وەلی دېوانە
سەنگی هەواران، سەنگی هەواران
سەنگی سېیاڕەنگ سفتەی هەواران
مەلۇل و ماتەم پەسمەندەی یاران
چۇن من هامشەریک دەرد و پەژاران
تۊ سەنگی کۊنی یە کام هەوارەن
یە پەی کۍ ڕەنگت ئازېیەت بارەن
سفتەی سەودای عەشق کامین نەوهاڵی
بېدەنگ و بەدڕەنگ مات و مەلاڵی
تۊ جە داخی کۍ سفتە سۊزانی
پەسمەندەی هەوار کامین هۊزانی
ڕاس واچە هېجران کېت نە دڵ داخەن
جە هېجرانی کۍ بەرگت قەڵاخەن
سەنگ وات سېیابەخت ستەمکېشی خەم
(پەروانە)ی پەشېو دۇرکەفتەی پای (شەم)
مەر نمەزانی لېڵاویت لېڵەن
نە ئی جا مەسکەن گوزەرگای خېڵەن
یۇرت چەراگای خېڵی جافانەن
جای عەیش و نیشات عەنبەر نافانەن
هەوارگەی ڕەوېڵ خېڵ مورادییەن
ماوای شەوق و زەوق زومرە شادییەن
من هەواری شەم شای پەروانانم
خانی خاڵخاسان سېیا یانانم
پاییز کۊچی خېڵ بەیان وە دامان
تەشریف باوەران وەی زێد و زامان
من سفتەی ئەو شەوق شۊڵەی شەم چارەم
داخێن ئەو نۇری سەحەر ستارەم
ئین کە واتش پېم سەنگی هەواران
من جە ئەو بەتەر لاڵ بیم جە زوبان
زانام سفتەی شەوق ئەو شەم ڕوخسارەن
داخداری داخ مای دەستی ئەو یارەن
منیچ جە هېجران شای شەم ڕوخساران
با بیم وە هامڕەنگ سەنگی هەواران
تەن چۇن سېیاسەنگ هەوارانمەن
پادشای خەمکېش خەمدارانمەن
[1]