دەروون زوخاڵم...
میرزا ئۆلقاڎر، هاوارش گەرمەن، ناڵەش بەرزەن، پەی دووری یاران دەروونش زوخاڵەن، ئاڎ بە تەرزێ هاوارش بەرزەن کە هاوار جە هاواریش بېزار بېیەن، ئیتر نمەزانیۊ ئەی (هاوار) فووغانو ناڵەن، یان دەگاو (هاوار) ی، بەڵام جە کۊتاو شېعرەکېنە ماچۊ: ئاوارەی ئەبەد خاکی هاوارم؟.
سەرەڕاو ئانەیچە، شېعرەکۍ نېیەنە ئاسوو تەوانایی و دەسڕەنگینی ئەدەبی میرزا ئۆلقاڎرو پاوەینە، بەڵام بە نامۍ ئاڎیۆ ئامێنە.
دەروون زوخاڵم دەروون زوخاڵم
پەی دووری یاران دەرون زوخاڵم
دڵداران یاران چەند پەشېو حاڵم
هاوار بۍ زیدم هاوار وە ماڵم
سا جە داخ دەرد ڕۊزگارەوە
تەکم دان وەلای کۊی هاوارەوە
دایېم خەم وە کۊڵ نە هاوارەنان
خوڎا چن بەڎبەخت مەینەت بارەنان
هەر شه و تاوە سوب هەر سوب تا ئېوار
هاوارم بەرزەن هاوار جە هاوار
ئەوگارم وەزام ڕۊزگارەوە
کۊن دڵسوزێ بەی وە هاوارەوە
باوەرۊ نامەی قیبلەی وەفاڎار
بەڵ دڵ ساکن بۊ، لاڎێ نە هاوار
وەرنە تا مەحشەر هاوارم بەرزەن
زایەڵەی زارییم وە هەزار تەرزەن
هاوار بېزار بی ئەی جە هاوارم
هاوار جە هاوار دڵ بیۍقەرارم
هاوار نەهاوار هاوار چېش کەروون
هاوار جە هاوار وەلای کۍ بەروون
هاوار هامسەران هاوارم بۍ هۊن
هاوار جە هاوار هاوار پەرسم کۊن
هاوار مەتەرسوون جەڕای نەڎامەت
هاوار بۊ زەیدم تا ڕۊی قیامەت
مەعلووم بۊ یاران خالق ڕۊی ئەزەڵ
پەی هاوار منش ئاوەرد وە عەمەڵ
هاوار و هانا و ڕۊ ڕۊ ئی ئېش و دەرد
جەفا و جەور و خەم هەناسان سەرد
بەڎبەختی و نەحسی شوومی ستارەم
نویسیان سەرلەوحەی پېشانی چارەم
جه و بۊنه و هاوار کەرد وە هەوارم
هاوار جە قرچەی زام ئەوگارم
هاوار مەتەرسوون هاوار بۊ وە جېم
چوون گۊڕ غەریبان کەس نەزانۊ پېم
پەیم بۊ وە حەسرەت دیڎار یاران
هاوارم بگنۊ وە سەر مەزاران
مەگەر هەم خاڵۊم شای نامەداران
ئېل بەگی بلۊک خېڵخانە شاران
بپۊشۊ وە تەن خەڵات خانان
بنیشۊ وە شاڎ جە بەرزە بانان
گا وە عەزم سەیر خانەگا و پاوە
گا سەیر سەخناخ سەر هەرد شاوە
گا نە سەفارای هەرد بید میر
جارجار جە ڕووی ناز باوەرۊم نەۋیر
هاوار هەی هاوار هاوار زیڎی وېم
بیۍیار بۍ یاوەر بۍ ئومېڎی وېم
(قاڎر) دەر وە دەر هەر نادیارەن
ئاوارەی ئەبەد خاک هاوارەن.[1]