کەمتریش بۆ هەموو ئەوانی دیکە هەیە؟ بێگومان. بەڵام ئایا ستراتیژی سەرەکی و هەڵوێست و ڕێچکەی بە ئاڕاستەی ناوچەکە گۆڕاوە، نەخێر. پێموانییە.
ڕووداو: بەڵام لە ئێراق وا هەستی پێدەکرێت. ڕاستە ئەمریکا نزیکەی 2500 سەربازیی لەسەر زەوی هەیە کە ڕاوێژ بە هێزە ئەمنییەکانی ئێراق دەکەن، هەروەها ڕاوێژ بە هێزەکانی پێشمەرگە، باڵیۆزخانەکەی بەغدا هێشتا گەورەترین باڵیۆزخانەی ئەمریکایە لە جیهان، کۆنسوڵخانەش لە هەولێر ماوە. بەڵام هەست بە ڕۆڵی کەمتر دەکرێت، بەتایبەتی ئەگەر تەماشای پێکهێنانی دوایین حکومەت بکەین، ئەمریکا لە حکومەتەکانی ڕابردوودا دەستێوەردانی ڕاستەوخۆی لە پێکهێنانی حکومەتدا هەبوو، بەڵام ئەم جارە لە حکومەتەکەی محەمەد شیاع سوودانی هەستی پێنەکرا، ئایا ئەوە کشانەوە نییە؟
دۆگلاس ئۆلیڤانت: پێموانییە ئەوە کشانەوە بێت، ئێراق خۆی دۆسیەیەکی تایبەتە. لە ئێراق بڕیارێکی زۆر دانایانەمان دا کە ئەنجامەکان بۆ ئێمە پێچەوانە دەبن؛ ئەگەر هەوڵبدەین دەست لە پێکهێنانی حکومەت وەربدەین. ئێمە هێشتا لێرەین، هێشتا چاودێری پڕۆسەکە دەکەین. ئەگەر پێمانوابێت شتەکان دەچنە دەرەوەی چوارچێوەی پڕۆسەکە؛ ئەوکات نیگەرانی خۆمان لەبارەیەوە نیشان دەدەین. پێم وایە گەیشتینە ئەو ئەنجامگیرییەی ئەو جۆرە دەستوەردانە لە پڕۆسەکە، کە بێگومان ئێرانییەکانیشی ناچارکرد ئەوانیش بێن دەستوەردان لە پڕۆسەکەدا بکەن، ئەنجامەکانی پێچەوانە بوون، پێم وایە لە پێکهێنانی دوایین حکومەتدا بینیت نەک تەنیا ئەمریکا ڕێگەی دا ئێراقییەکان خۆیان چارەسەر بدۆزنەوە، بەڵکوو ئێرانییەکانیش بە زۆری ڕێگەیان دا ئێراقییەکان خۆیان چارەسەرێک بدۆزنەوە. بۆیە ئەوە کەمتر ناودەنێم کشانەوە و زیاتر ناوی دەنێم پاشەکشە بۆ ئەوەی دامەزراوەکان کار بکەن. بەو کارەش دەزانین ئەکتەرەکانی دیکەش دەوەستێنین، ئەکتەری دەرەکی کە دووربکەونەوە لە پڕۆسەکە و ڕێگە بدەن کار بکات.
ڕووداو: کورد لە چەندین بواردا پشت بە ئەمریکا و هاوپەیمانەکانی دەبەستێت، یەکێک لەوانە پاڵپشتیکردنی پێشمەرگەیە کە بێگومان خۆت بە باشی ئاگاداریت. لە مەشقپێکردن و پاڵپشتی داراییش، ئەمریکا پێشبینی چاکسازی لە پێشمەرگە دەکات؟ ئەو چاکسازییە چەندین ساڵە داندراوە و هێشتا تەواو نەبووە، پێتوایە کورد تاوەکووکەی دەتوانێت پشت بە پاڵپشتییەکانی ئەمریکا ببەستێت؟ ئایا هیچ مەرجێک هەیە لەلایەن ئەمریکاوە لەبەرانبەر ئەو پاڵپشتییە؟
دۆگلاس ئۆلیڤانت: پێم وایە مەرجی ئەمریکا یەکخستنەوەی هێزەکانی پێشمەرگەیە لەژێر دەسەڵاتی وەزارەتی پێشمەرگە، شاراوە نییە کە هێزەکانی پێشمەرگە هێشتا زیاتر میلیشیای حیزبن، بەڕاستی هیچ کەس نکۆڵی لەوە ناکات. ئەمریکا لەمبارەیەوە کراوەیە، ئەمە پرسێکی زۆرزۆر کراوە و ڕاشکاوە کە ئەمریکا زۆر بێهیوایە.
ڕووداو: بێهیوایە؟
دۆگلاس ئۆلیڤانت: بێهیوایە کە ئێمە هەموومان دەزانین کە لە کۆتاییدا فەرماندەی یەکەکانی پێشمەرگە وەڵامی ڕۆژهەڵات و ڕۆژاوا دەدەنەوە نەک وەزیری پێشمەرگە، هەموومان لەوە تێدەگەین، ئەوە بێهیوامان دەکات. هیوادارین هێزێکی سەربازیی ڕێکخراو ببینین کە وەڵامدەری سەرکردە سیاسییە هەڵبژێردراوە شەرعییەکان بێت؛ نەک ئەو حیزبەی دایناون و پڕچەکی کردوون. با تەنیا هێزەکە پڕۆفیشناڵ بکەین و پێشمەرگە وەکوو میلیشیای حیزب لە ڕیشەوە بگۆڕین، هیچ هەڵەیەکیش لەوەدا نییە، کاتێک هەبوو کە ئەوە پێویست بوو، بەڵام بۆ ئێستا بیانگۆڕن بۆ هێزێکی سەربازیی پڕۆفیشناڵ کە تەنیا وەڵامدەری زنجیرەیەک فەرماندەیی بێت و پەیوەندی تەلەفۆنیی و فەرمان لە سەرکردەی حیزبەوە وەرنەگرێت کە لەو زنجیرە فەرماندەییەدا نین. پێمانوانییە ئەوە بەو خێراییەی کە پێویستە ڕوودەدات.
ڕووداو: ئەو بێهیواییە، چ واتایەکی هەیە ئەگەر وەریبگێڕین بۆ واقع و سەر زەوی لە ڕووی هاوئەهانگی نێوان ئەمریکا و پێشمەرگە، یان وەزارەتی پێشمەرگە؟
دۆگلاس ئۆلیڤانت: ئایا نرخی ئەوە شتێکی بەرجەستە دەبێت لە داهاتوویەکی نزیکدا؟ نەخێر. ژمارەی ڕاوێژکارەکانمان کەمناکەینەوە، ئەو پارەیە کەمناکەینەوە کە بۆ مووچەی پێشمەرگە دابینی دەکەین، ئەو کەلوپەلانە کەمناکەینەوە کە دابینیان دەکەین. بەڵام دەبێت لەوە تێبگەن کە نەک لەگەڵ هەر ڕۆژێک، بەڵام هەر ساڵێکدا کە تێدەپەڕێت بەبێ بینینی بەرەوپێشچوونی بەرچاو لە یەکخستنی پێشمەرگە، ئێوە کاریگەریی سیاسی لە واشنتن لەدەستدەدەن. ئارامگرتنمان بۆ تاهەتایی نامێنێتەوە و ئەگەر تاوەکوو10 ساڵی دیکەش پەرەوپێشچوون نەبیندرێت و پێشمەرگە هەر وەکوو دڵسۆزی حیزب ببینرێت نەک وەزارەتی پێشمەرگە، ئەوکات ڕەنگە کێشەتان هەبێت.
ڕووداو: هۆکارەکە چییە پێتوایە نێوخۆییە لەبەر ئەوەی ویستی سیاسی نییە لەلایەن حیزبەکانەوە، یان هەژموونی هەرێمایەتیش هەیە کە هەندێک کەس باسی دەکەن؟
دۆگلاس ئۆلیڤانت: هەمیشە هەژموونی هەرێمایەتی لە ناوچەکەدا هەبووە، بەڵام لۆمەکە بە شێوەیەکی سەرەکی دەکەوێتە سەر هەردوو حیزبەکە، ئەوان سەرنجیان لەسەر ئەوەیە ئەو پێشمەرگانەی لە ناوچەکانی خۆیان و سەرکردەکانی خۆیانەوە دێن، لەژێر کۆنترۆڵی خۆیان بهێڵنەوە. زەحمەتە دەستبەرداری ئەو کۆنترۆڵە ببیت و بڵێیت چیتر پێشمەرگە وەڵامی سەرکردەکانی حیزب ناداتەوە بەڵکوو تەنیا وەڵامی بەرپرسە دەستنیشانکراوە شەرعییەکانی وەزارەتی پێشمەرگە و ئەو زنجیرە فەرماندەییە دەداتەوە. ئەوە گۆڕانکارییەکی گەورەیە بکرێت، بۆیە من لەگەڵ هەردوولادا هاوسۆزم، بەڵام نەخێر پێم وایە کێشەکە لە حیزبەکاندایە و ئەمەش بێگومان زەحمەتە کاتێک حیزبەکان لە ململانێدان لەگەڵ یەکتر وەکوو ئەوەی ئەمڕۆ بە ڕوونی دەیبینین، نهێنی ئاشکرا ناکەم لێرە و دەزانیت کە پەیوەندییەکان لەنێوان حیزبەکاندا گرژە هەروەکو چۆن وابووە بۆ ماوەیەکی زۆر.
ڕووداو: بەم دواییانە پەیوەندییەکان و ڕەوشەکە لە ڕاستیدا خراپتر بوو. نەک تەنیا خەڵک گەشبین نین؛ بەڵکوو سەرکردەکانیش لەنێوان حیزبەکاندا گەشبین نین. چۆن لەمە دەڕوانن؟ پێتوایە پێشبینی ئەوە بکرێت کە ئەمریکا گوشاری زیاتر بکات؟
دۆگلاس ئۆلیڤانت: پێم وایە شتێکی وا هەبێت ئەمریکا بتوانێت بیکات لە ڕووی گوشارەوە، دەزانین ناتوانین وا بکەین هەردوو حیزبکە حەز بە یەکتر بکەن، دەزانیت سەرۆک بایدن ناتوانێت وابکات هەردوو حیزبەکە یەکویست بن، دەبێت ئەمە لەنێوخۆوە بکرێت. بەڵام پێم وایە کە دەبێت هەردوو حیزبە کوردییەکە ئەوە بزانن کە ئەوەی دەیکەن بۆ کوردستان باش نییە و کوردستان لاواز بووە بەو ڕاستییەی هەردوو حیزب زیاتر و زیاتر و زیاتر لەیەک دووردەکەونەوە. کوردستان بە دۆخە لەرزۆکەکەیەوە لە جیهاندا، جۆرێکە لە دۆخێکی دەگمەن کە وا دەخوازێت هەردوو حیزبەکە دەست لەنێو دەست کاربکەن و بەرەیەکی یەکگرتوو پێشکێش بکەن ئەگەر دەیانەوێت ئەو دۆخەیان بمێنێ کە لە 20 ساڵی ڕابردوودا هەیانبووە. ئەگەر هەر ببینین هەردوو حیزبەکە لەیەکتر دووردەکەونەوە، لانی کەم بۆ من، ئەمە قسەی خۆمە نەک سیاسەتی ئەمریکا، بەڵام بۆ من زەحمەتە ببینم کوردستان چۆن دەتوانێت پێکەوە بمێنێتەوە ئەگەر هەردوو حیزبەکە بەردەوام زیاتر و زیاتر لەیەک دووربکەونەوە.
ڕووداو: لەبارەی سیاسەتی ئەمریکا لە ئێراق، ئیدارەی پێشوو باسی لە ئەکتەرە نادەوڵەتییەکان دەکرد، بە واتای هێزی وەکوو پێشمەرگە، هەسەدە لە ڕۆژاوا. ئایا ئیدارەی بایدن هەمان سیاسەتی هەیە لە ناوچەکە؟ پێتوایە لە سیاسەتی دەرەوەی بایدندا لە ڕۆژهەڵاتی ناوەڕاست ئەکتەر نەدەوڵەتییەکان ڕۆڵیان هەبێ؟
دۆگلاس ئۆلیڤانت: هەسەدە هەڵاوێردێکی دیارە و قبووڵکراون. پێم وایە یاسای گشتییەکە ئەوەیە کە دەمانەوێت لەگەڵ دەوڵەتدا مامەڵە بکەین و هێزەکانی دەوڵەت هێشتا سیاسەتی ئێمەیە. بە گەڕانەوە بۆ کوردستان و پێشمەرگە، پێم وایە ئەمە کێشەکەی ئێوەیە، هەرچەند پێشمەرگە زیاتر لە میلیشیای حیزب بچێت و کەمتر لە هێزێکی سەربازیی فەرمی حکومەتی هەرێمی کوردستان بچێت، ئەوە وادەکات بە کێشەتر بێت لە پێشمەرگەیەک کە بە تەواوی تێکەڵکراوە و سەربە وەزارەتی پێشمەرگەیە، ئەوە بە هێزێکی نادەوڵەتی ناکات، بۆیە ئەمە کێشەکە دەبێت. بێگومان بەغداش هەمان کێشەی هەیە لەگەڵ حەشد و چۆن مامەڵە لەگەڵ ئەو کێشەیە دەکەن، بۆیە ئەمە تەنیا کێشەیەکی کورد نییە، لوبنان هەمان کێشەی هەیە لەگەڵ حیزبوڵڵا. بۆیە کێشە هەیە لە سەرانسەری ناوچەکە. بەڵام بە قسەکردن لەبارەی ئێرە کە من لە کوردستان دانیشتووم، کێشەی ڕاستەوخۆ بۆ کورد پێشمەرگە و هێزە ئەمنییەکانی دیکەیە کە دڵنیایی بدرێت کە دەهێندرێنە ژێر کۆنترۆڵی وەزارەتی پەیوەندیدار نەک بەشێک لە دەزگایەکی حیزب.
ڕووداو: باسی حەشدی شەعبیت کرد. لەوکاتەوەی حکومەتی نوێی ئێراق دەستبەکاربووە هێرشی مووشەکی نابینین کە باڵیۆزخانەی ئەمریکا و بەرژەوەندییەکانی لە ئێراق بکاتە ئامانج، چی ڕوویداوە؟ ئایە جۆرێک لە ڕێککەوتنێک هەیە کە خەڵک نایزانێت؟ چی ڕوویدا کە هێرشەکانی ڕاگرت؟
دۆگلاس ئۆلیڤانت: باس لە پەیمانێک دەکرێت کە لەلایەن حەشدەوە بە ئەمریکییەکان و کۆمەڵگەی نێودەوڵەتی دراوە، ڕوون نییە بە دیاریکراوی مەرجەکانی ئەو پەیمانە چین و ئایە پەیمانێکی دیاریکراوە یان کاتییە، ڕوون نییە چ کارێکی ئەمریکییەکان و لایەنەکانی دیکە دەکرێت ئەو پەیمانە بشکێنێت، بۆیە زۆر نافەرمییە. بەڵام لەگەڵ ئەوەشدا وا دەردەکەوێت کە کارایە. دەزانیت تاکە مووشەک لە ماوەی ساڵی ڕابردوودا لە بەغدا تێگیراوە ئەوە بوو کە ئاڕاستەی باڵەخانەی پەڕڵەمان کرا لە کاتی پێکهێنانی حکومەت، کە پێمانوانییە لەلایەن حەشدەوە ئاڕاستە کرابێت. بۆیە بەڵێ، شتێکی جیاواز لە بەغدا هەیە و بێگومان ئەمەش بەشێکە لەوەی کە وادەکات ڕۆژاوا هەستێکی باشیان لەبارەی حکومەتەکەی سوودانییەوە هەبێت. ئەگەر بتوانن ئەو ئەکتەرە نادەوڵەتییانە لەژێر چاودێریدا بهێڵنەوە و هەڕەشەش لە هەبوونی ڕۆژاواییەکان نەکەن، ئەوە ڕێگە دەدات شتەکان بەرەوپێش بچن و پەیوەندییەکان قووڵتربن. ئەوە وادەکات بازرگانییەکانی ڕۆژاوا جیددیتر لەبارەی ئێراق بیربکەنەوە، ڕێگە و جۆری زیاتری ئاڵوگۆڕ دەدات، هەموو شتێک دەکرێت کاتێک ڕەوشی ئەمنی باشترە.
ڕووداو: سوپاس بەڕێز دۆگلاس ئۆلیڤانت
دۆگلاس ئۆلیڤانت: زۆر خۆشحاڵبووم، زۆر سوپاس.[1]