ئاهووی سەریاسان...
ئەچی چن بەیتە شېعرېنە، میرزا ئۆلقاڎر تاریفۍ وەشەویسەکېش مڎۊ، بە تەرزێ ناسک، شاعېرانە، عاشقانە، وېناش کەرۊن بە ئاهووی خووتەن گېڵ، بە ئاسکەی جە سا سڵکەرە، لەیلۍ دەماخ بەرزە، باڵا زەڕستوونە، تەرسای شېخ جە دین بەرکەرە.
ئاهووی سەریاسان ئاهووی سەریاسان
ئەی سەردار سان سوپای خاڵخاسان
ئەی موعەبیر موشک شای مودبر ناسان
ئەی غەزاڵەی چین ئاهووی سەریاسان
ئەی نۊبەر نەمام نۊڕەسیدەی نۊ
واچە من جە کۊ، دووری تۊ جە کۊ
ئەی جەیران ئاسای شوخ نەسا سڵ
ئەی نیم نیگای ناز دەوای دەرد دڵ
ئەی شفای زامان جەستەی خەستەی من
ئەی دەرمان زام ماران گەستەی من
ئەی لەیلی دەماخ باڵا زەڕ ستوون
ئەی مایەی مەینەت مەجنوونی مەجنوون
ئەی تەرسا نەژاد شۊخ بېپەردە
ئەی شېخ سەنعان جە دین بەرکەردە.[1]