پەڕڵەمانتارانی پارتی لە پەڕڵەمانی کوردستان ڕایانگەیاند، مووچەی پەڕڵەمانتاری ڕەتدەکەینەوە و خانەنشین دەبین، بەوەش پارتی بەشێوەیەکی فەرمی کارکردنی بە بڕیارەکانی دادگای فیدڕاڵی ڕاگەیاند.
لە نووسراوێکی فراکسیۆنی پارتی لە پەڕڵەمانی کوردستاندا کە بۆ سەرۆکی دیوانی پەڕڵەمانی کوردستانی ناردووە، هاتووە، ئەرکی پەڕڵەمانیمان لە خولی پێنجەمی پەڕڵەمانی کوردستان کۆتایی پێهێنا، لە ڕێکەوتی #01-06-2023# ەوە مووچەی پەڕڵەمانتاری ڕەت دەکەینەوە.

فراکسیۆنی پارتی لە نووسراوەکەدا دەڵێت: داوا دەکەین مووچەی مانگی 6ی2023، بۆ ئەندامانی فراکسیۆنی پارتی و نوێنەرمان لە دەستەی سەرۆکایەتی پەڕڵەمان (#هێمن هەورامی#) نەبەسترێت.
پارتی بەو بڕیارە بەشێوەیەکی فەرمی کارکردنی بە بڕیارەکانی دادگای فیدڕاڵی ڕاگەیاند.
ڕۆژی سێشەممە، 30ی ئایاری 2023، دادگای باڵای فیدراڵی ئێراق لە بارەی درێژکردنەوەی تەمەنی پەڕڵەمانی کوردستان بڕیاریدا و ڕایگەیاند، درێژکردنەوەکە نادەستووری و نایاساییە و هەر بڕیار و یاسایەکیش لەو ماوەیەدا لە پەڕڵەمانی هەرێمی کوردستانی ئێراق دەرچووە، لە ڕووی دەستوورییەوە پووچەڵە. [1]

18ی مانگ پارتی ئامادەیە، ئەی یەکێتی؟
هێڤیدار ئەحمەد
11-02-2019

ڕۆژی 02-10-2014 گەرمەی شەڕی دژی داعش بوو، من لەو ڕۆژەدا لەسەر (کەشتیی بوش) بووم لە کەنداو، فڕۆکەکانی ئەمریکا بۆ لێدانی داعش لەسەر ئەو کەشتییە دەفڕین. تاوەکوو گەیشتمە سەر کەشتییەکە، ئەدمیڕال ئادەم میللەر، فەرماندەی یەکەمی کەشتیگەلی پێنجەمی دەریاوانی ئەمریکا کە لەسەر کەشتییەکە بوو، پێیگوتم پێش ئەوەی بڕیار بدەین بەشدار بین لە لێدانی داعش، ڕاپۆرتێک لەلایەن حکومەتی ئەمریکاوە بۆ ئێمە هات، تێیدا باسی ئەوەی کرد کە لە هەرێمی کوردستان، دیموکراسی هەیە و هەر چوار ساڵ جارێ هەڵبژاردن دەکرێ و دەستاو دەستکردنی دەسەڵات هەیە و... ئەدمیڕاڵەکە بە منی گوت لەسەر ئەم بنەمایە هاتین و بەرگریمان لە کوردستان کرد.
بایەخی پەڕڵەمانی کوردستان
هەموو ڕێگەکانی دیموکراسی بە پەڕڵەماندا تێدەپەڕن، شەرعییەتدان بە دەسەڵات، گۆڕینی یاساکان، وەرگرتنی بڕیاری نیشتمانی هەموویان دەبێ مۆری پەڕڵەمانیان لەسەربێت. پێویستە لەسەر هەموو حیزبە کوردستانییەکان، بەتایبەت پارتی و یەکێتی کە دوو حیزبی دەسەڵاتدارن لە هەرێمی کوردستان، ڕۆڵی پەڕڵەمان کارابکەنەوە، هاوپەیمانەکانیش لە ڕێگەی دیموکراسییەوە، ئینجاش لە ڕوانگەی نەوت و جیوپۆلیتیکەوە سەیری کوردستان دەکەن، بۆیە حکومەتی ئەمریکا سەربازانی خۆی بەوە ڕازیکرد کە پشتی کورد بگرن، چونکە لە هەرێمی کوردستان، دیموکراسی هەیە!.

05-02-2019 پارتی و یەکێتی کۆبوونەوە و بڕیاریاندا دوای تێپەڕبوونی سێ مانگ بەسەر سوێندخواردنی پەڕڵەمانتارانی خولی پێنجەم، ڕۆژی 18ی ئەو مانگە پەڕڵەمان کۆببێتەوە. خەڵک ئەم جارە زۆر بە ئومێدەوە دەنگیاندا بۆ هەڵبژاردنی پەڕڵەمانێکی نوێ، بەڵام خەریکە نائومێدی درووستدەبێ. ئێستا نیازی باش پەیدابوونە و بڕیارە ڕۆژی 18-02-2019 پەڕڵەمانی کوردستان کۆببێتەوە، ئەم جارە بۆ هەڵبژاردنی دەستەی سەرۆکایەتی پەڕڵەمانە، پێش کۆبوونەوەی پارتی و یەکێتیش بە ڕۆژێک، پارتی و بزووتنەوەی گۆڕانیش دوور لە چاوی میدیا لەسەر هەمان پرس کۆبوونەوە.
کێبڕکێی دوو باڵەکە
بەربژێری یەکێتی بۆ پۆستی سەرۆکی پەڕڵەمان هێشتا لەنێوان بەڕێزان بێگەرد تاڵەبانی و د.رێواس فایق کە هەردووکیان ئەندامی سەرکردایەتی حیزبەکەیانن و ئەندامی خولی پێشوو و ئێستای پەڕڵەمانی کوردستانن، ساخنەبووەتەوە، هەردووکیان و هەردوو باڵە پشتیوانەکەشیان تاوەکوو سەر ئیسقان کێبڕکێی یەکتر دەکەن بۆ وەرگرتنی پۆستی یەکەمی پەڕڵەمانی کوردستان بۆ چوار ساڵی دیکە. بەڵام پۆستی جێگری سەرۆکی حکومەت 100% بو بەڕێز قوباد تاڵەبانی یەکلابووەتەوە، هەرچەندە باڵەکەی بەرانبەر باڵی ماڵی تاڵەبانی هێشتا ملی بۆ نادات.

زۆر گرنگە یەکێتی لەسەر کاندیدی سەرۆکی پەڕڵەمان ، خۆی و پارتی ئیحراج نەکات و بەیەک بەربژێر بێتە نێو پەڕڵەمان. پارتیش مامەڵە لەگەڵ ئەو ناوە دەکات کە مەکتەبی سیاسی و سەرکردایەتی یەکێتی وەک بەربژێری خۆی بۆ پۆستی سەرۆکی پەڕڵەمان پێشکێشی دەکات.

ئایا پێش (18/2/2019) پۆستی سەرۆکی پەڕڵەمان لەنێو یەکێتیدا یەکلایی دەبێتەوە! گومانێک هەیە کە ئەم کێشمەکێشە درێژە بکێشێ و ببێتە ئەگەری دواخستنی کۆبوونەوەی پەڕڵەمان. بەڵام خۆ ئەو گومانەم نییە یەکێتی کۆبوونەوەی پەڕڵەمان دوابخات، چونکە پێکەوە لەگەڵ پارتی ئەو بڕیارەیان داوە و هەر خۆشی تەحەمولی هەموو بڕیارێکی پێچەوانەی ئەو بڕیارە دەکات .
پارتی و گۆڕان؛ چوار ساڵ
پارتی هەر زوو لەگەڵ بزووتنەوەی گۆڕان گەیشتە ڕێککەوتن. پارتی ڕێکە لەگەڵ سەرکردایەتی گۆڕان بۆ پێکەوە کارکردنێکی چوار ساڵە کە لە بەرژەوەندی کوردستان بێت و لە دژی یەکێتی نەبێت. بەڵام ئەوەی ڕاستی بێ، پارتی و گۆڕان و هەموو خەڵکی کوردستان زیاتر لە سێ مانگە چاوەڕوانی یەکێتی دەکەن کە خۆی ساخ بکاتەوە .

ڕۆژی 07-02-2019 بەڕێز کۆسرەت ڕەسوڵ، جێگری یەکەمی سکرتێری گشتی یەکێتی دوور لە چاوی ڕاگەیاندن، لەگەڵ جەنابی سەرۆک بارزانی کۆبووەوە. بەپێی قسەی برادەرانی یەکێتی کۆبوونەوەیەکی سەرکەوتوو بوو .

ڕۆژی 18-02-2019 جگە لە هەڵبژاردنی دەستەی سەرۆکایەتی پەڕڵەمان، لە شاری هەولێر کۆبوونەوەی ئەنجوومەنی پارێزگای کەرکووکیش دەکرێت، مەبەستی سەرەکی لەو کۆبوونەوەیە ئەوەیە کە داوا لە بەغدا بکرێت ، کەرکووک لە شارێکی سەربازییەوە بگۆڕێت بۆ شارێکی خاوەن دەسەڵاتێکی مەدەنی ، هەروەک گوتەبێژی یەکێتیش لە دوایین پرێسکۆنفرانسدا وتی .
هەگبەی چارەسەرکار لە بەغدا
یەکێتی ساڵێک و چوار مانگ دوای ڕووداوەکانی 16ی ئوکتۆبەر هەوڵیدا بەتەنیا لەگەڵ بەغدا و بەبێ پارتی دۆسیەی کەرکووک لەگەڵ بەغدا یەکلاییبکاتەوە، بەڵام نەیتوانی . بەغداش ئەم دۆسیەیە زیاتر لەگەڵ پارتی چارەسەر دەکات . دۆسیەی کەرکووک بەشێکی سەرەکی بوو لە مژارەکانی سەردانی بەڕێز نێچیرڤان بارزانی، سەرۆکوەزیرانی کوردستان بۆ بەغدا . ئەو کەسەی بەوە ناسراوە کە هەمیشە گرێیە ئاڵۆزەکان دەکاتەوە. نێچیرڤان بارزانی لە ڕۆژی 07-02-2019 لەگەڵ عادل عەبدولمەهدی، سەرۆکوەزیرانی ئێراق کۆبووەوە ، بەرەو چارەسەر ڕۆیشتن لە سیمای کۆبوونەوەکە و لە قسەکانی دوای کۆبوونەوەکەش بۆ ئێمە ئاشکرا بوو.

بڕیارە دوای کۆبوونەوەی یەکەمی (هەولێر) ، ئەنجوومەنی پارێزگای کەرکووک لە پردێ یان شارۆچکەیەکی دیکەی سەر بە کەرکووک کۆببێتەوە و تورکمان و عەرەبیش تێیدا بەشدار بن. پارتی نایشارێتەوە کە پۆستی پارێزگاری کەرکووک پشکی کوردە و نایەوێت لەسەر ئەو پۆستەش لەگەڵ یەکێتی بیکاتە کێشە، بەڵام دەبێ یەکێتیش تەفەهومی ئەوە بکات کە دەبێ کەسێک بۆ ئەو پۆستە دابنێت پارتیش پێی ڕازیبێت.

وەرگرتنی پۆستی پارێزگار و وەزیری داد لە بەغدا ، خواستی یەکێتین بۆ کۆبوونەوەی 18ی ئەم مانگەی پەڕڵەمانی کوردستان، بۆیە یەکێتی دەیەوێ پێش ئەو وادەیە پارتی ڕازی بکات بە پێدانی هەردوو پۆستەکە. ئەمەش جەوهەر و بناغەیەکی ئەو ڕێککەوتنە سیاسییە دەبێ کە یەکێتی دەیەوێ بۆ چوار ساڵی دیکەی حوکمڕانی لەگەڵ پارتی دایبنێت.
بارزانی بڕیار دەدات
یەکێتی داوای شەش وەزارەت دەکات لە حکومەتی هەرێمی کوردستاندا ، بزووتنەوەی گۆڕان داوای چوار وەزارەت دەکات، ئەگەر بە داوای یەکێتی و گۆڕان بێت، بەهەردووکیان لە پارتی زیاتر پۆستەکانی حکومەتیان بەردەکەوێت. یەکێتی 21 کورسی لە پەڕڵەمان هەیە، بزووتنەوەی گۆڕانیش 12، بەڵام پارتی بەتەنیا 45 کورسی هەیە . واتە یەکێتی و گۆڕان 12 کورسییان لە پارتی کەمترە . ئەگەر بە جوگرافیاش بێت وەک یەکێتی دەڵێت: مەعقول نییە، پشکی ئیدارەی یەکێتی لە هەردوو پارێزگای هەولێر و دهۆک زیاتر بێت .

ئەوەی ڕوون و ئاشکرایە، ماوەی 27 ساڵە قەت لە هیچ حکومەتێکدا پارتی داوای لە هیچ حیزبێک نەکردووە لە پشکی خۆی پۆستێک بداتە پارتی ، ئەوە هەمیشە حیزبەکانی دیکەن، بەتایبەت یەکێتی لە هەولێر و بەغدا جگە لە مافی خۆیان داوای پۆستی پارتیش دەکەن، پارتی هەمیشە مەرد بووە و پۆستی بەخشیوە، نەک بۆ ئەوەی بڵێن پارتی بەخشندەیە، بەڵکوو لەپێناو سەقامگیری دۆخی سیاسی، کۆمەڵایەتی و ئابووری کوردستان بووە. هەرچەندە ئەم جارە لەسەر ئاستی قاعیدە ناڕەزاییەک هەیە کە نابێ ئەم جارە سەرکردایەتی پارتی لە پشکی خۆی پۆست ببەخشێتە لایەنەکانی دیکە، بەتایبەت یەکێتی، بەڵام قسەی کۆتایی لەسەر دابەشکردنی پۆستەکان لای جەنابی سەرۆک بارزانییە.

چونکە ئەگەر بە دیموکراسی بێ، وەک ئەو ئەفسەرەی لەسەر کەشتیی بووش کە پشتگیری کوردستان دەکات، پارتی و هاوپەیمانەکانی دەتوانن بەبێ یەکێتی حکومەت و پەڕڵەمان پێکبێنن، بەڵام حکومەتێک بەبێ یەکێتی ئاسان نییە، بگرە هیچ کەسێک لەم هەرێمەدا ئیسراحەت ناکات. ئەم جۆرە وێنەیە لەسەر یەکێتی (باش نییە و بگرە زۆر خراپیشە) بەڵام پێویستە برادەرانی یەکێتی هەست بەوە بکەن کە پارتی بەبێ یەکێتی حکومەت پێکناهێنێ، ئەوانیش چیدی باش نییە یاری بە کات بکەن.

من وێنەیەکی نێو پەڕڵەمان پێشانی ئێوەی بەڕێز دەدەم. وەک فراکسیۆنەکان بەردەوام لەگەڵ یەکدی دادەنیشین، باسی پێکهێنانی حکومەت دەکەین و نایشارینەوە کە دڵگرانین لە دواکەوتنی پێکهێنانی حکومەت، بێگومان ئەمە لەلای برادەرانی یەکێتی، گۆڕان و حیزبەکانی دیکەش بەدیدەکرێت . هەموومان کۆکین لەسەر ئەوەی خولی چوارەمی پەڕڵەمانی کوردستان بەهیچ شێوەیەک دووبارە نەکەینەوە، کێشەکان چەندە گەورەبن، لەنێو پەڕڵەمان بچووکیان بکەینەوە. [1]

26 پارتی سیاسی کورد لە ڕاگەیاندراوێک داوای یەکریزی و یەکهەڵوێستیان کرد، هەروەها بانگەوازیان بۆ هەموو هێزە کوردستانییەکان، ڕێکخراوە کلتوورییەکان، دەزگاکانی چاپەمەنی، کەسایەتییە ئاینییەکان، کەسایەتییە کۆمەلایەتییەکان و هەموو گەلی کورد کرد کە ڕۆلی ڕاستەقینەی خۆیان بگێڕن بۆ پێکهێنانی یەکێتی و یەکریزی گەلی کورد.
لە بەشێکی ڕاگەیەندراوەکەیاندا هاتووە:
'هێرشەکانی دەوڵەتی تورک بەردەوامن'
گەلی کورد لە سوریا بەتایبەتی و لە هەرێمەکە بە گشتی، بە هەلومەرجێکی سەخت و قۆناغێکی مێژوویدا تێدەپەڕێت، بەتایبەتیش دوای داگیرکردنی شاری #عەفرین# لەلایەن دەوڵەتی تورکەوە، #سەرێکانی# و #گرێ سپی# و ناوچەکانی دیکەش بە بیانووی درۆ و دەلەسەوە، هەروەها بە بەردەوامی ئاکەپە هەڕەشەی تەواوکردنی پیلانەکانی دەکات لە داگیرکردنی هێڵی سنوور تا دەگاتە سنوورەکانی هەرێمی کوردستانی عێراق، بەو شێوەیەش دەوڵەتی تورک ئامانجە سەرەکییەکەی لەناوبردنی تروسکایی هیواکانی گەلی کوردە بۆ بەدەستهێنانی مافە نێونەتەوەیی و نیشتیمانییەکانی لە سوریا، هەروەها هەوڵی گۆرینی دیموگرافی دەدات لەو ناوچانەی کورد لێی نیشتەجێن، ئەوەش لەپێناو ئەوەیە کە ئەجندا نەژادپەرستییەکانی جێبەجێ بکات، جموجۆڵەکانی سوپای تورک لەو چاورچێوەیەدان، تەنانەت گەیشتوەتە ئاستێک کە دەوڵەتی تورک دیداری ترسناک لەگەڵ هێزە هەرێمییەکان و نێودەوڵەتییەکان و ڕژێمی سوریا دەکات بە ئامانجی جێبەجێکردنی ئامانجەکەی و لێدانی دۆزی کورد لە سوریا.
'بەبێ پێشمەرج کۆ ببنەوە و ڕێگەچارە بدۆزنەوە'
گەلی کورد بە دەسپێشخەریی فەرماندەیی گشتی هێزەکانی سوریای دیموکرات (#قەسەدە#) بۆ پێکهێنان و ڕێککەوتنی کوردی - کوردی پێشوازیان کرد، هەلبەتە پێشوازی لە هەر کار و خەباتێک لەوبارەیەوە دەکەن و باوەری بە بزووتنەوەی سیاسی کورد دەگەڕێنێتەوە، هەروەها هیوای گەل لەنوێوە زیندوو دەکاتەوە.
بانگەوازی بۆ حزبە سیاسییەکان لە سوریا دەکەین کە بەبێ پێشمەرج کۆ ببنەوە و کێشەکانی خۆیان چارەسەر بکەن، بە ڕۆحی بەرپرسیارییەتی کێشەکان چارەسەری بکەن، بۆ دروستکردنی مەرجەعێکی سیاسی کوردی بۆ یەکێتی کوردی، هەڵوێستی کورد لەبارەی دۆزە ستراتیژییەکان خەبات بکەن.
'بانگەوازی بۆ هەموو کەسێک دەکەین کە ڕۆلی خۆیان بکێڕن'
بانگەوازیمان بۆ هەموو هێزە کوردستانییەکان، ڕێکخراوە کلتوورییەکان، دەزگاکانی چاپەمەنی، کەسایەتییە ئاینییەکان، کەسایەتییە کۆمەلایەتییەکان و هەموو گەلی کورد کرد کە ڕۆلی ڕاستەقینەی خۆیان بگێڕن بۆ پێکهێنانی یەکتی و یەکریزی گەلی کورد.
حزب و لایەنە سیاسییەکان ئەمانەن:
1. پارتی داهاتووی سوریا.
2. پارتی یەکێتی دیموکرات-پەیەدە.
3. پارتی ئاشتی دیموکراتی کوردستانی.
4. یەکێتی لیبرالی کوردستانی.
5. حزبی شیوعی کوردستانی.
6. #پارتی دیموکراتی کوردستان#- سوریا.
7. پارتی دیموکراتی کوردی سوری.
8. پارتی چەپی کوردی سوریا.
9. پارتی چەپی دیموکراتی کوردی سوریا.
10. پارتی کۆمەڵگەی دیموکراتی کوردستانی.
11. پارتی گۆڕانی دیموکراتی کوردستانی.
12. پارتی نوێبوونەوەی کوردستانی.
13. پارتی ڕەنجدەرانی کوردستانی.
14. پارتی سەوزی کوردستانی.
15. پارتی ویفاقی دیموکراتی کوردستانی سوری.
16. حزبی یەکێتی دیموکراتی سوریا (یەکێتی)
17. بزووتنەوەی چاکسازی- سوریا
18. پارتی دیموکراتی کورد لە سوریا (ئەلپارتی)
19. پارتی برایەتی کوردی.
20. پارتی ڕۆژ-ی دیموکراتی کوردی سوریا.
21. یەکێتی نیشتیمانی ئازاد- ڕۆژئاوا.
22. ڕەوتی ئایندەی کوردستان.
23. بزووتنەوەی کۆمەڵگەی دیموکراتی.
24. کۆنگرەی ستار.
25. پارتی خەباتی دیموکراتی.
26. پارتی کۆماری کوردستان.[1]
#16-01-2020#

#پارتی دیموکراتی کوردستان#، بڕیاری داوە ڕۆژی 3 مانگی داهاتوو، لە شاری #دهۆک# بەبێ بانگکردنی میوان، کۆنگرەی 14ی حیزبەکەی ئەنجام بدرێت.
قادر قاچاخ، ئەندامی سەرکردایەتی پارتی: بڕیاری کۆتایی سەرکردایەتی پارتی بۆ کۆنگرە ئەوەیە کە هیچ میوانێک لەدەرەوەی کوردستان بۆ کۆنگرەی 14 بانگ ناکرێت.
ڕۆژی سێشەممە، 25 تشرینی یەکەمی 2022، لە کۆبوونەوەیەکدا لەگەڵ ئەندامەکانی کۆنگرەی پارتی، #مەسعود بارانی# لە #هەولێر# ڕایگەیاند هەموو کەسێک ئازادە خۆی بۆ سەرکردایەتی پارتی هەڵبژێرێت، بەڵام نابێت هیچ ئەندامێک پارە و ڕەشووە بۆ سەرکەوتن بەکار بێنێت، یان دژی ئەندامێکی دیکە کاربکات.
تا ئێستا نزیکەی 350 کەس لە ئەندامانی کۆنگرەی پارتی خۆیان ئامادەکردووە، کە خۆیان بۆ ئەندامێتی سەرکردایەتی پارتی کاندید بکەن. [1]

#ئاری هەرسین# ڕایگەیاند، بە بڕیارێکی شەخسی دەستی لە ئەندامێتی لە ڕیزی ڕێکخستنەکانی پارتی کێشاوەتەوە، دەشڵێت، وازهێنان لە پارتی وازهێنان نییە. لە کوردایەتی و سیاسەت.
ئاری هەرسین، کادیری پێشکەوتوی پارتی و ئەندامی پێشوی سەرکردایەتی ئەو حزبە لە #سلێمانی# و #هەڵەبجە#، لە نووسینێکدا ڕایگەیاند، لە ڕێی ئەم ڕاگەیاندنەوە، هەموو لایەک ئاگادار ئەکەمەوە کە بەندە دەستم لە ئەندامەتی لە ڕیزی ڕێکخستنەکانی #پارتی دیموکراتی کوردستان# کێشاوەتەوە، وەک چۆن بڕیاری بە پارتی بوونم (لە یەکگرتنەوەی پاسۆک و پارتی) شەخسی بوو، بڕیاری دەستلەکار کێشانەوەشم لە پارتی بڕیارێکی شەخسیە و هیچ پەیوەندییەکی بە پلە و پۆست و ئیمتیازاتەوە نییە. [1]

کوردستان یان نەمان
بۆ/ بەڕێزان بنەماڵەی بارزانی و مەکتەبی سیاسی #پارتی دیموکراتی کوردستان#
سڵاوی گەرم...
بە درێژایی ژیانی سیاست کردن و حیزبایەتیم، هەمیشە هەم سیاسەت و هەم حیزبایەتیم بە ئالیەت زانیوە بۆ خزمەتی خەڵکی کوردستان. لەوەش باڵاتر، هەرچیم کردوە بۆ سەر بەخۆیی خاکی پیرۆزی کوردستان کردومە. بۆ یەک چرکەش لە ژیانی شەخسیمدا بیرم نایەت بۆ تاکتیکیش بوبێت، بڕوام بە کەمتر لە سەربەخۆیی هەبوبێت و کارم بۆ کردبێت.
لەم وێستگە زۆر هەستیار و پیرۆزەی ژیان و کوردایەتی و سیاسەتدا، کە بڕیاری ڕیفراندۆم (وەک ئالیاتێک بۆ هێنانەدی ئاواتی لەمێژینەی گەلێک بوەتە ئەمری واقیع) پێم وایە مەرامی نامەرد زۆرن بۆ بچوک کردنەوەی ئەم (گەورەترین) پڕۆژە نیشتیمانیە. هەر بۆیەش لە ڕێگەی ئەم نوسراوەوە هەڵپەساردنی هەموو کار و ئەرک و بەرپرسیارێتی خۆم لە سەرجەم ئۆرگانەکانی حیزبماندا هەتا دوای ڕیفراندۆم ڕادەگەیەنم. چونکە پێم وایە ئەمڕۆ ڕۆژی کوردایەتی و کوردستانی بوونە، نەک شەڕە دەم و چەلەحانێی حیزبایەتی بچووک و بەرتەسک.
بە دڵنیاییەوە بەڕێزتان هەر ئیجرائاتێکی حیزبی بەرامبەر بەندە بنوێنن قوبوڵی دەکەم و، نە موناقەشەی ئیجرائاتەکانتان دەکەم و نە حوکمیشتان (تەممیز) دەکەم. بەڵام لە بڕیاری خۆم پەشیمان نابمەوە.
هەر کات پڕۆسەی ڕێفراندۆم کۆتایی پێ هات، دیسانەوە لەخزمەتتاندا دەبم و ئەرکی حیزبی خۆم (هەر وەک هەمیشە) زیاد لە پێویست جێبەجێ دەکەم.
دواجار لەم هەلە مێژوویەدا ڕێگەی براتان بدەن با تەنیا کورد و کوردستانی بم و هیچیتر. من لەمڕۆوە پارتی نیم، هەتا کۆتاییهاتنی پڕۆسەی ڕیفراندۆم.
شەکاوەبێت ئاڵای سەربەخۆیی خاکی پیرۆزی کوردستان.
لەگەڵ ئەوپەڕی ڕێزمدا.
ئاری محەمەد هەرسین
#04-01-2017#

#ئارێز عەبدووڵڵا#، ئەندامی مەکتەبی سیاسی ڕایدەگەیەنێت لەگەڵ #پارتی دیموکراتی کوردستان# ناکۆکی قوڵیان هەیە و یاسای هەڵبژاردنیش تەنیا لە بەرژەوەندی پارتییە.
ئارێز عەبدوڵڵا ئەندامی مەکتەبی سیاسی #یەکێتیی نیشتمانیی کوردستان# لە لێدوانێکیدا ئەوە ڕەتدەکاتەوە کە حیزبەکەی دژی ئەنجامدانی هەڵبژاردن بێت و دەڵێت ”ئێمە بە هیچ شێوەیەک دژی ئەنجامدانی هەڵبژاردن نین، بەڵام ئێمە لەگەڵ ژمارەیەک حیزبی دیکە داوای هەمواری یاسای هەڵبژاردنمان کردووە و پێمان وایە ئەو یاسایە تەنیا لە بەرژەوەندی پارتی دیموکراتی کوردستاندایە”.
بەبڕوای ئەو ئەندامەی مەکتەبی سیاسی یەکێتی، دەبێت یاسای هەڵبژاردنی پەڕڵەمانی کوردستان بە شێوەیەک هەمواربکرێتەوە کە لە خزمەت پڕۆسەی سیاسیی بێت لە هەرێم.
ئارێز عەبدوڵڵا، سەبارەت بە کێشەکانی نێوان پارتی و یەکێتی دەڵێت ”لەگەڵ پارتی ناکۆکی قوڵمان هەیە و کێشەی زۆرمان هەیە، بەڵام مانای وانییە پەیوەندیمان نەبێت. بەڵکوو پێمان وایە لە داهاتووییەکی نزیک لەگەڵ پارتی بە گفتوگۆ دەگەینە ڕێککەوتن”. [1]

ئاژانسی هەواڵی میهری ئێرانی، لە ڕاپۆرتێکدا هێرشی توند دەکاتە سەر #مەسعود بارزانی# سەرۆکی #پارتی دیموکراتی کوردستان# و حزبەکەی.
ئاژانسەکە لە لە ڕاپۆرتەکەیدا دەڵێت دوای هێرشی ئێران بۆ سەر پارتە نەیارەکانی کۆماری ئیسلامی، بارزانی و ڕێبەرانی پارتی هەڵوێستی توندیان هەبووە دژی ئێران و هەڵوێستەکانیان جێگای سەرسوڕمان بوون.
ڕاپۆرتەکە پارتی و بارزانی تۆمەتبار دەکات بەوەی لە ئاستی کردە سەربازیەکانی تورکیا بێ دەنگن و هەندێکجار هاوکاری تورکیاش دەکەن و دژی چەکدارانی قەندیلن، بەڵام لە هەمان کات پشتیوانی و پاڵپشتی ئەو گروپانە دەکەن دژی ئێرانن.
ئاژانسی میهر ئاژانسێکی هەواڵی فەڕمی ئێرانە و بە چەند زمانێک هەواڵ بڵاودەکاتەوە لە ناویاندا کوردی سۆرانی هەیە. [1]

[1]