هۊرچنیەی دروێوە جە دروەکا دنیاو سیاسەتی
نویستەی: #ئیبراهیم میکە عەلی#
ئیدوارد برنیز: بەینو ساڵەکا (1891 - 1995) ینە ژیوان، کەسی نەوینیا و کاریگەر دلیٛ دنیای موٙدیٛڕنیٛنە، بەڕۍگەزنامە ئەمریکی و بەبنەچە نەمسایین.
ئی پیا بە شارەزا و هەرپاسە بە تاتەو پڕوپاگەندەی و هەرمانکەردەی سەرو فاڕای ویرۆکەردەی دەسەجەمعی خەڵکی و بنەڕەت ئەرەمەرزنو پەیوەندیە گردینیەکا منریوٙرە.
واڵەزاو سیغموند فرۆیدین و یوٙن چا سەڎ کەسەیە هەکە سەدەی وېیەردەنە کاریگەریی فرەشا بېیەن سەرو دنیاوینی گردینی (ڕای گشتی) و کەڵکی فرەش هورگیٛرتەن جە زانشتو دەرونشیکاریی و زانشتو گلیٛرگە ئەژناسی جە ویاری گردینینە.
تەمەنو (103) ساڵەینە مەردەن و هەتا ساڵێ وەڵیٛ مەردەیشەنە سەرەمڕە مەژگش هەرمانەش کەردیٛنە و نەخشیٛش متیٛنیٛرە پەی هەرمانکەردەی سەرو دنیاوینی خەڵکی فرەو ویارەکانە.
یوٙ جە قسە و لەیەکدایۆکاشەنە ماچوٙ: دیموکراسیەت و هورچنیەی، یوٙن جە زلتەرینو ئا فیٛڵا هەکە کریێنیٛ ئەو گلیٛرگەکا و مروٙڤایەتی بەگردی، چوونکە چا ڕېوە خەڵکی داماگی پاسە حاڵی کەرا هەکە گوایا ویٛش نویٛنەریٛ ویٛش هورچنوٙ، جەوەختێنە هەکە پەیش هورچنیا و بڕیا ملشەرە، وەلێم فیٛڵەکیٛ ئیٛنڎە کاریگەرەنە کابرا ئەجوٙش ویٛش بەدەسو ویٛش هورشا چنوٙ.
ڕاسەش و پاکەش ئانیٛنە هەکە هورچنیەیچ حەر دروېوەنە جە دروەکا تەرو دنیاو سیاسەتی.[1]