#وەلی دېوانە#
هامسەران نامم، هامسەران نامم
من نامم گنۊ دېۋانەن نامم
جەو ساوە ڕیسوای دەوری ئەییامم
ڕۊیێ، نەگېڵا دەوران وە کامم
جەو ڕۊ من جە «بەتن» مادەر پەیدابیم
مەجنۇنی کۊگەرد شېت و شەیدا بیم
هەر خاتر خەمین دەرۇن پڕ داخ بیم
هەر دڵگیری دەرد وېڵ و دوستاخ بیم
هەر چەم پڕ ئەسرین مات و مەحزۇن بیم
هەر گېرۊدەی جەور جەفای گەردۇن بیم
هەر دایېم ڕەقیب ڕەهەندەی ڕا چەفت
وەردا وە جەستەم ئاهېر چەنی نەفت
ئەر سەد سزاکېش باری مەینەت بېم
بەڵۍ سازا بیم چەنی بەختی وېم
ئی ساتە ڕۊیێ جە ڕاگوزەردا
شەم شېوە جە نۊ ئاهېر جێم وەردا
ئەو وەی بڵېسەم جە گەردۇن وېیەرد
بیم وە کۊی زوغاڵ سفتەم بی وە گەرد
پەروانەی سیفەت پڕ سفتەی زۊخاڵ
سۊزان بیم وە شەو شۊڵەی شەم جەماڵ
ئاهېری بەختم هەر نەبی خامۊش
تا قرچەی جەرگم شنەفتم وە گۊش
ئەوەڵ چۇن مەجنۇن وېڵی سارا بیم
دېوانەی دڵگیر جە خەم دارا بیم
ئیسە پەروانەی پەڕ و باڵ سفتەم
وېڵی بەرداوبەرد کۆس و کۊس کەفتەم
هامسەران سفتەی شۊخی شەم لەقام
چۇن مەبۊ عېلاج وە چېشەن دەوام
[1]