وەلی دېوانە
سەییاد نامت بام، سەییاد نامت بام
تۆ نامت چېشەن؟ فیدای نامت بام
سەد جار وەسەرگەرد دەست و دامت بام
ڕەحمەت بەیۊ پېم تا غوڵامت بام
من پەروانەی وېڵ وادی وېرانەم
مەجنۇنی چۊڵگەرد ڕیسوای زەمانەم
شەوان تا وە ڕۊ جە غەم دارانان
ڕەفیق و هامڕاز وەحشی سارانان
عەبداڵی بەڕگېڵ بېدی مەکانم
جەفا و مەینەتکېش زەردەی هېجرانم
سزا و ستەمکېش غەم نە دەرۇنم
هەردەی (تەبەس) گېڵ ئاوارەی تۇنم
چەندېوەن جە دین شای شەم دۇرکەفتەم
سفتەی ئاهېرناک ساتێ نەسرەفتم
هەر وەحشێ نە شکڵ شېوەی دۊسمەن
ڕەفېقی هامڕاز عاسا و پۊسمەن
من زەوقم وە دەنگ ناڵەی ئەوانەن
قنیاتم وە دین دیدەی ئەوانەن
دۇر جە دیدەی دۊس من بەوان شادم
تا ئەو ڕۊ گەردۇن بدۊ مرادم
ئەی وەڵەدەی شۊخ تۊ گېرتەن نە دام
جە شکڵ و شېوەی قیبلەی من تەمام
نیم نیگاش نە دڵ ناوک مەشانۊ
دیدەش وە دیدەی قیبلەم مەمانۊ
فیدات بام سەد جار سەییادی سارا
بەخشەش وە بەندەی خەم پېدا وارا
ئازادش بکەر ئامان جە دامت
یە خەیلێ نەنگین مەبۊ پەی نامت
ئەو وەڵەدەی وەحش ئازاد کەی جە دام
ئینشاڵڵا جە دۇ دنیا وېنی کام
[1]