بەپێی ئامارێکی بەڕێوەبەرایەتی هاتوچۆی گەرمیان، لەماوەی شەش مانگی ئەمساڵدا ڕووداوەکانی هاتوچۆ بە بەراورد بە ساڵی ڕابردوو زیادی کردووە و لە ماوەی ئەم شەش مانگەدا 10 منداڵ بە ڕوداوی هاتوچۆ گیانیان لە دەستداوە. نەقیب کارزان مەجید بەرپرسی ڕاگەیاندنی پۆلیسی هاتوچۆی گەرمیان بە ڕۆژنیوزی ڕاگەیاند: بەراورد بە ساڵی ڕابردوو لە گەرمیان ڕوداوەکانی هاتوچۆ زیادیان کردووە و لە ماوەی 6 مانگی ئەمساڵدا لە سنوری گەرمیان 171 ڕوداوی هاتوچۆ ڕویداوە و بەو هۆیەوە 32هاوڵاتی گیانی لە دەستداوە کە بریتین لە 17 پیاو و پێنج ژن و 10 منداڵ. وتیشی: ئەو 171 ڕوداوو لە گەرمیان ماوەی شەش مانگ ڕوویانداوە، 88 ڕوداویان لە ناو شارۆچکە و شارەدییەکانی ئیدارەی گەرمیان بووە و 83 ی تریشی لەسەر ڕێگا سەرەکییەکانی نێوان گەرمیان و شارو شارۆچکەکانی تر بووە. نەقیب کارزان ئاماژەی بەوەشدا لە ماوەی ئەم شەش مانگەی ساڵی 2015 دا لە 112 ڕووداو لە جۆری پێکدادان بووە و 24 ئۆتۆمبیلی گەورە و بچووک وەرگەڕاوە و سێ ڕوداوی بەیەکدا کێشان هەبووە لە گەڵ 32 ڕوداوی شێلان بووە.[1]
ڕۆژنیوز هۆشمەند کوردی

بە پێی ڕاپرسییەکی ڕێکخراوی وادی ئەڵمانی، لە #گەرمیان#، #هەولێر# و ڕاپەڕین، لە کۆی دوو هەزار و 997 کچ، 313 کەسیان خەتەنەکراون، زۆرترین حاڵەتیشیان لە ڕاپەڕین بووە.
ئەمڕۆ 6ی شوبات ڕۆژی جیهانی بەرەنگاربوونەوەی خەتەنەکردنی مێینە، کە ئەم ڕۆژە بە پێی بەندەکانی 19 و 24ی ڕێککەوتننامەی مافەکانی منداڵ، پەسەندکراوی ڕێکخراوی نەتەوە یەکگرتووەکان لە ساڵی 1989، بڕیاری لە سەر دراوە.
ڕێکخراوی وادی ئەڵمانی، کە یەکێک لە کارەکانی نەهێشتنی خەتەنەکردنی مێینەیە، لە ساڵی 2018، ڕاپرسییەکی بە بەشداریی دوو هەزار و 997 کچ ئەنجامداوە، کە تەمەنیان لەنێوان 0-18 ساڵییدابووە و بەشێکیان ئەو کەسدانە خۆیان و و بەشەکەی دیکەیان کەسوکاریان وەڵامی پرسیاری ڕێکخراوەکەیان داوەتەوە، کە سەبارەت بە خەتەنەکردن بووە.
ڕاپرسییەکە لە گەرمیان، هەولێر و ڕانیە ئەنجام دراوە و لە ئەنجامدا دەرکەوتووە لەو ژمارەیە 313 کچ خەتەنە کراون، کە بەم جۆرە دابەش بوون، لە گەرمیان 29 حاڵەت، لە هەولێر 120 و لە ڕانیە 164 حاڵەت هەبووە، زۆرترینیشیان تەمەنیان لەنێوان 8- 14 ساڵیی بووە.
ئامارەکەی ڕێکخراوی وادی ئەڵمانی نیشانی دەدات، کە لە ئێستاشدا منداڵی کچ هەڕەشەی جدیی خەتەنەکردنی لەسەرە و 4. 10٪ی کچان خەتەنە کراون.
شۆخ محەمەد، سەرپەرشتیاری پڕۆژەکانی ڕیکخراوی وادی ئەڵمانی، کە ماوەی 10 ساڵە لە هەرێمی کوردستان کار دەکەن، زانیاریی زیاتری بۆ ڕۆژنیوز خستەڕوو و وتی: بەپێی ئەزموونە ئێمە هەمانە ئەوە ڕوون بووەتەوە کە دیاردەی خەتەنەکردن تا ئێستاش بە نهێنی بەردەوامە.
ڕاشیگەیاند: هەندێک ژن لەدوای ئەنجامدانی پرۆسەی هاوسەرگیریی خەتەنەکراون و بەزۆرییش ئەو کارە لە ماڵەکاندا دەکرێن.
کاریگەرییەکانی خەتەنە کردن لە ڕووی تەندروستییەوە
شیرین جەمال، پسپۆڕی نەخۆشیەکانی ژنان و مناڵبوون، بەم جۆرە باسی لە زیانەکانی خەتەنەکردن کرد:
زۆر جار لەکاتی ئەنجامدانی خەتەنەکردن کەرەستەی پیس بەکار دەهێندرێت، کە کەسەکە تووشی خوێنبەربوونی زۆر، گوزاز، ئیلتهابات دەکات، هەندێک جار کەسەکە لەوکاتەدا گیانی لە دەستداوە، ئەگەر کەرەستەی دیکەش بەکار هێنرابێت مەترسیی تووشبوونی ئایدزی لە سەر دروستبووە.
خەتەنەکردن کاریگەریی درێژخایەنیشی هێناوەتە ئاراوە، وەک نەهێشتنی هەستەوەرەکان لەکاتی پێکهێنانی ژیانی هاوبەش، نەزۆکیی و دواجار دورستبوونی کێشەی کۆمەڵایەتیی.
خەتەنە کردن لە ڕووی یاساییەوە
بەگوێرەی یاسای یاسای ژمارە 8ی ساڵی 2011 ی پەرلەمانی هەرێمی کوردستان، خەتەنەکردن قەدەغەکراوە، بەندەکانی یاساکە بەم جۆرەیە:
-هەر کەسێک هەوڵی ئەنجامدانی خەتەنەکردنی مێیینەیدا بە غەرامەیەک سزا دەدرێت، کە لە یەک ملیۆن دینار کەمتر نەبێت و لە پێنج ملیۆن دینار زیاتر نەبێت.
- هەر کەسێک کردەوەی خەتەنەکردنی مێینەی ئەنجامدا یان بەشداریی تێداکرد، ئەوا سزای بەندکردنی بۆ ماوەیەک دەیگرێتەوە، کە لە شەش مانگ کەمتر نەبێت و لە دوو ساڵ زیاتر نەبێت، هەروەها غەرامەکەشی لە دوو ملیۆن کەمتر نەبێت و لە پێنج ملیۆنیش زیاتر نەبێت و دەبێت بە یەکێک لەو دقوانە سزا بدرێن.
- هەر کەسێک کردەوەی خەتەنەکردنی مێینەی ناکامی ئەنجامدا یان بەشداریی تێدا کرد ئەوا سزای بەندکردنی لە ساڵێک کەمتر نەبێت و غەرامەشی لە پێنج ملیۆن دینار کەمتر نەبێت و لە 10 ملیۆن زیاتر نەبێت.
- باری تاوانکارەکە توندتر دەبێت ئەگەر بکەرەکە پزیشک، دەرمانساز، مامان یان یاریدەدەرەکانیان بوو، لەسەر دادگایە فەرمان بدات کارەکەی بۆ ماوەی سێ ساڵ قەدەغە بکات.
ئەگەر چی یاساکە هەیە، بەڵام زۆرێک لە ڕیکخراوەکان و هاوڵاتیانیش ئاماژە بەوە دەکەن کە لە جێبەجێکردنیدا کەمتەرخەمیی هەیە و نەیتوانیوە ڕێگریی لە خەتەنەکردن بکات.
ئایا ئاینی ئیسلام ڕێگەی داوە بە خەتەنەکردنی مێینە؟
قومریە محەمەد، سکرتێری ڕێکخراوی خوشکانی ئیسلامی، دەربارەی دیاردەی خەتەنەکردن لە ئاینی ئیسلام، بە ڕۆژنیوزی وت: لە ئاینی ئیسلامدا بە هیچ شێوەیەک باسی خەتەنەی مێینە نەکراوە و نەبووە، بەڵکو لە پێش ئاینی ئیسلام و لە سەردەمی جاهلیەت لەناو کۆمەڵگەی عەرەبییدا ئەم دیاردەیە باو بووە، کاتێک ئایینی ئیسلام-یش هات قەدەغەی نەکرد ڕاستەخۆ و وتی 'بە پێی نەریتی خۆتان ئەوەی کە زیانی لێدەکەن با نەبێت، چونکە گەورەترین تاوانە'.
دەربارەی ڕەوایەتییدان بەو دیاردەیە لە لایەن کەسایەتی ئاینی، قومریە، وتی: حەڵاڵکردنی خەتەنەکردن بەواتای تێنەگەشتن لە ئاینی ئیسلام دێت، کۆمەڵێک ئایەت هەیە کە تێگەیشتنی هەڵەی بۆ کراوە وەک فرە ژنی، کە لە کۆمەڵگەی کوردییدا هەندێک هەیە فرەژنیی بە فەرز دەزانێت لەکاتێکدا وانییە.
بۆ ڕیگرییکردن لە دیاردەی خەتەنەکردنی مێینە، قومریە محەمەد، بە ئەرکی دایکان وباوکانی هۆشیار و ڕێکخراوەکانی دەزانێت، هۆشیاریی بڵاوکردنەوە، هەروەها بە ئەرکی #وەزارەتی ئەوقاف#ی دەزانێت ئەو زانا ئاینییانە بنێرێتە سەر مینبەر، کە شارەزابن و لە ناوەڕۆکی ئەو بابەتانە تێبگەن.[1]
#06-02-2019#

هۆشداریدان بۆ ڕاوەستاندنی‌ ڕاوکردنی‌ ئاسکەکانی‌ سنوری گەرمیان بەردەوامی‌ هەیەو ژینگەپارێزێکیش ڕایدەگەیەنێت لە 3 مانگی‌ کۆتایی ساڵی 2015دا، سەد ئاسک لە گەرمیان کوژراون لە لایەن ڕاوچیەکانەوە. بێستون ژاڵەیی چالاکی‌ بواری‌ ژینگە بە ڕۆژنیوزی‌ ڕاگەیاند" ڕاوچیەکانی‌ گەرمیان بەشێوەیەکی‌ سامناک دەستیان داوەتە ڕاوکردنی‌ ئاسکەکانی‌ سنورەکە و بەشیوەیەک ڕاویان دەکەن نزیک بونەتەوە لە قڕکردنیان و ئێمەش بەردەوام هۆشداری دەدەین بۆ ڕێگریکردن لەکوشتنی‌ ئاسکەکان، بەڵام سودی‌ نیە و ڕۆژ دوای‌ ڕۆژ ڕووی‌ لە زیادبوونە ". ناوبراو وتیشی: ئێمە چالاکانی ژینگە دەمێکە هۆشداری لە تەشەنەسەندنێکی سامناک و قڕکەری ڕاوی ئاژەڵی کێوی لەگەرمیان ئەدە‌ین، کە خەریکە قڕدەخاتە ئاسکەکانی گەرمیان و ڕەچەڵەکیان دەبڕێتەوە، بەپێی ئەو ئامارانەی کۆمان کردۆتەوە تەنیا لەماوەی‌ 3 مانگی‌ کۆتایی ساڵی‌ 2015دا، 100 ئاسک لە گەرمیان کوژراون". بێستون ئاماژەی‌ بەوەشدا " پیویستە ئەوەش بوترێ بەردەوام باس لە ڕاو کردنی‌ ئاسکەکان دەکرێ لە لایەن بەرپرسانەوە و بۆ ئەو مەبەستەش چەندین جار هوشداریمان داوەتە ئەو بەرپرسانە ". ژاڵەیی ئاشکرایشکرد" بەداخەوە کە دیاردەکە لە دوای ڕێنماییەکانی دەستەی چاککردن وپاراستنی ژینگە بەتایبەت ڕێنمایی "ژ1لە 28-04-2015"پێی ناوەتە قۆناغێکی ترسناک و ئەو مۆڵەتانەی بۆ ڕاوەتانجی دراون، زۆرخراپ بۆ ڕاوەئاسک و هەموو ئاژەڵە کێویەکان بەکارهێنراون". بەپێی ئەو زانیاریانەی دەست ڕۆژنیوز کەوتوە، نزیکەی‌ 10 هەزار ئاسک لە گەرمیان بوونی‌ هەیە.

ئەم پەرتووکە بریتیەلە ژیاننامەو و بەرهەمی 100 کەسایەتی دیار و ناودار (نووسەر و هونەرمەند و ڕۆژنامەنووس و مێژوونووس و سیاسەتمەدار... هتد) بەشێوازێکی کورت و پوخت.
دەستە بژێرێکە لە سەدان کەسایەتی ناوداری ناوچەی کەرکووک و #گەرمیان#. لە نووسین و ئامادەکردنی (عومەر عەلی شەریف) ە، لە 490 لاپەرە پێکهاتووە، ئاکار جەلیل کاکەوەیس کاری دیزاینی بەرگ و ناوەرۆکی بۆ کردوە و بەشێوازێکی جوان و سەرنج ڕاکێش لە چاپخانەی کارۆ چاپکراوە.

ناوی هەندێک لە کەسایەتییەکان:
ئەحلام مەنسوور، لەیلا قاسم، شێخ ڕەزای تاڵەبانی، ئەسیری، ئیسماعیل ڕۆژبەیانی، برایم خانی دەلۆ، بەدیع بابا جان، #ڕەفیق حیلمی#، پاکیزە ڕەفیق حیلمی، جیهاد دڵپاک، جەبار جەباری، بەکر سدقی، جەمال ڕەشید، حەمە بەگی جاف، زاهیر ڕۆژبەیانی، لەتیف حامید، سەید ئەحمەدی خانەقا، شکور مستەفا، شێخ مارف بەرزنجی، فەلەکەدین کاکەیی، جەوهەر نامیق سالم، حاجی برایمی شاتری، نەبەرد جاف، محەمەد موکری، شێخ ئەحمەد شاکەلی، شەونم بەرزنجی، مستەفا نەریمان، مەلا جەمیل ڕۆژ بەیانی، مەلای جەباری، ڕەشید باجەلان، شێخ حەسەنی قەرەچێوار، فەقێ قادری هەمەوەند، کەریم بەگی هەمەوەند، سەردار بەگی جاف، مستەفا بەگی جاف، عەلی مەردان، خوداداد عەلی، سەلاح داودە، حوسێن عەل، شەوکەت ڕەشید...

خەندان-سۆران کەریم
دوای کەمتر لە دوو مانگ لە کردنەوەی، سەنتەری ڕاهێنان و چارەسەری دەروونی لە #گەرمیان#، لە ماوەی مانگی ڕابردوودا، 260 نەخۆش لەو سەنتەر بینراوە و چارەسەریان بۆ کراوە، ئەمە جگە لە ئەنجامدانی چالاکیی هۆشیاری و ڕۆشنبیریی.
محەمەد ئیسماعیل، بەڕێوەبەری سەنتەرەکە بە خەندانی ڕاگەیاند، لە 18ی کانوونی یەکەمی 2013 سەنتەرەکە کرایەوە و ڕاستەوخۆ دەستی بەکاری پراکتیکی کرد بۆ خزمەتی هاووڵاتییان و چارەسەرکردنی ئەو کەسانەی کێشە و گرفتی دەروونیان هەیە، ڕوونیشیکردەوە تەنیا لە مانگی ڕابردوودا، کانونی دووەمی 2014، سەنتەرەکە 260 نەخۆشی بینیوە.
محەمەد ئیسماعیل ئاماژەی بەوەشکرد کە، ئەو نەخۆشانە پاش پێدانی ڕێنمای دەروونی، ئەگەر پێویست بوبێت لەلایەن پزیشکی پسپۆری دەروونییەوە چارەسەری پێویستیان بۆ کراوە، وتیشی: چارەسەرەکان بە ڕاهێنان یان پێدانی دەرمانی پزیشکیی بووە، ئەمە سەرباری ئەوەی هەندێک لە نەخۆشەکان پێویستیان بەوەهەیە دانیشتن لەگەڵیان ئەنجام بدرێت.
محەمەد ئیسماعیل، وتیشی: لەو مانگەدا، پێنج سیمیناری زانستی بۆ پەیمانگای تەکنیکی #کەلار# ئەنجام دراوە، ئەمە سەرباری ڕاهێنانی توێژەرانی دەروونی کە یەکێکە لە چالاکیە بەردەوامەکانی سەنتەرەکە.
05-02-2014

بەپێی ئامارەکانی یەکەی کاروباری مرۆیی ئیدارەی #گەرمیان#، هێشتا 27 هەزار ئاوارەی سوننی لە ناوچەکەدا دەژین و نەگەڕاونەتەوە زێدی خۆیان.
ئەو 27 هەزار ئاوارەیە خەڵکی پارێزگاکانی سەلاحەدین، دیالە، ڕوومادی و ئەنبارن. هۆکاری نەگەڕانەوەشیان نائارامی دۆخی ئەو ناوچانایە.
ئاوارە عەرەبەکان لە سەردەمی کابینەی نووری مالیکی ماڵ و زێدی خۆیان بەناچاری جێهێشت، لە کابینەی حەیدەر عەبادی ناوچەکانیان بە وێرانکراوی کۆنترۆڵکرایەوە، ئێستا چاویان لە کابینەی عادل عەبدولمەهدیە بۆ ئەوەی گەڕانەوەیان بۆ ئاسانبکات.
252 خێزان کە لە هەزار و 164 کەس پێکهاتوون لە کەمپی قۆرەتوو دەژین، کە تەنیا 14 کیلۆمەتر لە #کەلار# دوورە. 341 خێزانی دیکەش لە کەمپی تازەدێ نیشتەجێکراون، کە 32 کیلۆمەتر لە کەلارەوە دوورە.
هەرچەندە هێزە عێراقییەکان ناوچە سوننەنشینەکانیان لەدەست #داعش# کۆنترۆڵکردووەتەوە، بەڵام ئەو ئاوارانە دەڵێن، نایانەوێ بگەڕێنەوە ناوچەکانی خۆیان چونکە دۆخی ناوچەکانیان سەقامگیرنییە.
ئاوارەکان بە چاوی گریانەوە باس لە دۆخی ژیانی خۆیان دەکەن. وەک خۆشیان دەڵێن، بەشێکیان کەسوکاریان کوژراون یان لە زینداندان.
لە سنووری هەرێمی کوردستان 27 کەمپی ئاوارەکانی عێراق هەن، کە نزیکەی 800 هەزار کەس تێیاندا دەژین و هێشتا نەگەڕاونەتەوە ناوچەکانی خۆیان.[1]
#08-11-2018#

بەڕێوەبەرایەتی‌ پۆلیسی‌ #گەرمیان# بەشی‌ بەڵگه و تاوانی‌ کردەوه و وتەبێژی‌ پۆلیسی‌ گەرمیانیش ئاشکرایدەکات، #سلێمانی‌# و هەولێریش هاوکاری‌ پۆلیسی‌ گەرمیانیان کردوە، ڕاشیدەگەیەنێت، لەداهاتودا لەپۆلیسی‌ #خانەقین# و #کفری‌#-ش هەمان ئه و بەشە دەکرێتەوە، دەشڵێت:35 هەزار بەڵگەی‌ تاوان لەسلێمانی‌ گەڕێنرایەوە بۆ گەرمیان.
لەکۆنگرەیەکی‌ ڕۆژنامەوانیدا کە پەیامنێری‌ SNN ئامادەیبوو، ڕائید عەلی‌ جەمال قەدوری‌ وتەبێژی‌ پۆلیسی‌ گەرمیان ڕایگەیاند، ئەمڕۆ 13ی‌ ئەیلولی‌ 2017 بەشی‌ بەڵگه و تاوان لەبەڕێوەبەرایەتی‌ پۆلیسی‌ گەرمیان کرایەوە کە ڕۆتینێکی‌ زۆر کەمدەکاتەوە.
ئەوەشی‌ ڕونکردەوە، پێشتر بۆ پەنجەمۆری‌ تاوانباران دەبوایە بگەڕێینەوە بۆ پۆلیسی‌ سلێمانی‌ و ماوەیەکی‌ زۆری‌ پێ دەچوو تاوەکو مامەڵەی‌ پەنجەمۆرو بەڵگەی‌ تاوانی‌ تاوانباران دەگەڕایەوە.
ئەوەشی‌ ڕونکردەوە، بەکردنەوەی‌ ئه و بەشە تەواوی‌ ئه و ڕۆتینانە نامێنێت و لەبەشی‌ بەڵگەوتاوانی‌ بەڕێوەبەرایەتی‌ پۆلیسی‌ سلێمانی‌ 35 هەزار بەڵگەی‌ تاوان و پەنجەمۆریان گەڕاندۆتەوە بۆ پۆلیسی‌ گەرمیان.
باسی‌ لەوەشکرد، بەڕێوەبەرایەتی‌ پۆلیسی‌ هەولێریش لەدابینکردنی‌ کەرەستەی‌ بەشەکە هاوکاریان کردوین.
ئەفسەرەکەی‌ پۆلیس زیاتر لەوبارەیەوە وتی‌:هیچ میلاکێکی‌ تازە بۆ ئه و بەشە دانەنراوە بەواتایەکی‌ دیکە کەسی‌ نوێی بۆ دانەمەزراوە، بەڵکو ئه و پۆلیس و ئەفسەرانەی‌ بڕوانامەی‌ کیمیاو فیزیاو بەشە زانستیەکانیان هەبوە له و بەشەدا دانراون.[1]
13-09-2017

بەپێی ئامارێکی ڕێکخراوی وادی ئەڵمانی، 35%ی ژنان و منداڵانی ڕەگەزی مێ لە #گەرمیان# #خەتەنە# کراون و 12 گوندی هەرێمی کوردستان-یش لە خەتەنەکردن خاڵیین.
ئەمڕۆ ڕێکخراوی وادی ئەڵمانی ئاماری خەتەنەکردنی مێینەی لە دەڤەری گەرمیان ئاشکراکرد.
بەپێی ئامارەکە، ژمارەی منداڵی مێینە و ژنانی گوند و شارەدێ و شارۆچکەکانی گەرمیان، که ‌تیمەکانمی وادی له ‌ساڵی 2017 دا بینیویانن هەزار و دوو کەس بوون و 35%یان خەتەنەکراون.
ئاماژە بەوەشکراوە، ئەو کەسانە ئاگادار کراونەتەوە بەپێی یاسای ژمارە 8ی بەرەنگار بوونەوەی توندو تیژیی خێزانی ساڵی 2011 خەتەنەکردن قەدەغەیه و سزای یاسایی لەسەرە.
ڕێکخراوەکە، دەشڵێت: تیمەکانمان لە ساڵی 2017 لە شارۆچکە و شارەدێ و گوندەکانی گەرمیان و دەوروبەری هەزار و 104 ژن و پیاویان بینیوە و سمیناری بەرەنگاربونوەوەی خەتەنە کردنی مێینە و توندوتیژیی خێزانی و چارەسەری ئاشتیانەی ململانییەکان-یان بۆ ئەنجام داون.
ڕاشیگەیاندوووە، کە بەهۆی هەوڵەکانی ئەوانەوە هۆشیاریی کۆمەڵگە بەرزبووەتەوە و ئێستا 12 گوندی هەرێمی کوردستان خاڵیین لە خەتەنە، کە سیانیان ئەکەونە سنووری گەرمیانەوە.[1]
#24-12-2017#

$ئارام بنوو پیاوە جوامێر و مەردەکەی #گەرمیان#$
#قوباد تاڵەبانی#

#29-09-2020#

هەر کاتێک وشەی جوامێر یان پیاوی مەردم دەکەوێتە بەر گوێ، یەکسەر کاک سەڵاحی کوێخام دێتە بەرچاو. کاک سەڵاح نموونەی مەردایەتی و مێرخاسی و پەرۆشی بوو بۆ خاک و نیشتمان. پێشمەرگەیەکی پارتیزان و دڵسۆز، دەوڵەتمەدار و بەرپرسێکی دەست و دامێن پاک و ڕەوشت بەرز و بە هەموو مانایەک مەرد.

کاک سەڵاح زۆر جیاواز بوو و تا دواساتەکانی ژیانی بە پاکێتی و بەهەمان ئەو بیر و باوەڕەوە ژیا کە لە گەنجێتیدا لەپێناویدا بووە پێشمەرگە و هەرگیز ڕێگەی نەدەدا ناو و ناوبانگی لە کەدار بێت.

کاک سەڵاح وەکچۆن لە سەردەمی شاخ و پێشمەرگایەتیدا مەرد و جوامێر بوو، لە قۆناغی پاش پێشمەرگایەتیشدا هەر مەرد و جوامێر مایەوە. نەیهێشت پلە و پۆست ناوی بزڕێنێت. ئەو دەسەڵاتە زۆرەی وەک سەرپەرشتیاری ئیدارەی گەرمیان هەیبوو، بەکاری نەهێنا بۆ بەهێزکردنی پێگەی خۆی یان بۆ پڕکردنی گیرفانی.

لە دوا کۆنگرەی یەکێتی، لەناو گەرمییانییەکاندا ڕەنگە کاک سەڵاح خۆشەویسترین و بەهێزترین ئەندامی کۆنگرە بووبێت، کەچی پاشەکشەی کرد بۆ هەندێک هەڤاڵی دیکە تا گرژی نەکەوێتە ناو کۆنگرەوە.

لە ژیانمدا لە کەم شت پەشیمانم. بەڵام هەست دەکەم غەدرم لەم پیاوە مەزنە کرد. دوو ساڵ بوو داوای دەکرد خانەنشینی بکەم و هەڤاڵێکی دیکە لە شوێنەکەی دەستبەکار بێت، بەڵام من لێی پاڕامەوە کە لەبەر هەستیاری دۆخەکە و ئەو هاوسەنگیەی ڕایگرتبوو و هەروەها لەبەر ئەو ڕێزەی کە لە گەرمیان هەیبوو بەردەوام بێت لە خزمەتکردنی گەرمیان. ساڵی ڕابردوو بەڵێنم پێدا کە یەکساڵی دیکە بەردەوام بێت خانەنشینی دەکەم. ئەوەبوو سەرەتای مانگی سێپتەمبەری ئەمساڵ خانەنشین کرا.

بەڵێ کوێخا جوامێرەکەی گەرمیان دوو ساڵ تەنیا لەبەر خاتری من و هەستکردن بە بەرپرسیارێتی، ویست و خواستی خۆی و هاوسەرە بەڕێزەکەی مامۆستا هیامی بەلاوەنا و لە پۆستەکەی بەردەوام بوو.

ئێستا پەشیمانم و هەست ئەکەم غەدرم لە خۆی و مامۆستا هیامی هاوسەری کرد کە بە پێداگرییەکانم نەمهێشت لانی کەم دوو ساڵ بەئارامی و دوور لە فشاری بەرپرسیارێتی پێکەوە بژین. زۆر دڵگرانم کە نەیتوانی یەک ڕۆژ چێژ لە ژیانی خانەنشینی ببینێت، چونکە هەرکە خانەنشین بوو تووشی پەتای کۆرۆنا بوو. لێرەدا هیچم نییە بیڵێم جگە لەوەی زۆر داوای لێبووردن بکەم لە مامۆستا هیام.

هیوادارم کاک سەڵاح و ئەداکەی نموونەیەک بێت بۆ ئەو کەسانەی نایانەوێت مێژووی خۆیان بە کاری نەشیاو ناشیرین بکەن. ژیان و تێکۆشانی کاک سەڵاح فێرمان دەکات هەر کەسێک کە ئەمڕۆ لەهەر بوارێکدا ناوبانگێکی هەیە، ئەگەر بەپاکی و بە ڕەوشت بەرزییەوە بژین، ئەوانیش دوای خۆیان وەک کوێخا جوامێرەکەمان بەجوانی دەچنە ناو مێژووەوە.

هەرچەندە وشەکان زۆرجار لە ئاست شکۆ و ناوبانگ و مێژووی مرۆڤە مەزنەکاندا کوورت دەهێنن، بەڵام دوای هەموو ئەو ساڵانەی یەکتر ناسینمان هەست دەکەم تەنیا وشەیەک کە شیاو بێت لەپاڵ ناوی کاک سەڵاحدا دایبنێم ئەوەیە کە بڵێم: کاک سەلاحی مەرد.

ڕۆحت شادبێت کاک سەڵاح.. کوێخاکەی خۆم و گەرمیان. [1]

رێبوار