شاکاری موزیک لە بوونیادی شانۆدا
#ئامانج غازی#
ئەو پەیوەندییە ئەزەلییەی نێوان هونەرە جوانەکان، بووەتە هۆی درووستبوونی بۆتەیەکی هونەری زیندوو کە عەقڵیەت و هەستی شانۆکار و موزیکژەن و بینەر زۆر بە وریایی دەرکی پێدەکات.
کاتێک خوازیارین کە کارێکی شانۆیی بخەینە باوەشی بەراووردکارییەکی زانستی لەگەڵ یەکێک لە هونەرە زیندووەکان, یاخود ڕاستتر بڵێین لەگەڵ هونەری موزیک و شێوەکاریدا، ئەوا دەبێ ڕەچاوی کۆمەڵێک بنەمای هونەری زانستی بکەین لە ڕوانگەی ئەوەی کە بابەتە هونەرییەکە دەبێ شیکردنەوەیەکی گشتی لەڕووی پەرەگراف و دیالۆگ و زمانی هونەری و بنەما هونەرییەکان بەخۆوە بگرێ.
گەر بە باگراوندێکی خێرا سەیری مێژوویەکی دوور بکەین هەست دەکەین کە دراما و موزیکی بابەت ئامێز وەک دووهێڵی شەمەندەفەر بارگه و کەلوپەلی شاکارێکی گەورەی هونەریان لەکۆڵ ناوه و ڕووەودوورگەی ئەمان و وێستگەی حەسانەوەیان بردووە، هەر لە کارەکانی چاخی ڕێنسانسەوە بگرە و لە کارەکانی موزیکی ئایینی و زەنگۆڵەکانی کڵێساکانیشدا سرووتە گریگۆرییەکان و گۆرانییە ئەبەدییەکان هەمیشە بەدوای ئەو هەقیقەتە لێڵەدا وێڵ بوون کە بڕوایان بە بوونی هەبووە، بەڵام ئەفسوس له و کاتەدا نەدەکرا بە یەکەوە گرێ بدرێن، چونکە زمانی ڕاستەقینەی هونەری موزیک زیاتر لە دیالۆگێکی هەمیشەیی دابوو لەگەڵ ڕۆح و گیان و جەستە ماندووەکانی مرۆڤە سەرشێتەکان، کۆڕاڵە جیاجیاکانی چەرخی باڕۆک و ڕۆمانتیک و ئۆپێرا خەم ئامێزەکان و کۆمیدیا هەڵگرەکانیش ڕووی دووەمی ئەو حەقیقەتەن کە بەرجەستەکردنی کارێکی جوڵە ئامێزه و هەرگیز لە باوەشی موزیکێکی تراژیدی جیانەدەبووەوه و هەمیشە هۆگری ئەو دەنگە بەسۆزانە بوون کە لە گیانی شانۆکارەکان دەردەچوو، ئینجا دەگەیشتە جەستەی ژەنیارەکان و لەوێوەش بەرەو پانتایی شاکارێکی هونەری گەورەی هەنگاو دەبەست و دواجار لە بەردەم گوێچکە و دیدەی بیسەروبینەردا دەبووە بەرهەمێک کە گیانی سەر لەبەری مرۆڤایەتی دەهەژاند لە هونەری موزیکدا.. ئەوەی دڵ مەرامیەتی و پەنجە خواستییەتی لە بەردەم عەقڵێکی کامل بووی شانۆکارێکدا دەبێتە هەڵوەستەیەک و دەبێ ئەو دووئایدا گەورەیە لە ئاکامدا لەیەک بئاڵێن و ئاوێتەیەکی هاڕمۆنیایی بیانگرێتە ئامێز.
ئەگەر گۆرانی کوردی هەر لەیەکەمین پەلامار بۆ سەر کوردستان وەک چەکێکی بەرگری بەرانبەر دوژمن لە خزمەت بایە, ئەوا بێگومان جووڵه و ڕێکخستنی خەڵک و جەماوەر وەک تێڕوانینێکی هونەرییانە بۆ خۆی پانتاییەکی گەورەی لەسەر جوگرافیای جیهانی شانۆدا داگیرکردووە، کەواتە بە نەتەوەیی کردنی ئەم حاڵەتە بۆ یەکێک لە میللەتە هەرە زیندووەکانی ( میزۆپۆتامیا ) کارێکی پڕ شەرەفی هونەرییە، چونکە ئەو خاسیەتەی ئەمڕۆ باسی لێوە دەکەین ( سۆزی نۆتەی کوردی و دەقی شانۆیی خۆماڵی ) ئامانجێکن تا ئێستا دەستی تامەزرۆ و ڕۆحی شەکەتی هونەرمەندانی کوردی نەگەیشتووەتێ, سەد حەیف و مخابن تا ئەمڕۆشی لەگەڵدا بێ کراسێکی هەمەڕەنگی ڕەسەنایەتی نەکرایە بەر جەستەی ڕووتی کارە هونەرییەکانمان، ئەوەی ئێمە مەبەستمانە هەمیشە لەنێو تەپ و تۆزی کارە سەرپێیەکان پەلە قاژێیەتی و نەکراوە ڕۆژێک دەرهێنەرێکی ویژدان زیندوو لەگەڵ موزیکژەنێکی پەنجە ماندوو باس له و بەرهەمە بکەن کە لە عەقڵی پەنگ خواردوویانی مێروولە دەکات و هەریەکەیان بەرەو ئەو جیهانە پەلەیەتی کەنازانێ کۆتاییەکەی هەر دەگاتەوە ئەو سەرچاوەیەی کەبە یەکەوە یەکەم هەنگاوی بەرەو ڕەسەنایەتیان کردە دەستپێک. [1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 983 keer bekeken
Schrijf uw commentaar over dit item!