(کۆدەنگی نیشتمانی) وەک هەنگاوێکی چارەنووسساز!
#کارۆخ خۆشناو#
(کۆدەنگی نیشتمانی) لایەنە سیاسییەکانی هەرێمی کوردستان لەسەر پرسە هەنوکەیی و ستراتیژییەکان هەنگاوێکی چارەنووسسازە بە ئاڕاستەیەکی درووست، بۆ کەڵک وەرگرتن لە دەرفەتەکان و ڕووبەڕووبوونەوەی هەڕەشەکان.
لەم چوارچێوەیەدا هەوڵە بەردەوامەکانی جەنابی سەرۆکی هەرێم بۆ دەستەبەرکردنی کۆدەنگی نیشتمانی کارێکی هەنوکەیی گرنگ و پڕبایەخە، چونکە تاکە ڕێگای کردنەوەی گرێ کوێرەکانی هەرێم بریتییە لە دیدار و کۆبوونەوەی ئامانجدار، بە مەبەستی تێپەڕاندن و دەربازبوونی هەرێم لەو ئاڵنگاریانەی کە لە ئێستا و داهاتووشدا یەخەی دەگرن، لە سەرووی هەموو ئاڵنگارییەکانیش ڕووبەڕووبوونەوەی تیرۆری (#داعش# و میلیشیا وەلائیەکانە).
ئەو زەمینەسازیەی کەوا لەلایەن سەرکردایەتی سیاسی کوردستانەوە هاوتووەتە ئاراوە مایەی دڵخۆشی و ئومێدی خەڵکی کوردستانە، بە تایبەت لە ئێستادا پرسی سەرەکی ئەجێندای لێکتێگەیشتنی لایەنەکان بریتییە لە پرسی (دەستوور) کە چاوەڕوان دەکرێت ببێتە چەتری کۆکەرەوەی دانیشتووانی هەرێمی کوردستان بە هەموو پارت و ئایین و ئایدۆلۆژیا و ڕەگەز و مەزهەب و نەتەوەکان.
بۆیە پێم وایە بڕیاری سەرکردایەتی سیاسی کوردستان سەبارەت بە خستنە ڕۆژەڤی پرسی دەستوور، بڕیارێکی مێژوویی گرنگ و بوێرانەیە، کە بەھۆیەوە ھەم خۆیان و ھەم خەڵکی کوردستان دەخەنە بەردەم بەرپرسیاریەتێکی مێژوویی بۆ ناردنی پەیام و ویستی پێکەوە ژیانی خەڵکی کوردستان بۆ وڵاتانی جیھان و ناوچەکە و ناوەندە نێودەوڵەتییەکان.
ئەگەر بەخێرایی چاوێک بە مێژووی ئەو (193) وڵاتە بخشێنینەوە، کە بەفەرمی ئەندامن لە نەتەوە یەکگرتووەکان، بۆمان ڕووندەبێتەوە، کە ھیچیان بە پێرفێکتی لە دایک نەبوون، بەڵکوو لە سەرەتادا کەمکوڕیان زۆر بووە و بەناکامڵی لە دایک بوون، بەڵام دوای نووسینەوەی (دەستوورێک) بە جدی خەباتیان کردووە بۆ بنیاتنانی داموودەزگای نیشتمانی و مەدەنی و دیموکراسی، بۆیە بەهانەی دواخستنی نووسینەوەی دەستوور بە پاساوی نەبوونی زەمینەی لەبار هیچی تر لە شوێنی خۆیدا نییە، بۆ ئەم مەبەستەش درووستکردنی یەکدەنگی نەک تەنیا پێویستییەکی ھەنوکەییە، بەڵکوو ئەرکێکی نیشتمانی سەرکردایەتی سیاسی کوردستانە کە پێویستە ھەنگاوی بەردەوامی بۆ بهاوێژێت، بۆچی؟ چونکە دەستوور پرسێکی چارەنووسسازە و دەکرێت وەک چەترێک بکرێتە وەرچەرخانێکی گرنگ لە پڕۆسەی درووستکردنی دەوڵەتدا.
کەواتە لە ئێستادا دەرفەتێکی گونجاو لە ئاستی ناوخۆییدا ھاتووەتە پێشەوە کە بەڕای بەندە قۆستنەوەی ئەم دەرفەتە بۆ بەهێزکردنی قەوارەی هەرێم ڕاستەوخۆ بەندە بە نووسینەوەی دەستوورێکی هاوچەرخ، ئەگەرچی پێویست بوو پڕۆسەی نووسینەوەی دەستوور لە دوای ڕاپەڕینە مەزنەکەی ساڵی (1991) ئەنجام بدرێت، بەڵام ئێستاش نەچووە بچێت، دەکرێت ئەگەر لایەنەکان لەسەر هیچ شتێک کۆدەنگ نەبن، لەسەر پرسی دەستوور کۆدەنگ بن، تاکوو نەوەی ئێستا و داهاتوو (دەستوور) بکەنە (سەنگی مەحەک) بۆ یەکلاکردنەوەی کێشە و ململانێکان نەک لولەی تفەنگ!
لە کۆتاییدا دەڵێم ئەگەر پرسێکی چارەنووسسازی وەک (دەستوور) لە قۆناغی نووسیندا پێویستی بە هەوڵی دڵسۆزانەی کارەکتەرەکانی (ڕووناکبیر، سیاسی، ئەکادیمی، ڕۆشنیر، مامۆستای زانکۆ، پیاوی ئایینی...هتد) هەبێت، ئەوا لە قۆناغی ڕاپرسیدا (بۆ کامڵبوونی شەرعیەتەکەی) پێویستی بە بەشداری تاک بە تاکی ھاونیشتمانیانی ھەرێمی کوردستان دەبێت بە هەموو پێکهاتەکانەوە (کورد و عەرەب و تورکمان و ئاشووری و کلدان...هتد) چونکە (دەستوور) بۆ ھەموو ھاونیشتمانیان دەبێت بەبێ جیاوازی و هاوشێوەی چەترێک دەبێت کە لەژێر سایەیدا ئەرک و ماف بۆ ھەموو هاونیشتمانییان پارێزراو دەبێت و ڕێز لە جیاوازییەکانیشیان دەگیرێت. [1]
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 515 keer bekeken
Schrijf uw commentaar over dit item!