ناونیشانی بابەت: دراو و شمشێری کەریمخانی زەند... ئەو کوردەی فەرمانڕوایی ئێرانی دەکرد
ئامادەکردنی: #محەمەد هەسنانی#
بەدرێژایی مێژوو کورد پێگەی بەهێزی هەبووە لە گرتنەدەستی دەسەڵات و پاشایەتی و میرنشینی، یەکێک لەوانەش کەریمخانی زەندە، کە وەک کوردێک توانیویەتی چەندین ساڵ وەک پاشایەک فەڕمانڕەوایی وڵاتێکی وەک ئێران بکات و لە سەردەمی دەسەڵاتیدا دادوەری و ئاسایش سەرانسەری ئەو وڵاتە بگرێتەوە.
لە کۆنەوە هەر دەسەڵاتدارێک هەوڵی داوە جگە لە ئەمن و ئاسایشی وڵات، بایەخ بە ئابووری و بووژانەوە بدەن و سکە و دراوی تایبەت بە فەرمانڕەوایی خۆیان هەبێت، هەروەک کەریم خانی زەند، کە دراوی تایبەت بە خۆی هەبووە و دوای تێپەڕبوونی سەدان ساڵ بەسەر فەرمانڕەوایەتییەکەی، تا ئێستا دراوەکەی پارێزراوە، لەگەڵ ئەوەشدا، لەسەر گۆڕ و ئارامگای لە شاری شیراز، شمشێر و ئەو کەرستە سەربازییانەی، کە بەکاری هێناون، دانراون.
بەپێی سەرچاوەی زانیاریی مێژوویی، کەریم خانی زەند، کەسایەتیی ناوداری زەندی، کە هۆزێکی گەورەی عەشرەتی (لەکە) و لە گوندێکی ناوچەی مەلایەر لەدایک بووە، ئەو کاتەی نادر شای ئەفشار خاکی لوڕ و بەختیاریی خستە ژێر رکێفی خۆیەوە، کەریم خان دەچێتە ناو ریزی سوپاکەیەوە و پلەکان دەبڕێت تا دەگاتە پلەی سەرکردەی سوپا، دوای لەناوچوونی نادرشا، پشێوی و پاشاگەردانی ئێران دەگرێتەوە، کەریم خان توانی لەو بارە دژوارەدا دەسەڵاتی زەندییەکان دامەزرێنێ و فەرمانڕەوایی ئێران بکات، لەگەڵ ئەوەشدا، نەیهێشت پێی بڵێن پاشا، هەمیشە خۆی بە خزمەتکاری گەل زانیوە.
لە ماوەی 33 ساڵی دەسەڵاتی #کەریم خانی زەند#دا، دادوەری و ئاسایش سەرانسەری ئێران دەگرێتەوە، هەرچەندە کەریم خان نەخوێندەوار بوو، بەڵام لە بەڕێوەبردنی کاروباری دەوڵەتدا لێهاتوو بووە، لەگەڵ دوژمنەکانی نەرمونیان و لێبوردە بووە. لە ساڵی 1779 کۆچی دوایی کردووە، دوای مردنی جارێکی دیکە نائارامی و شەڕ و کوشتار لە ئێراندا سەری هەڵداوەتەوە. [1]

=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=