نامې: کەمال
نامۊ تاتەی: عەبدولکەریم
ساڵەو پېڎابییەی: 1932
ڕۊ مەرڎەی: #15-11-2014#
یاگۊ پېڎابېیەی: #سلېمانی#
یاگۊ مەرڎەی: #ئەڵمانیا#
$ژیۋاینامە$
نامې تەمامەش؛ کەمال عەبدولکەریم محەمەڎ فوئادەن، ساڵەو 1932 دلې شارو سلېمانی، جە بنەیانێ دېرینو ئی شارەیە کە بەڕەچەڵەک مەگېڵاوە سەرو بنەیانەو بابانەکانی، ئامان پېڎا. تەمەنو پاڼزە ساڵینە بە مەڵامەتو ویروباوەڕی ڕامیارش پېوەڼیش بە ڕیزەکانو پارتو کۊمۊنیستو ئېراقیۆ کەرڎەن. دلې شوېعیەکانە کۊششش کەرڎەن پەی ئانەی هەقو مافو میللەتو کورڎی دلې بەرنامەکەیشانە بسەلەمنۊ و جاگیرش بکەرۊن. حۆلې ئانەیش دێنې قەناعەت بە حېزبو شوېعی بارۊن کە بېجگە جە مەسەلې یەکسانی و داڎوەری، میللەتو کورڎی ئاتاجیش بە مافە فەرهەنگی و کەلتووری و زوانیەکا هەن، هەر پەوکەی پېسە وەرنیارێ کەردەنش بە پروژێوەو وستەنش وەردەمو حېزبو شوېعی.
ساڵەو 1952 بە نیازو وانای ئەندازیاری ڕوەو شارو بەغڎای مەلۊن. دمای ماوێ بە مەڵامەتو ژڵېوەی ڕامیاری دەسگیر مەکریۊن و پەی ماوەو دوې ساڵا دلې زیڼانینە حەبس مەکریۊن. دمای ڕۊشن بیەیۆ چېوەکا واز جە شوېعیەتی مارۊن و پېوەڼی مەکەرۊن بە پارتو دیموکراتو کورڎەسانیۆ. دماتەر ڕاو ئاوارەیی مەگېرۊنەوەر، ڕوەو ئەڵمانیا مەلۊن، ئەچاگە بڕوانامەو ماستەری سەرو (فۆنیمەکانو زوانی کورڎی) جە زانکۊ هامبۆرگی وەرمەگېرۊن. دماتەریچ تېزێ ئەکادیمی سەبارەت بە دەستنویس و قەباڵە کورڎییەکانی پېشکەش بە زانکۊی مەکەرۊن و بڕوانامەو دکتۆرای وەرمەگېرۊن. ساڵەو 1971 مەگېڵۊوە پەی بەغڎای و دلې زانکۊ بەغڎاینە بەشو زوانی کورڎی دلې کۊلیژو ئەدەبیاتینه مەرزیۊرە.
کەمال فوئاد، یۊن جە تاقمەو ئەرەمەرزنەکا یەکیەتی نیشتمانیی کورڎەسانی ساڵەو 1975، خولەو یەکەمینو پەرلەمانو کورڎەسانینە سەردارو فراکسیۊنو یەکیەتی نیشتمانی بییەن. پەی ماوێ کوڵی بییەن بە سەردارو پەرلەمانو کورڎەسانی، ساڵەو 1970 دوکتۊراش فەلسەفەنە بەدەست ئاوەرەن.
کەمال فوئاد، دلې شۆڕشو ئەیلولینەو دلې ڕیزەکانو پارتو دیموکراتو کورڎەسانینە کۊششی ڕامیاریش کەرڎەن و دماتەر دلې ڕیزەکانو یەکیەتی نیشتیمانی کورڎەسانینە درېژەش ئەپا کۊششیە دان.
بېجگە جە کاری ڕامیاری، دکتور کەمال خولیاو ئەدەبی و ڕۊنامەنویسی بییەن و ئەچا مێڎانەنە یاگە دەسش دیارەن. دیارتەرینو کاریش ئانە بییەن کە ساڵەو 1968 جە ئەڵمانیا ژمارەکانو ڕۊنامەو کورڎەسانیش ئېستېنێ و ساڵەو 1972 چاپېش کەردېنې.
بنەیانەو دکتور کەمال فوئادی هەر جە سەردەمو عوسمانیەکاوە یاگې ئیداریەشا بیېنەو خزمەتو سلېمانیشان کەرڎەن. ئی بنەیانە بە دڵسوزی و خەموەری وېشان حەزشان بە خزمەتکەرڎەی کورڎەسانی و شارو سلېمانی بییەن بە تاییبەتتی. دکتور کەمال فوئاد سەرەڕاو کاری ئەدەبی و ڕامیارش، دلې خەڵکیچەنە یاگێ دیارەش بیېنە، پېسە کەسێ هېمن و وەشڕووی، وەشەسیاو خەڵکی و کەسە نزیکەکاش بییەن، هەرگیز کاتو پېڎابییەو گرفتەکانە پەناش پەی تڼی و تووڕەیی نەبەردېنە، بە دڵێ گۆرەو فراوانۆ و بە ئەقڵ و ئاوەزێ ڕۊشنۆ چارەش پەی ئېستېنێ و ناستەنش بە بنبەس بیاوان. دکتور کەمال فوئاد جە گوفتەنە شیرین و نەرم و نیان، جە مێڎانەنە ئازاو قارەمان، چەنی خەڵکی خاکی، نموونەو کەسێ ڕامیاری هېمنی و ئەرەمەرزیای، مەرگی مەودا نەڎا زیاتەر خزمەت بە ویارو ئەدەب و فەرهەنگو میللەتەکەیش بکەرۊن، ئی سیاسەتمەدارو ڕۊشنویرە گۆرەو کورڎیە تاریخو (15-11-2014) جە وڵاتو ئەڵمانیای بە نەوەشی کۊچی دمایینش کەرد. [1]