#وەلی دېوانە#
دەلیل شەم نەدیت، دەلیل شەم نەدیت
جە لېڵاخ ئامای سپی شەم نەدیت
ئاهۇی سەر قەتار نەوای ڕەم نەدیت
نۇر بینایی هەر دۇ چەم نەدیت
نازاری باوان نازئەندام نەدیت
شۆخی شیرین ڕەنگ شەکەرڕاز نەدیت
شەم شادی پۊلی پەروانان نەدیت
خانی سېیاماڵ گشت خانان نەدیت
خاوېری خاڵدار خوتەن خۊ نەدیت
مایەی موشک ئەرزان عەنبەربۊ نەدیت
سەر مەنزڵ نە سای سەهەندان نەدیت
گوڵخونچەی گوڵ بۊی گوڵ خەندان نەدیت
(وەنەوشە)ی بېخەوش (سۊسەن) گوڵ نەدیت
دەوای بیماران، دەوای دڵ نەدیت
زامن نە بەرزی ئېڵاخان نەدیت
وەتەن نە سۊرگەی سای زاخان نەدیت
سەرسەوز و بۊرچین گوڵاوان نەدیت
نازداران نە پای وەفراوان نەدیت
(نیلۇفەڕ) نە مەوج گوڵاوان نەدیت
نەسرین نە پایەی شەتاوان نەدیت
(بەڕەزا)ی تاشان سەرشاخان نەدیت
جەبین شۊڵەی شەوق چراخان نەدیت
سەرقەتاری ڕەم ئاهۇی چین نەدیت
غەزاڵەی خوتەن نە ماچین نەدیت
شابازی شاهین (شیروانی) نەدیت
سوراحی بېگەرد دیوانی نەدیت
گوڵەندام شېوەی لەیلا تەرز نەدیت
سەرداری ڕەندان باڵابەرز نەدیت
شای کەمەند وە پېڵ عوزرا تەور نەدیت
(هیلال)ی کامڵ گۊشەی هەور نەدیت
دەلیل ئامانەن قیبلەی من نەدیت
هەم ڕۊح هەم ئیمان دنیا و دین نەدیت
دەلیل ئامانەن ئامای جە لېڵاخ
قیبلەکەم نەدیت بەیۊ بېدەماخ
دەلیل ئامانەن موژدە بدەر پېم
حاڵاتی قیبلەم ئیزهار ببۊ لېم
بزانۇم قیبلەم وە شادی نیشتەن
سەر تا پاش وە نۇر نەو(سوەیل) ڕشتەن
مەیلی من پۑشەن ئەو شیرین شېوە
وەی تەور من پەی ئەو شېت بۇگم لېوە
یام خۊ نامەکەی بېشەرتی وەندەن
وە تەحقیقی دەندان دۊستیش کەندەن
مەزانۊ هەم شەرت وەرین شکەستەن
ئەساسەی ئەسباب بەینی نۊش بەستەن
سەردی ئېڵاخان مەیلش کەردەن سەرد
سەردش جەو ئېقرار چەنی ئېمەش کەرد
بەینی نۊش بەستەن دنیاش بە کامەن
مەیل و مۊبەتش (ئیبن سەلام)ەن
بەشقی ڕای ڕاسان دەلیل یە ڕاسەن
ئەر ڕاسەن جە من بېزاریش واسەن
ڕاس بواچە پېم تا دڵنېیا بام
قەیس ئاسا عەوداڵ دەور دنیا بام
ئەگەر بزانۇم جە من وېیەردەن
ئېقرار کەردەی وېش بە جا ناوەردەن
منیش وە تەحقیق مەوېیەرۇم جە ئەو
دەمێ شیم نە خاو ئەوم دی نە خەو
چۇنکە شەرتی وېش نەبەرد تا وە سەر
چەنی ڕەقیبان وېش کەرد وە یاوەر
پەی من شەرت نېیەن یەک شېوەی خاسی
ساحېب شەرت و شۇن یەک مودەبرماسی
شەرت و وەفاش بۊ چەنیم تا وە سەر
بەینش درۊست بۊ تا وە ڕۊی مەحشەر
جە من زېیادتەر مەیل نەدۊ وە کەس
کلیدی گەنجش نەدۊ بە هیچ کەس
دڵ چەنی هیچ کەس نەکەرۊ پابەند
هەر ڕۆژێ کەسێ نەکەرۊ پەسەند
تا نامەی خاسیش گشت کەس بوانۊ
ڕەقیبان بېفەهم هەرزەش نەزانۊ
نەبۊ بە ڕیشخەند هامسەرانی وېش
تیرو تانەی تاڵ دایېم نەدەن لېش
وەفاش تا سەر بۊ چۇن وەفاداران
وېش نەکا وە قەڵب ناڕەوای شاران
جە یەک بەدەن بۊ ڕۊحش چەنی من
ڕیشەی نەخڵی عەهد نەکنیۊ جە بن
بەڵکم جە ئەلتاف جەمینی جامش
جە بېخی شەوبەند خەیاتەی خامش
(ڕەزا)ی بېچارەی دېوانەی دڵڕېش
خەڵاس بۊ جە دەست جەفای ئېش و نېش
[1]