هانەو قەڵەمیما دایېم پەی مەرگو ئازیزا ئینا کەمین و خرۆشەنە
دنیا بە ۋېنەی بازی سەرکەشەن، پەنج و دوو ڕۊژێ پەی کەسې وەشەن!!
کۊنە هەواراو عەشقی، ئاوەد٘انکەر و ئاوەد٘انیدەرتا لوا، شمە و ڕاویاریتا وەش!!
پېسە هەوارنشینێ ئی کۊنە هەواریە کە دەروونش جە سد٘او سیاوچەمانەو ئی ساحیب هەواریە کەیلوو ویرەوەریان، سەروەشی ئی کۆس و خەمە گۆرەیتا چەنە کەروو.
ئی وێنە ویس و یەکوو (21) مانگەو ژانویەی کە وەرانوەرا چەنی ئەوەڵ ڕۊ مانگەو ڕابرانوو وېما، یانې 44 ڕوێ وەڵێ مەرگیشەنە، مەریوانەنە وېم گېرت و کاتېو دیانې کزی و مات و مەلوولیشەرە و پېسە جوانیش خەڵکی تەموورە نەد٘ا بې و کەس نەبې دەورشەنە، جەرگم بی کەباب پەیش و دڵوو وېمەنە ئا تاقە بەیتێمە پەی واناوە و گلەیێ ڕۊزگاریم کەرد٘ێ و چەنی یۊ جە حەزوازاو دەنگیش تێر و پەڕ ناڕەحەتێش بییەیمێ!!
پەوچی هۆرم چنی و نیامەرە تاکو شاهێد٘ حاڵێوە عال بۊ پەی قسەکام و ڕاو هیچ قسه و باسێوە نازۆوە پەی کەسی!!
ئەچی چڼ ڕوەنە کە مامۊسای پایە بەرز، مامۊسا جەمیل نۆسووڎە٘ی هونەرمەڼی گۆرەو هۆرامانی بە ڕەحمەتوو خود٘ای گۆرەی شی، دنیا و مەملەکەت هەر جە ئەنجمەن و بنکە و بارەگاوە گېرەش پەنە تاکو یاوۆ لاو شوانە و وەزیری!! بییێ دەم و زوان و تاکو حەز کەری چنیشا باڵاشەرە - هەرچڼ شان و شەوکەتوو مامۊسا جەمیلی فرە فرەتەر چانەی وازێ - کە ئەر کاتو حەیاتیشەنە ئانېشە بە چەم دېیەنێ یا بە گۊش ئەژنەویەنېش یا وەشیێنە شاد٘ی مەرگ بې یا سەد٘ و ویس ساڵې زېیاتەر عەمر کەرې!!
وەلحاسڵ جە هیچ وەسف و ستایشێوە درێغشا نەکەرد٘، پېسە: هونەرمەڼی نەتەوەیی، هونەرمەڼی پېشمەرگەی، گۊرانی واچی مللی، هونەرمەڼی نیشتمان پەروەری، خود٘او سیاوچەمانەی، سانوو سیاوچەمانەی، کۊڵەکې گۊرانیێ کورد٘یێ، کۊڵەکې قایمەو سیاوچەمانەی، گڵو (حەنجەرە) زەڕین/ سێحراوی/ بې وێنە/ ئالتوونی، ئۆستوورەو سۊز و ئاوازی و سیاوچەمانەی، جەمیلوو خیاڵ و ئاواتی، تاقانە شۆڕە سواروو ئاسمانوو هونەری، هەسارەی زەڕینوو ئاسمانوو هونەری، تاقانە مامۊساو گۊرانیێ، مامۊسای هۆردەس و پایە بەرز، بڵبڵوو هۆرامانی، ئۊسا دیواری هێقموو یانەو گۊرانیێ هۆرامیێ، میراسبەر و میراسداروو پاشکەوتوو گۊرانیێ هۆرامیێ بە بارساو شاهۆی و شاهۆڵەی، هونەر و شەرافتش بە زەڕ مامەڵە نەکەرد٘ێ و نەورەتێ، بە سەربەرزی ژیوا و بە سەربەرزی سەرەش نیاوە، بەقی دەنگ وەش، هونەرمەڼی مەحبووب و وەشەویس و تاقانە، هېماو پێوەنوو هونەروو ئارۊی و دماڕۆیما چەنی تارێخی و فەرهەنگی و فولکلۆڕی وجۊغرافیایما، مەڵهەموو زاما، پاتشاو دڵا، خونیاگەروو عەشقی و وەشەویسی، همێد٘ و هامدەمو خەڵوەت و تەنیایی و ...
هەرپاسە مەرگیچش بە کۆسی گۆرەی نەتەوەیی، خەساری گۆرەی نەتەوەیی، وڕارەی کۊڵەکې عەمارەتوو گۊرانیێ و دەها واتە و واتیلێتەرێ دریا قەڵەم کە ئەچېگەنە لازم نییا بە قەتار ڕزشا دەو و ونارووشا!!
خۆ مەرام ئانە نییا واچمێ ئی سۊز و لاونای و وەسف و ستایشە خراب و بې یاگەن، بەڵکوو فرەیچ عال و بە یاگە و نیشانێ قەد٘ر شناسینه، بەڵام هەر ئەجۊ قەڵەمێ ئی میللەتیە و ساحیب قەڵەمێ ئی وەڵاتیە، دایېم ئینێ کەمینەنە تاکو مێرد٘ەزمەو مەرگی بەرەکەو یۊیما گېرۆ و قەباڵەو ژیوایما پېچۊوە و ئیجا هانەشا تەقۊ و بەیا شان و باڵمارە و واچا ئینە شاخش بې و ئانه باڵش بې!!
ئەر سەد٘ەنە یەکوو ئانەی کە پەی مەرگو مامۊسا جەمیلی کریا، کاتو حەیاتیشەنە کریایە، دڵنیانا دەینوو وېما بە گاما ئارد٘ەبێ و دەسەواموو شاد٘یەکاما کە زەماوڼ و مەجلێس و دیوان و کۊنیشتەکانە ئی ئینسانە ڕۊح سووکە بې ئەسباب و منەت خەڵات و پېشکەشما کەرې، کاتو گرفتاریشەنە دابێماوە و ئێتر ئیسە بې خەم دەس نیێنمێ چېرو سەرەیما و وېما بە قەرزار و دەیندارش نەزانېنمێ!! ئەر شۊنۊ مەرگیشەرە هەزار ئاڼەتەر چنمێ باڵاشەره و بارمێ هەڕەو دنیای گېرمێوە و کەرمېش سەرەمارە ئەپانەی نەئێژێ کاتېو وېش حەیاتەنە بې خزمەتېوەش کەرمې و بەجۊرێ دڵش وەش کەرمې!
ڕەنگا فەرماودێ خۊ پەیش کریان، منیچ ماچوو ڕاسا کریان، بەڵام ئانە کە پەیش کریان بەپاو ئا خزمەتە هونەریەیە کە ئاد٘ی خەڵاتوو ئی میللەتیشە کەرد٘ەن و بەپاو ئا ستایشا کە ئەچی چڼ ڕۊنە چەنەش کریە، هەر هیچ نییا و خاڵانەو دڵۆپ و دەریایا!!
ئەی ئا کەسا کە ئارۊ شمە بە گۊرانی واچی نەتەوەیی، مللی، پېشمەرگە و ... وەسفش کەرڎې و مد٘ەیدێش قەڵەم و پەرسېشەنە بڵەنگۆ نمەد٘ەیدێ وەرو کەسی وە و یانەنە نیشدێرە و وەرو پریستیژوو وېتا چندێ باڵاشەرە، ئایا کەڕەتێ سلېمانی و هەولێر و سنە و مەهاباد و دهۊک و کەرکووک و کرماشان و ... ڕا و ڕەسمێوە قەد٘ر گېرتەیتا پەی گېرت کە لایقوو کەسیەتی هونەریش بۊ؟ ئایا یەک جار ئیزنتا دا بە وېتا یاگېوە عێلمیە و ئاکادێمیکەنە بە ئاماد٘ە بییەو زانایا و شارەزایاو گۊرانیێ و مووسیقی کۊنیشت و کۊنگرێوە زانشتی گېردێ پەی هەرمانە هونەریەکاش و شەرح و وەڵامێوە عێلمی و زانشتیشا سەر کەرڎې تاکو دەرد٘ەو چینو دماڕۆیما وەرۆ؟ ئایا کاتو نەوەشیشەنە دەسبار و دەسگرۆیتا کەرد٘ و تاواتا زەحمەت دەیدێ بە وېتا و سەرش دەیدێ وەنە و بیدێ مەڵهەموو سەرو زامە ناسۆرەکاش؟ ئایا کاناڵە تەلەفزیۆنیەکاتانە کە فرێ و فراوانێنێ و گېیاندار و بې گېیان کەرڎېوە سەر! تاواتا تەنیا یەک جار خوڵکەش کەرڎې و بە قەد٘ر و ئێحتێرام بەرنامۊە ڕېک و پێکش پەی گېردێ؟ ئایا تەنیا پەی یەک جاری تاواتا عێوەزاو ئا گرڎ٘ شاد٘ی و وەشییا کە زېیاتەر جە پەنجا ساڵا بە دەسی هاڵی و بەبې ئێمکانات، دلې مەجلێس و زەماوڼەکانە خەڵاتوو میللەتیش کەرد٘ێ، دەیدېوە؟ ئەی ئەچا کات و ساتانە کە مامۊسا جەمیل ناکۆک بې و چەنی مەرگی بینەبەزنێنە بې و ڕەنگا تاخایت زەڕوو ئەسای دەوا و دەرمانی نەبییە بۊ باخەڵەشەنە، چڼ هەیئەتێتا کیاستێ خزمەتش یا وېتا چڼ کەڕەتێ ئامایدێ خزمەتش تاکو بزاندێ حاڵ و ڕۊزگارش چېشا و گوزەرانش چەنی ویەرۆ؟
ئەی پەی ترۆقی یا برەو هونەر و میراسەکەیش چېش؟ ئایا تاکو ئیسە هەنگامېوەتا هۆرگېرتێنە کە دەرد٘ەو دماڕۆ هونەر و میراسەکەیش وەرۆ؟ ئەی تاکو ئیسە خزمەتتا پەی مامۊسا جەمیلی و کاسانېوە پېسە مامۊسا جەمیلی کە شەو و ڕۊ و بە ئەوپەڕوو دڵسۊزیوە خەریکېنې خزمەت کەرا بە میللەتەکەیشا چېش بېیەن و کاما کە وېتا پاڵشەنه هۆرکېشدێ و پېسە هونەرمەڼی مللی و نەتەوەیی مد٘ەیدێش قەڵەم؟ هونەرمەڼی مللی و نەتەوەیی، مشیۊم قەد٘ر و حورمەتی مللی و نەتەوییش گیریۆ! و ...
بازەش با زامێم فرەتەر نەکولیاوە و پېسە مامۊسا جەمیل فەرماوێ: هەر کاتېو مەرد٘ا وزدێمۆ لارە/ با زۆخاوەکېم بەیا کریارە!!!
بەڵې، ئەر من واچوو هونەرمەڼی نەتەوەیی بېیەن ڕاسا، نەک تۊ، دەلیلەم هەنە؛ چوون پەی میللەتیش و دلې میللەتیشەنە ژیوا و شاد٘ی و شیوەنوو خەڵکیشەنە شەریک بې و پەی زەڕ و زۊری و ماڵوو دنیای نە خەڵک و میللەتش کەرد٘ش وەسیلە و پلەکانی، نە پەشتیش کەرد٘ە جە میللەتیش و نە هونەرش ورەتش! ئاد٘ بې و هەناسە و گڵوێوە خود٘اییە و تاکو دما ساتوو حەیاتیش پەی وەشی و شاد٘ی میللەتیش بە هەناسەکەیش و گڵوەکېش کۊشییا و جە هیچی درێغش نەکەرد٘ و ئاخریچش هەر باوەشەو میللەتیشەنە سەیاوە و ئارامش گېرت و دەسەوامش دریاوە!
مامۊسا جەمیل عەمرێ وېش وست زەحمەت پەی وەشی خەڵکیش، بەڵام خەڵکش نەوست زەحمەت پەی وەشی وېش! ئاد٘ نانوو گڵوېش وارد٘ش و دەسش نەدارارە هیچ ناکەسېوە و سەربەرز و ڕوو سوور ژیوا و سەربەرز و ڕوو سووریچ سەرەش نیاوە!
مەرگو مامۊسا جەمیلی پەیش سەلەمنایمێ کە وەشەویسی نە بە زەڕ تاوی بسانیش، نە بە زۊر و تاکو دلې خەڵکینه وېت نەتاونیوە و چەنی هەناسەکاشا هام هەناسه نەبی، پێسه بوژانەو چنووری بوەو وەشەویسیشا باقە نمەکەرا پەیت!
مەرگو مامۊسا جەمیلی پەیش سەلەمنایمێ، چەنی خەڵکی بییەی و پەی خەڵکی بییەی، گەورتەرین سەرمایە و شانازی و سەربەرزیا پەی ئینسانی و ماباقی چېوەکا هیچێ نېیەنێ!
مەرگو مامۊسا جەمیلی پەیش سەلەمنایمێ کە فرەو کاتی لەیلې هەقەتینێ کەمێنێ و ئەر سەد٘ جار قەبرەکېت کەنا و ئەلحەد٘ێت بازا، بە دەسشا کەفەنت پەی نمەورازا!! قەبرەکېم کەندێ، ئەلحەد٘ێم بازدێ/ کەفەنم بە دەس لەیلې ورازدێ!!
دما واتە: بە دڵ سپاس و دەسوەشی گرڎ٘وو ئا ئازیز و وەشەویسا کەروو کە دایېم بې ئەسباب و منەت خزمەتوو ساحیب هونەرا کەرا بە عام و هینوو مامۊسا جەمیلیشا کەرد٘ بە تاییبەت و نویستەی ئی دەرد٘ە دڵیە کە بڕێ ئازیزێچ ئەچی چڼ ڕۊنە پېسە ڕەخنەی ئیشارەتشا پەنە فەرماوا، گرەوای پەی هیزی و ۋېیەرد٘ەی نیا، بەڵکوو پێغام و وەرنیارا پەی دماڕۆی کە تاکو ساحیب هونەرێ و ساحیب ئاوەزێ و ساحیب قەڵەمێ مەنێنێ و ئینێ حەیاتەنە، قەد٘رشا گېرمێ و نازمێ بې نازێ با؛ ئێڼا شۊنۊ وېشارە هەرچی کەری پېسەنە دنگەنە ئاوی کوی و خاڵانەو وارد٘ەی دەوایا شۊنۊ مەرگو زۊرابیرە!!
سوبحان ئەمینی.[1]