$باشووری کوردستان$
- شەوی ڕابردوو، هەلیکوپتەرەکانی دەوڵەتی داگیرکەری تورک ناوچەی دووپشکی سەر بە هەرێمی حەفتانینیان بوردومان کرد.[1]
- ژمارەیەک هاوڵاتی مەدەنی بەرەبەیانی ئەمرۆ ڕویانکردبوویە ناوچە و کوێستانەکانی چیای شەکیف بۆ مەبەستی کۆکردنەوەی گژوگیا، بەڵام تۆپپخانەکانی دەوڵەتی داگیرکەری تورک ئەو هاوڵاتیانەی تۆپباران کرد و لە ئەنجامدا ژنێک بریندار بوو.[1]
- وەزارەتی تەندروستیی حکومەتی هەرێمی کوردستان ئاماری 24 کاژێری ڕابردووی تایبەت بە ڤایرۆسی #کۆرۆنا#ی بڵاوکردەوە و ڕایگەیاندووە، لەو ماوەیەدا 309 تووشبووی دیکەی کۆرۆنا دەستنیشانکراون، 13 تووشبوو گیانیان لەدەستداوە و 115 تووشبووش چاکبوونەتەوە.[4]
- وەزیری گواستنەوە و گەیاندنی حکومەتی هەرێمی کوردستان، ئانۆ جەوهەر، ڕایگەیاند، لە ڕۆژی (01-08-2020)ەوە لە هەردوو فڕۆکەخانەی #هەولێر# و #سلێمانی# دەست بە گەشتە ئاسمانییەکان دەکرێتەوە.[2]
- ئەمڕۆ، دوای کۆبونەوەی لەگەڵ #مستەفا کازمی#، سەرۆک وەزیرانی عێراق، #شاسوار عەبدولواحید#، سەرۆکی جوڵانەوەی #نەوەی نوێ#، ڕایگەیاند: دوای جەژن بەغدا مانگانە 300 بۆ 400 ملیار دینار بۆ هەرێم دەنێرێت.[3]
$دەرەوەی کوردستان$
- پەرلەمانی تورکیا پرۆژە یاسایەکی پەسەندکرد کە ڕێگا بە حکومەت دەدات، کۆنترۆڵی تۆڕە کۆمەڵایەتییەکان بکات. بەگوێرەی یاساکە، دەبێت نوێنەرانی کۆمپانیاکانی فەیسبووک و تویتەر لە تورکیا هەبن و هەر بابەتێک کە حکومەت بە نەگونجاوی بزانێت بیسڕنەوە، دەنا ڕووبەڕووی سزا دەبنەوە. ئەو یاسایە لە لایەن ئەندام پەرلەمانانی AKP و MHP دەنگی بۆ درا و ناڕەزایی زۆری دروست کردووە. ڕێکخراوەکانی مافی مرۆڤ، ڕەخنە لەو یاسایە دەگرن و بە دژی ئازادی ڕادەربڕین ناوی دەبەن.[2]
- فەرماندەی لیوای 29ی فیرقەی 7ی هێزی زەمینیی سوپای عێراق و ئەفسەرێک بە پلەی مولازمی یەکەم لە ڕووبەڕووبوونەوەیەکی چەکدارانی #داعش#دا کوژران.[3]
- حکومەتی ئەمریکا 14 کەسایەتی و لایەن و کۆمپانیای سووری خستە لیستی سزاکانەوە و ئاماژە بەوەشدەکات، گوشارەکان لەسەر دیمەشق بەردەوام دەبن تاوەکو لەسەر بنچینەی بڕیاری 2254ی ئەنجوومەنی ئاسایشی نەتەوەیەکگرتووەکان قەیرانی وڵات چارەسەر دەکات.[4]

ئەمڕۆ چوارشەممە ژووری ئۆپەراسیۆنی ڕاپەرین کۆبووەوە و نۆ بڕیار و ڕێنمایی نوێی بۆ ڕۆژانی جەژنی قوربان دەرکرد.
بەپێی نووسراوێکی ژووری ئۆپەراسیۆنی ئیدارەی ڕاپەرین بۆ ڕووبەرووبوونەوەی پەتای کۆڕۆنا بە واژۆی هیوا قەرەنی، سەرپەرشتیاری ئیدارەی ڕاپەرین ئەمڕۆ چوارشەممە لە دیوانی ئیدارەی ڕاپەرین ئەندامانی ژووری ئۆپەراسیۆن بۆ ڕووبەرووبوونەوەی پەتای کۆڕۆنا سەبارەت بە ڕێکار و ئامادەکاریی بۆ ڕۆژانی جەژنی قوربان و میکانیزمەکانی جێبەجێکردنی بەیانی ژمارە 44ی وەزارەتی ناوخۆ کۆبوونەوەیەکی تایبەتی کرد.
بەپێی نووسراوەکە ژووری ئۆپەراسیۆنی ئیدارەی ڕاپەڕین نۆ بڕیاری سەبارەت بە ڕۆژانی جەژن دەرکردووە، ئەوانیش:
یەکەم: سەرجەم بڕگە و خاڵەکانی بەیانی ژمارە 44 ی وەزارەتی ناوخۆ تایبەت بە داخستن و قەدەغەی کرانەوەی شوێنەکان جێبەجێبکرێن
دووەم: داوا لە مامۆستایانی ئاینیی دەکەین هەروەک ڕابردوو ئیسپاتیان کرد کە هاوکارێکی بێدرێغی ئیدارەی ناوچەکەن لە جێبەجێکردنی ڕێنماییی و بڕیارەکانی پەیوەست بە بەرژەوەندیی گشتی هاوڵاتیان و تەندروستی خەڵکەوە، بە هەمان گیانی دڵسۆزی و بەرپرسیارێتییەوە هاوکارمان بن لە ڕێنوێنی و هۆشیارکردنەوەی هاوڵاتیان بۆ پابەندبوونیان بە ڕێکارەکانی خۆپارێزی و تەندروستییەوە لە ڕۆژانی جەژندا و خۆبەدوورگرتن لە هەموو چەشنە کۆڕ و کۆبوونەوەیەک کە ببێتە هۆی قەرەباڵغی و جەنجاڵیی و بەریەککەوتنی ناپێویست وەک مەراسیمەکانی پرسە و سەرقەبران و نوێژی جەژن.
سێیەم: بەڕێوەبەرایەتی ئاوی ڕاپەرین ئەوپەڕی هەوڵەکانیان چڕدەکەنەوە تاوەکو لە ڕۆژانی جەژن و پشوودا ئاوی خواردنەوە بۆ سەرجەم شار و شارۆچکەکان دابین بکەن و بۆ ئەمەش میکانیزمی گونجاو و کاری پێویست دەکەن.
چوارەم: بەڕێوەبەرایەتیی گشتیی تەندروستیی ڕاپەرین و بەڕێوەبەرایەتیی کارەبای ڕاپەرین میکانیزمی گونجاو بۆ ئێشکگریی ڕۆژانی جەژن و پشوو دادەنێن بۆ بەردەوامیی خزمەتگوزارییەکانیان.
پێنجەم: بەڕێوەبەرایەتی شارەوانییەکان و کۆمپانیای پاککردنەوە بۆ پاکڕاگرتنی شار و شارۆچکەکان و پاککردنەوەی پاشماوەی (قوربانی) کاری خۆیان دەکەن.
شەشەم: بەڕێوەبەرایەتییەکانی پۆلیس، ئاسایش، هاتووچۆ و سەرجەم دامودەزگا ئەمنییەکان خشتەی ئەرک و پلانی کاری ڕۆژانی جەژنیان بە تۆکمەیی جێبەجێ دەکەن.
حەوتەم: بەڕێوەبەرایەتیی بەرگریی شارستانیی ڕاپەرین تیمەکانی غەواس و دەربازکردن ئامادە دەکەن لە بەنداوی سەروچاوە و دەربەند.
هەشتەم: داوا لە سەرجەم هاوڵاتیانی خۆشەویست دەکەین بۆ پاراستنی تەندروستی خۆیان، خزم و کەسوکاریان بە هەموو شێوەیەک خۆیان لە سەردان و هاتووچۆ و هەرچەشنە بەریەککەوتن و قەرەباڵغییەک بەدوور بگرن.
نۆیەم: سەرجەم یەکە کارگێڕی و بەڕێوەبەرایەتی و فەرمانگەکانی سنووری ئیدارەی ڕاپەڕین ئاگادار دەکرێنەوە کە لەدوای پشووی جەژن ئه و لیژنەیەی لە بەیانی ژمارە 44ی وەزارەتی ناوخۆدا ئاماژەی پێدراوە کارا دەکرێت بەمەبەستی چاودێریی ڕەوشی جێبەجێکردنی ڕێنماییە تەندروستییەکان لە فەرمانگەکاندا و پێویستە ئامادەکاریی تەواو بکەن.[1]