[1]

بەڕێز بافڵ #جەلال تاڵەبانی# سەرۆکی یەکێتیی نیشتمانیی کوردستان
بەڕێزان ئەندامان و لایەنگران و کەسوکاری شەهیدانی #یەکێتیی نیشتمانیی کوردستان#

سڵاوی خەبات و تێکۆشانتان لێبێت
ڕۆژی 1ی حوزەیران ڕۆژێکی گرنگ و پڕبایەخی مێژووی گەلەکەمانە، کە ڕۆژی دامەزراندنی یەکێتیی نیشتمانیی کوردستان و دەستپێکردنی خەباتێکی مەزنی شۆڕشگێڕانەیە لەپێناو ئازادی نیشتماندا.
49 ساڵ لەمەوبەر یەکێتیی نیشتمانیی کوردستان بە ڕابەرایەتی سەرکردە و سیاسەتمەداری کۆچکردوو سەرۆک #مام جەلال# و بە پشتیووانی و هاوخەباتیی سەرکردەکانی دامەزرێنەر و پێشمەرگە و ئەندامان و کۆمەڵانی خەڵکی کوردستان، کاروانی تێکۆشان بۆ بەدیهێنانی ئامانجە باڵا و ستراتیژییەکانی گەلەکەمان کەوتەڕێ و لەم پێناوەشدا هەزاران ڕۆڵەی نیشتمان گیانیان بەخشی و بە خوێنی خۆیان ڕووبەڕووی ستەمکاری و دیکتاتۆرییەت بونەوە.
یەکێتیی نیشتمانیی کوردستان هەر لە سەرەتای دروستبونیەوە بڕوای تەواوی بە بەدیهێنانی دیموکراسی و ئاشتی و مافەکانی مرۆڤ هەبووە، لە خەباتکردن بۆ ئەو ئامانجانە جیاوازی لەنێوان ڕۆڵەکانی نیشتماندا نەکردوە، هەر ئەوەش وایکردوە کە پێگەی لە کوردستان و عێراقدا هەمیشە بەهێزبێت و کاریگەر بێت.
یەکێتیی نیشتمانیی کوردستان هەمیشە ئامادەیی تەواوی هەبوە لە قۆناغە جیاوازەکاندا، هەم لە ڕووبەڕووبونەوەی دیکتاتۆریەت، هەم لە دروستکردنی قەوارەی هەرێمی کوردستان و دواتریش لە بونیادنانی عێراقی نوێدا، ئێستاش بە لەبەرچاوگرتنی ڕۆڵ و پێگە بەهێزەکەی و ئەزمون و خەباتی بەردەوامی، لە قۆناغێکی مێژووییدایە تا بە هاوئاهەنگی لەگەڵ سەرجەم هێز و لایەنە نیشتمانییەکان درێژە بە خەبات بدات بۆ سەقامگیریی زیاتر و ئاوەدانی و چەسپاندنی دیموکراسی لە وڵات و دابینکردنی ژیانێکی شایستە و شکۆمەندانە بۆ هاووڵاتیان. [1]
لەم بۆنەیەدا هیوای بەردەوامی و گەشەکردنی زیاترتان بۆ دەخوازم، هەمیشە هەر شاد و سەربەرز و سەرکەوتوبن.

د.#لەتیف جەمال ڕەشید#
سەرۆک کۆماری عیراق
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

کۆمەڵانی خەڵکی کوردستان
کەسوکاری سەربەرزی شەهیدان

هەڤاڵانی یەکێتیی لە سەرجەم بوارەکانی خەباتی پێشمەرگایەتی، ڕێکخراوەیی و دیموکراتی، بە دێرین و نوێوە
بە سڵاوێکی گەرمەوە پیرۆزبایی 49 ساڵەی دامەزراندن و 48 ساڵەی دەسپێکی شۆڕشی نوێتان لێ دەکەین کە دوو بۆنەی گەورەن لە مێژووی کوردستان و عیراق و لە مێژووی خەباتی دیموکراتی گەلانی ئازادیخوازدا، بۆنەی ڕاگەیاندنی تەرزێکی نوێی خەباتی سیاسی و ڕێکخراوەیی لە بزووتنەوەی ڕزگاریخوازی گەلەکەمان و بۆنەی جاڕدانی شۆڕشێکی هەمەلایەنەی جەماوەری کە لەناو جەرگەی هەرەسی ناڕەوادا، دڕی بە شەوەزەنگی نا ئومێدی دا و چرای ڕۆشنی ڕێگای ئازادی هەڵکرد، ڕاستەڕێی ستراتیژی (ئاشتی، دیموکراسی و مافی مرۆڤ و چارەی خۆنوسین) بەرەو سەرکەوتن گرتەبەر.
لە ماوەیەکی کەمدا پریشکی بڵێسەی ئەم تێکۆشانە چروپڕەی یەکێتیی و شۆڕشەکەی بە ڕێبەرایەتی سەرۆکی نەمر #مام جەلال# و هەڤاڵانی دامەزرێنەر و تێکۆشەرانی ناوەوەی وڵات، چیا سەرکەشەکانی کوردستان و کۆری تینووی خەباتی ناوەوە و دەرەوە و گشت کایەکانی سیاسی و دیبلۆماسی و ڕاگەیاندنی ئاوەدانکردەوە.
ئەم کاروانە شۆڕشگێڕییە هەموو بەربەست و پلانەکانی دوژمنان و داگیرکەری فاشتی تێکشکاند و تێپەڕاند. درێژترین ڕوباری خوێنی شەهیدانی کردە خەڵاتی میللەتەکەمان و هەرگیز نەسرەوت تا سەرکەوت لە ڕاپەڕینی ڕزگاری کوردستان، تا مژدەی ڕوخانی دیکتاتۆری #بەعس#ی کردە ڕاستی و داخوازی گەلەکەمانی لە وڵاتێکی دەستوری و فیدرالیدا هێنایەدی و گەیاندیە کەناری ئارامی و ئازادی.

خوشک و برایەنی خۆشەویست
ئەمڕۆ یەکێتیی نیشتمانیی کوردستان بە سەربەرزییەوە یادی (49) ساڵەی دامەزراندنی وەک بۆنەیەکی میللی و نەتەوەیی مەزن دەبینێ کە هەموو چین و توێژەکانی میللەتەکەمان هەقی خۆیانە خاوەندارێتی لێ بکەن و شانازی پێوە بکەن، چونکە ئەم هەموو ڕەنج و قوربانییە بۆ ئەوان و بەوان جێبەجێ کراوە و سەرخراوە. چونکە شەهیدانی یەکێتی، پێشمەرگە قارەمانەکانی سەنگەری نەبەردی و نەبەزین، هەڤاڵانی زیندان و ڕێکخستنەکان، ژنانی ئازا و تێکۆشەری ڕووسووری خەباتی یەکسانی و یەکێتی، هەر هەموویان لە چاکترین ڕۆڵەکانی ئەم گەلەن و بە ناوی یەکێتییەوە ئەم ئەرکە پیرۆزەیان ڕاپەڕاندووە. بۆیە یەکێتی ئەم یادە پیرۆزە دەکاتە دەرفەت بۆ جۆشدانەوەی خەبات لە پێناوی ئاسۆی ژیانی نەوەکانی داهاتوومان لە کچان و کوڕانی کوردەواری و وەک هەمیشە، بێ سڵەمینەوە بۆ پێشەوە دەڕوا و ئاور لە دواوە ناداتەوە، مەگەر بۆ پێزانینی تێکۆشانی ڕابردوو و ئیلهام وەرگرتن بۆ خەباتی لەمەودوا نەبێت.

جەماوەری سەرفرازی کوردستان
هەموولەیەک دەزانن ئێستا گەلەکەمان و ئەزموونە خۆماڵییەکەی ، لە بەردەم دووڕیانێکی چارەنووسسازدایە کە پێویستی بە سازدانەوە، پەرەپێدان و ڕاستکردنەوەی ڕێڕەوەکەی هەیە. باشترین ڕێگاچارەی ئاشتی و دیموکراتیش بۆ ئەم ئامانجە ڕەوایانە هەڵبژاردنێکی پاک و بێگەردە کە پەرلەمان و حکومەتێکی نوێی ئەوتۆ بێنێتەکایەوە دەرەقەتی ئەرکەکانی قۆناغ بێت و بە دەنگی ئازادی خەڵکی دەرفەتی حکومەتێکی خزمەتگوزارتر برەخسێنێ کە داکۆکی و پێداگری لەسەر ئیستحقاقە نەتەوەیی و دەستوری و دیموکراتییەکانی کورد لە بەغدا بکا و بە یەکگرتوویی و بەرپرسیارێتیەوە هەڕەشەکانی بەردەم قەوارەی هەرێمی کوردستان، لە هەرکوێوە بێت، لە قاوبدات.
ئەمڕۆ پشتبەستوو بە ئیرادەی دەنگدەران و بەو ڕاستییە درەوشاوەی سەرۆک بافڵ #جەلال تاڵەبانی# تەئکیدی لەسەر کردەوە کە (یەکێتی مێژووە، یەکێتی خوێنی شەهیدە، یەکێتی قوربانی و یەکێتی هێزە) ڕووی بانگەوازمان لە کۆمەڵانی خەڵکی کوردستان ، بە پێکهاتە نەتەوەیی و ئاینییەکان و چین و توێژەکانێتی، بە تایبەتی ژنان و لاوەکانمان کە لەم وێستگە دیموکراتییەی هەڵبژاردندا بە جۆش و خرۆشەوە بێنە کۆڕی هەڵبژاردنەوە و پەنجەمۆری خۆیان لە داهاتووی خۆیان بدەن، متمانە بە یەکێتییە سەرسەخت و سەر ڕاستەکەی خۆیان نوێبکەنەوە. کە دیرۆکی نزیکەی نیو سەدە ئەم متمانەیە پتەوتر دەکات لە سایەی یەکێتی هەڵوێست و یەکێتی ڕیزەکانی ئەمرۆی هەڤاڵاندا، لە سایەی گەڕانەوەی هەر ئێستای بەڵانسی هێز و ئیرادە لە کوردستان و گێڕانەوەی سەنگی یەکێتی و کورد لەناو ڕاڕەوە سیاسییەکانی بەغدا و پایتەختەکانی سیاسەتی نێودەوڵەتی، لەسەر ڕێبازی ئاوەدانی سەرۆک مام جەلال. بەتایبەتر کە ڕەوتی ڕووداوەکان سەلماندویانە ، پاڵپشت بە پشتیوانی جەماوەرەکەمان ، هەرچی کراوە پێشەنگێتی یەکێتی کردوویەتی و هەرچی ماوە لە ئەرکی چاکسازی و ئاوەدانی و خزمەتی کۆمەڵگەی کوردستان هەر بە یەکێتی دەکرێت، بە هاوکاری و بەشداری کارای هێزە دەربەستەکانی ئەزموونی دیموکراتی کوردستان کە یەکێتی هەمیشە لەگەڵ تەبایی و سازانی نیشتمانیدایە و لەم یادە پڕ شکۆیەشدا تەئکید لەسەر ئەو پرەنسیبانە دەکاتەوە.

پیرۆزە یادی یەکێتییەکەی خۆتان.
سەرکەوێ کاروانی خەباتی پێنج دەیەی میللەتەکەمان بە ڕابەرایەتی یەکێتیی نیشتمانیی کوردستان
درود بۆ گیانی پاکی شەهیدانی شۆڕشی نوێ و گەلەکەمان، شەهیدانی کورد و کوردستان ، لە سەروی هەمووشیانەوە گیانی پاکی شکۆی نەتەوە و نیشتمان، سەرۆک مام جەلال.[1]

مەکتەبی سیاسی
#یەکێتیی نیشتمانیی کوردستان#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=