=KTML_Bold=ئاڵاکەتان دەمێنێ=KTML_End=
#ئاڵا شاڵی#
ڕەنگە رێکەوت نەبێ کە من ناوم ئاڵایە. لە سروودی نیشتمانیی ئەی رەقیبدا یەکێک لەو شتانەی بەلای دانەرەکەیەوە زۆر گرنگ بووە ئەوە بووە کە نابێ ئاڵاکەمان بنەوێ. هەمان شت بۆ منیش راستە. من ئاڵای کوردستانم و نانەوێم. هۆیەکەشی ئەوەیە کە دڵی من لای گەلەکەمە و لەو دۆخە سەختەی تێیکەوتم ئەوانیش سەلماندیان دڵیان لەگەڵ منە. چەند خۆشە مرۆڤ رۆڵەی گەلێکی هێندە بەوەفا و دڵپاک و نەجیب بێت. چەند خۆشە کوردستان خۆشی بوێیت و لە تەنگانەدا ئەو خۆشەویستییەت پێشان بدات.
لەمڕۆژانەدا هەواڵی نەخۆشیی منتان لە رووداوەوە بیست. لەو کاردانەوانەوە کە هێشتاش بۆم دێن دەیبینم کە کوردستانەکەم چەندە بە وەفایە بۆ ئاڵاکەی. بەدرێژایی ژیانی پیشەییم لە هەر شوێنێکی دنیا پێویست بووبێ دەنگی کوردستان بم و هاواری گەلەکەم بگەیێنم گەیاندوومە. شەونخوونی زۆرم کێشاوە و ماوەی دوورودرێژ دوور لە خێزان و ئازیزانم لەپێناو کوردستان و بۆ خزمەتی کوردستان کارمکردووە و شەکەتیم نەناسیوە. بۆیە هاوکارەکانم بە گاڵتەوە پێیان دەگوتم تۆ مێسیی میدیای کوردیت. هەندێکیان لەوەش زیاتریان گوتووە و پێیان دەگوتم شێرەکەی میدیای کوردی. وشەی دڵگەرمکەر بوون، بەڵام زۆر کەسیش دەیانگوت خۆت بۆ چی و بۆ کێ ماندوو دەکەیت؟ سبەی هەمووان تۆیان لەبیردەچێتەوە. بەڵام من دڵنیابووم ئەمە راست نییە و هەمیشە زانیومە وڵاتی دیکە و گەلی دیکە بە هەزاران کەسیان هەیە کە کاریان بۆ بکەن، بەڵام هەستمکردووە کوردستان ئەو هەزاران کەسەی نییە و دەبێ شان بدەمە بەر ئەرکەکەم. هەرچەندە ئەمە زەحمەت بووە، بەڵام قەت ماندووێتیم نەناسیوە و لە ئایندەشدا نایناسم. هۆیەکەشی ئەوەیە کە وەفا و ئەمەکی گەلەکەمم بینی و دەمزانی ئەم گەلە شایانی باشترینە. شایانی ئەوەیە خۆتی تا سەر ئێسقان بۆ هیلاک بکەیت.
هەندێکجار لەگەڵ کاربەدەستانی ئەوروپی و رۆژئاوایی بەگشتی هەڤپەیڤینم هەبووە یان پرسیاری میدیاییم کردووە، ئەگەر زانیبێتم زۆر زانیارییان لەسەر کوردستان نییە یان زانیاریی هەڵەیان هەیە، دوای کاری میدیاییم بە دوور و درێژی لەگەڵیان دانیشتووم و شتەکانم بۆ روونکردوونەتەوە. ئەگەر شاندێکیان ویستبێتی بچێتە بەغدا 10 جار پرسیار بارانم کردوون و دڵنیاییم وەرگرتووە کە دەچنە #هەولێر#یش. ئەم ماوەیە کە نەخۆشم و شەڕی چاکبوونەوە دەکەم، بەو هەزاران پەیامانەی لە خەڵکی کوردستانەوە بۆم هاتوون، دڵنیاییم وەرگرتووە کە لەو شەڕەدا بەتەنیا نیم و دڵی هەمووان لەگەڵمە. من نازانم بە چ زمانێک و بە کام وشانە سوپاسی گەلەکەم بکەم. نازانم ئەو هەموو هێز و وزەیەی خەڵک پێیانداوم بە کام هێز و وزە وەڵامدەدرێتەوە. تەنیا ئەوە دەزانم کە کاتێک لە پەیامەکانتاندا بۆم دەنووسن: تۆ ئاڵاکەمانی، تۆ بەهێزیت و ئەمە تێدەپەڕێنیت، یەک وەڵامی روونم هەیە بۆیان: دڵنیابن تا ئێوە هەبن ئاڵاکەشتان هەیە و دەمێنێ. مامۆستا هێمن موکریانی قسەی دڵی منی کردووە و بە ئیجازەی ئەو بە گۆڕانکاریی وشەیەکەوە پەیامەکەمتان پێدەگەیەنم:
گەرچی تووشی رەنجەڕۆیی و حەسرەت و دەردم ئەمن
قەت لەدەست ئەم چەرخە سپڵە نابەزم، کوردم ئەمن. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 4 keer bekeken
Schrijf uw commentaar over dit item!