- چەکدارانی‌ داعش لە سێ قۆڵەوە هێرشیان کردە سەر سەنگەرەکانی‌ پێشمەرگە لە میحوەری‌ باشیک، بەڵام لە لایەن هێزەکانی‌ پێشمەرگە و فڕۆکەجەنگییەکانی هاوپەیمانانەوە هێرشەکەی‌ داعش تێکشکا و 17 چەکداریان کوژرا.
- لە ڕۆژی دووەمی کۆنگرەی سێیەمی کۆمەڵی ئیسلامیی کوردستان لە هەولێر، عەلی باپیر وەک ئەمیر کۆمەڵ بۆ سێیەم جار هەڵبژێردرایەوە.
- ئاگر لە ناوەندێکی‌ تەندروستی‌ شاری قامیشلۆ دەکەوێتەوە و بەپێی‌ ئامارە سەرەتاییەکان 23 کەس لەو ڕووداوەدا گیانیان لەدەست داوە.
- سەرۆکی لیژنەی دارایی لە پەرلەمانی کوردستان ڕایدەگەیەنێت، کۆمپانیایەکی گەورەی جیهانی ڕەزامەندی دەربڕیوە مانگانە بایی 900 ملیۆن دۆلار نەوت لە هەرێم بکرێت، بەم پلانەش لە مانگی تەمموزەوە دەتوانرێت کێشەی مووچە و بودجە چارەسەر ببێت، هاوکات هەر ئەمڕۆ و لە کۆبوونەوەی ئەنجومەنی وەزیراندا، سەرۆکی حکومەتی هەرێم هەواڵێکی خۆشی دایە هاوڵاتیان بەوەی هەرێم لەم قەیرانە داراییە ڕزگاری دەبێت.

بەناوی خودای مەزن و دلۆڤان
بەڕێزان جێگرانی سکرتێری گشتیی و ئەندامانی مەکتەبی سیاسی و سەرکردایەتیی یەکێتیی نیشتیمانیی کوردستان
بە بۆنەی چلەمین ساڵیادی دامەزراندنی یەکێتی نیشتیمانیی کوردستان گەرمترین پیرۆزبایی ئاراستەی ئێوە و کادیر و ئەندام و لایەنگرانی یەکێتیی نیشتیمانیی کوردستان دەکەم. یادکردنەوەی دامەزراندنی یەکێتی لە کاتێکدایە کە گەلەکەمان لەبەردەم تەحەدیاتی گەورەدایە و لە هەمانکاتیشدا دەرفەتی کەموێنە بۆ پێشخستنی دۆزی ڕەوای گەلەکەمان هاتووەتە ئاراوە. باشترین زامنی ڕووبەڕووبوونەوەی هەڕەشە و تەحەدییاتی بەردەم خەڵکی کوردستانیش قووڵکردنەوەی یەکڕیزی و گیانی تەبایی و برایەتیی نێوان لایەنە سیاسییەکانە. مێژووی خەباتی ڕزگاریخوازی گەلەکەمان بەڕوونی پێشان دەدات کە تەنیا لە کاتی یەکڕیزی و تەباییدا دەستکەوتی مەزن بۆ خەڵکی کوردستان مسۆگەر کراوە. بە پێچەوانەیشەوە هەمیشە دوژمنانی گەلی کوردستان سوودیان لە دووبەرەکی و پەرتەوازەیی نێو بزووتنەوەی ڕزگاریخوازی کوردستان بینیوە.
لە سایەی خوێنی پاکی شەهیدانمان و سەرکەوتنەکانی پێشمەرگە لەبەرانبەر تیرۆریستاندا و هەروەها بە لەبەرچاوگرتنی ئەو گۆڕانکارییانەی لە ناوچەکە و جیهاندا لە ئارادان، پێگە و کاریگەریی کوردستان لە ئاستێکی زۆر بەرزدایە و جیهان بە چاوی ستاییشەوە سەیری گەلی کوردستان دەکات. ئەوەیان دەرفەتێکی مەزنە بۆ ئەوەی بە هیمەتی هەموو لایەک، گەلەکەمان لە هەڕەشەکان دوور بکەینەوە و لە چوارچێوەی مافی چارەی خۆنووسین دۆزی ڕەوای گەلەکەمان بەرەو پێشەوە ببەین.
یەکێتیی نیشتیمانیی کوردستان لە خەباتی خۆیدا قوربانیی زۆری لەڕێگەی ڕزگاریی گەلی کوردستان داوە و لە گشت قۆناغەکاندا ڕۆڵێکی بەرچاو و نیشتیمانپەروەرانەی گێڕاوە. گەلی کوردستان ئەو چاوەڕوانییەی لە یەکێتی نیشتیمانی کوردستان و تێکڕای حزبە خەباتگێڕ و تێکۆشەرەکانی دیکەی کوردستان هەیە کە لەو قۆناغە چارەنوسسازی ئێستایشدا دەستلەناودەست و یەکڕیز بن بۆ ئەوەی داهاتوویەکی گەش بۆ گەلەکەمان بنیات بنێین.
بە پێویستی دەزانم لەو بۆنەیەدا هیوای چاکبوونەوە بۆ برای بەڕێزم جەنابی مام جەلال و ئومێدی سەرکەوتنیش بۆ هەموو ئەندام و هەوادارانی یەکێتیی بخوازم.
مەسعود بارزانی
سەرۆکی هەرێمی کوردستان
31ـی 5ـی 2015