دواڕۆژ، ئاوارە حەمید
تاوەکو ئیستا نزیکەی 2000 بەڵگە بۆ بە جینۆساید ناساندنی کەیسی ئێزدییەکان کۆکراوەتەوە و لە سەنتەرێکی تایبەت و هەندێکیان گەێندراوەتەوە دادگای ICC لەلاهای و لیژنەی باڵای ناساندنی جینوسایدی کوردانی ئیزیدی لەگەڵ نوێنەرانی پێنج وڵاتە هەمیشەییە ئەندامەکەی نەتەوە یەکگرتووەکان و (UN یش کۆدەبێتەوە داوای هاوکاریان لێدەکات.
ئەمڕۆ چوارشەممە 10ی ئایاری 2017، مەحمود حاجی صاڵح، وەزیری کاروباری شەهیدان و ئەنفالکراوان لەگەڵ جون شارب، کونسڵی گشتی بریتانیا لە هەرێمی کوردستان کۆبوەوە، لە کۆبوونەوەکەدا گفتوگۆکرا لەسەر هەنگاوەکانی بە جینۆساید ناساندنی کەیسی ئێزدییەکان و تیایدا ئەوە خرایە ڕوو، کە 10 کەیسی تایبەت بە کورد لە دادگای باڵای تاوانەکانی عێراق ماون و یەکلایی نەکراونەتەوە، جگە لە تاوانەکانی دژی کوردانی ئێزدی کە دەبێ یەکلایی بکرێتەوە، ئیستاش تەنیا 6 کەیسی کورد وەکو جینوساید لەو دادگایە ناسێندراوە و بۆ کەیسەکانی تر وەزارەتی 3 پارێزەری دیاری کردووە بۆئەوەی کاری لەسەر بکەن.
فوئاد عوسمان، وتەبێژی وەزارەتی شەهیدان و ئەنفالکراون بە دواڕۆژی ڕاگەیاند، لیژنەی باڵای ناساندنی جینوسایدی کوردانی ئیزیدی تاکو ئێستا نزیکەی 2000 بەڵگە بۆ ئەم تاوانانە لە سەنتەرێکی تایبەت کۆکراوەتەوە و هەندێکیان گەێندراوەتەوە دادگای ICC لەلاهای، بەڵام دوای ئەوەی نائومێدبوون لەوەی کە ئەم دادگایە ئەم کەیسانە ناجوڵێنێ لە ئێستادا سەرقاڵی کارکردنن بۆ ئەوەی کەیسەکە بگوازنەوە بۆ دادگایەکی نێو دەوڵەتی تایبەت هاوشێوەی کەیسی حەریری یان دادگایەکی ناخۆیی، بەڵام بە ستانداردی نێو دەوڵەتی و داواشی کرد حکومەتی بریتانیا هاوکار بێت.
وتەبێژی وەزارەتی شەهیدان ڕونیشی کردەوە، لیژنەی باڵا بەنیازە کۆبوونەوەیەکی فراوان لەگەڵ نوێنەرانی پێنج وڵاتە ئەندامەکەی نەتەوە یەکگرتووەکان، بکات تاوەکو داوایان لێ بکات هاوکاری لیژنەی باڵا بن بۆ ئەم پرسە.
لە بەشێکی تری کۆبوونەوەکە، وەزیری کاروباری شەهیدان و ئەنفالکراوان داوایکردوە کە بریتانیا لە ڕووی هەڵدانەوەی گۆڕە بەکۆمەڵەکان و دروستکردنی تاقیگەی تایبەتی DNA هاوکار بێت لەگەڵ وەزارەتی کاروباری شەهیدان بۆ دۆزینەوە و سۆراخکردن و ناسینەوەی قوربانیانی گۆڕە بەکۆمەڵەکان لە سنوری شەنگال و گەرمیان تاوەکو ئێستا 40 گۆڕی بە کۆمەڵ دیاریکراون کە تەنیا چەند گۆڕێک هەڵدراونەتەوە کە زیاتر لە 100 ڕوفاتیان تێدایە و بە قسەی وتەبێژی وەزارەتی شەهدیان چاوەڕێ دەکرێت گۆڕی بە کۆمەڵی تریش لەو دوو ناوچەیە بدۆزرێتەوە.
مەسەلەی قەرەبووکردنەوەی ماددی و مەعنەوی کەسوکاری قوربانیان، کە لەسەردەمی ڕژێمی بەعس زیانیان پێگەیشتەوە و گفتوگۆی لەسەر کراوە و لەم ڕووەوە وەزیری شەهیدان و ئەنفالکراون وتویەتیمادەی 132ی دەستوری عێراق، دوای ماددەی 140دێت بۆ گرنگی ئەم مادەیە بۆ گەلی کورد و زۆرگرنگە و داواکارین حکومەتی عێراقی پابەندی بێَت کە تایبەتە بە قەرەبوو کردنەوەی مادی و مەعنوی کەس و کاری قوربانیان.
11-05-2017