#وەلی دېوانە#
مەحبۇبی جافان، مەحبۇبی جافان
مەحبۇبی بېعەیب تایېفەی جافان
سەرقەتاری ڕەم عەنبەربۊی نافان
سەرکېشی ڕەوېڵ مشکین کڵافان
ئاهۇی مودبەرماس مەکان نە هەردە
چۇزەی سونبوڵچر نەسا سڵکەردە
خاوېری خاڵدار خەتاو خوتەن ماڵ
تەتاری تایېف شۊخی شیرین خاڵ
وەتەن نە زامن سەربەرزی لېڵاخ
سەیری سەرکۊیان سەییادان و داخ
چەرخ چەم سېیاچەم چوست و چالاک پڕ
شەیدای شکاردۊز چنگ و هۇناو بڕ
لاچینی شەشدانگ سەحەر جە لان خېز
شمقاری تېژباڵ تەیری توند گورېز
شەمعی شا پەسەند گشت سېیاماڵان
نامی تۊ نە بەزم خەسرەوان خوانان
بەو شەوقی جەمین شەم ڕوخسارەوە
کېت نەدا وە دەم کزەی نارەوە؟
بەو قاشی قەتران دڵ پۍ ئېشاوە
ستۇنی یانەی کېت نەکېشاوە؟
بەو دیدە نەسای سورمەسای سېوەنگ
موژانت وە هۇن کۍ نەکەردەن ڕەنگ؟
بەو نیم نیگای ناز بەو لەنجە و لارە
ئاخر جەرگی کېت نەکەردەن پارە
بەو باڵای نەوتۇڵ وە نەورەستەوە
بەو کۊکۊی کڵاف دەستە دەستەوە
واچە دڵی کېت نەستانان وە زۇر
ئاخر یانەی کېت نەکەردەن خاپۇر
[1]