مایکڵ جەی کیلی
وەرگێڕانی: کارزان محەمەد
ئەم پەڕتووکە لە نووسینی پڕۆفیسۆر مایکل جەی کیلی- یە و لەلایەن وەرگێڕ و ڕۆژنامەنووس #کارزان محەمەد# کراوە بە کوردی.
ئەو پەڕتووکە لەیەک پێشەکی و سێ بەش پێکهاتووە کە هەر بەشێکیش بۆخۆی چەند فەسڵێک لەخۆ دەگرێت.
پێشەکی پەڕتووکەکە لەلایەن بەهادین محەمەد عەبدولڕەحمان نووسراوە و ئاماژە بەوە کراوە کە لە دادگایی کردنی #سەدام#یش غەدر لە کورد کراوە هەرچەند ئەو کات سەرۆک کۆماری ئێراق کورد بوو، بەڵام جەنابی #مام جەلال# ئامادە نەبوو واژۆ لەسەر لەسێدارەدانی سەدام بکات، هەرچەند سەدام لەسەر کۆمەڵکوژییەکەی دوجێل کە تێیدا 148 کەس لەناو بران، سەدام لەسەر#هەڵەبجە# و کیمیاباران و #ئەنفال# لەسێدارە نەدرا، سەدام ملی بە پەتەوە کرا بەبێ ئەوەی کە تاوانەکانی #هەڵەبجە و ئەنفال# و وێرانکردنی 4500 گوند ڕوون ببێتەوە.
لە و پەڕتووکەدا زۆر لایەنی ناڕوون لەلایەن نووسەرەوە خراوەتە ڕوو لەسەر ئەنفال و هەڵەبجە و کیمیاباران.
بەشی یەکەمی پەڕتووکەکە تایبەت کراوە بە جینۆسایدی کوردان
لەفەسڵی یەکەمدا کوورتە مێژوویەک سەبارەت بە کورد و ژینگە و جوگرافیای کورد کراوە. هەروەها باس لەسەدام و زەمینەکانی جینۆساید کراوە.
فەسڵی دووەمی بەشی یەکەم باس لە ئەنفال و پەلامارەکانی ئەنفال و قۆناغەکانی و پیلانەکانی سەدام بۆ مەسەلەی ئەنفال دەکات.
لەفەسڵی سێیەمدا باس لە هەڵەبجە و بۆردومانی شارەکە و کاریگەریی درێژخایەنەکانی بۆردومانی هەڵەبجە لەسەر تەندرووستی دانیشتووانی ئەو ناوچەیە دەکات، باس لە نەخۆشییەکانی شێرپەنجە و کەموکووڕی زگماکی و گیروگرفتی چاو وپێست و نەزۆکی و لەبارچوونی کۆرپە و... هتد.
لەبەشی دووەمی پەڕتووکەکەدا باس لە جەنگی کەنداو (ساڵی 1991) کراوە. هەر لەو بەشەدا باس لە دووبەرەکی و ناکۆکییەکانی نێوان پارتە سیاسییەکانی کورد دەکات.
دواتر باس جەنگی ساڵی 2003 کە هەمان پڕۆسەی ئازاد کردنی ئێراق بوو لەچنگ سەدام و ڕژێمەکەی.
بەشی سێیەکی پەڕتووکەکە تەرخان کراوە بۆ دادگاییکردنی سەدام حسێن سەرۆک کۆماری پێشووتری ئێراق و #ڕژێمی بەعس# بە تاوانی ئەنجامدانی سەدان تاوانی دژە مرۆیی دەرهەق بە هاووڵاتییانی ئێراقی، لەم بەشە باس لە پێکهێنانی دادگای باڵای ئێراق و دادگایی سەدام و سەرانی بەعس لەسەر تاوانی دوجەیل و دادگایی ئەنفال و سەپاندنی سزای سێدارە بەسەر سەدام و ژمارەیەک لەسەرکردەکانی حزبی بەعس.