- دەیان چەکداری #داعش# کاتژمێر 3:30 بەیانی هێرشیانکردەسەر #کەرکووک#. لەم هێرشەدا گەڕەکی حەی عەسکەری و وێزگەی کارەبای دوبز و چەند بنکەیەکی پۆلیس و بارەگای یەکێتی کرایە ئامانج، زۆرتر لە دە چەکداری داعش کوژران و لە بنکەی کارەبای دوبزیش زۆرتر لە دە کارمەند کوژران کە هەموویان عەرەب و ئێرانی بوون.
- قەدەغەکردنی هاتووچۆ لە کەرکووک ڕاگەیەندرا و نوێژی هەینیش لە مزگەوتەکاندا ناکرێت و هەموو مزگەوتەکان داخران تاوەکو داعش منارەی مزگەوتەکان بۆ هێرشکردن بەکارنەهێنێت.
- داعش #قەرەتەپە#ی کۆنتڕۆڵکرد و پاشانیش پێشمەرگە ڕزگاری کردەوە.
- هێرشی داعش بۆسەر #داقوق# تێکشێنرا.
- لە هێرشەکەی ئەمڕۆی داعش بۆسەر کەرکووک زۆرتر لە 50 کەس برینداربوون و ژمارەیەک شەهیدیش هەیە.
- هێزێکی‌ سەر بە پارتی‌ کرێکارانی‌ کوردستان (#پەکەکە#) ئەمڕۆ ڕەوانەی‌ سەنتەری‌ کەرکووک کران، بۆ پاڵپشتیکردنی‌ ئەو هێزانەی‌ ڕوبەڕووی‌ چەکدارانی‌ داعش بونەتەوە لەچەند شوێنێکی‌ شارەکە.
- فڕۆکەیەکی‌ نەناسراو تەکییەکی‌ تایبەت بە نەتەوەی‌ تورکمانی‌ شیعە مەزهەب لە قەزای‌ داقوق بۆردوومانکرد کە زیاتر ژنان سەردانی‌ دەکەن بەمەبەستی‌ خواپەرستی‌ بەهۆیەوە زیاتر لە 50 کوژراو و برینداری‌ لێکەوتەوە.
- چەکدارانی داعش لە میحوەری مەخمور هێرشیانکردە سەر سەنگەرەکانی پێشمەرگە، هێزەکانی پێشمەرگەش بە توندی وەڵامیاندانەوە و هێرشەکەیان تێکشکاند.
- ئەمڕۆ #عەبدوللەتیف سەلەفی#، کەسایەتی دیاری سەلەفییەکانی کوردستان دوای ماوەیەک دروخستنەوەی لە کارەکەی وەک وتارخوێنی مزگەوتی بەهەشت دەستی بە وتاردان کردەوە، بەڕێوەبەری ئەوقافی سلێمانیش دەڵێت، ئیجرائاتی یاسای لەگەڵ دەکەین.[1]

ئاژانسی پاراستن و زانیاری \ زانیاری هەرێمی‌ کوردستان ڕایگەیاند، ئه و چەکدارانەی‌ داعش کە هەینی‌ ڕابردوو چەند هێرشێکیان لەناو کەرکووک ئەنجامدا هەڵبژاردەیەک بوونە لە کەتیبە ئینغماسی و خۆکوژییەکانی ئه و ڕێکخراوه و "لە حەویجەوە نێردران بۆ سنوری داقوق و لەوێشەوە بە حەوت پاسی نەفەرهەڵگری بچوک لە سەعات سێی بەرەبەیان، گەیەندرانە ناو شار".
ئاژانسەکە ئەمڕۆ لە ڕاگەیەنراوێکدا کە وێنەیەکی‌ بۆ خەندان نێردراوە ئاماژەی‌ بەوەکردووە "بە مەبەستی کەمکردنەوەی گوشار لەسەر سەرکردایەتی داعش لە شاری موسڵ و، بۆ تێکدانی باری سەقامگیریی کەرکووک و، لەئەگەری سەرکەوتنیشیاندا بۆ شکاندنی قەڵغانی بەرگریی لە کوردستانیبونی شارەکە، گروپی تیرۆریستیی داعش لە ڕۆژی 15ی 10ی 2016، پیلانی هێرشکردنە سەر شاری کەرکووکیان داڕشت".
ئەوەشی‌ خستووەتەڕوو"بەپێی زانیارییە پشتڕاستکراوەکان، ئەم ئۆپەراسیۆنە نەگریسەی داعش، بە ڕێنمایی سەرکردایەتی باڵای گروپەکە، و لەلایەن (ئەبو ئەحمەد) کە بەرپرسی ئەم ئۆپەراسیۆنەیە، بەرنامەی بۆ داڕێژرابوو".
دەستپێکی‌ هێرشەکانی‌ داعش لەکەرکووک کاتژمێر 3:30 بەرەبەیانی‌ هەینی بوو، کاتێک ژمارەیەک خۆکوژی‌ داعش هێرشیان کردەسەر بینای‌ کۆنی‌ بەڕێوەبەرایەتی‌ پۆلیسی‌ کەرکووک و هەندێکیان خۆیان تەقاندەوەو دوانیشیان لەلایەن پۆلیس و هێزە ئەمنییەکانەوە کوژران.
هەروەها داعش لەگەڕەکەکانی‌ یەکی‌ حوزەیران و ئەسرەو مەفقودین و تسعین و دۆمیز هێرشیکرد و ڕوبەڕووبونەوە لەگەڵ هێزە ئەمنییەکان و پۆلیس، هاوڵاتیانیش بۆ بەرەنگاربونەوەی‌ داعش چەکیان هەڵگرت.
ئاژانسی پاراستن و زانیاری\ زانیاری دەڵێت "لەم پەلامارەدا، نیوەشەوی21ی 10 ی 2016، (100) چەکداری داعش، لە حەویجەوە نێردران بۆ سنوری داقوق و لەوێشەوە بە حەوت پاسی نەفەرهەڵگری بچوک لە سەعات سێی بەرەبەیان، گەیەندرانە ناو شاری کەرکووک. ئەم (100) چەکدارە هاوکاریی کرابون بۆ هاتنە ناوەوەیان بۆ کەرکووک و ئاژانسی زانیاری بەدواداچونی ورد دەکات بۆ دۆزینەوەی ئه و کەسانەی کە هاوکاریان بوون. چەکدارە تیرۆریستەکان، کە هەڵبژاردەیەک بوون لە کەتیبە ئینغماسی و خۆکوژییەکانی داعش، بەسەر پێنج گروپی (20) کەسی دا بۆ داگیرکردنی بینای پارێزگاری کەرکووک، پۆلیسی فریاکەوتنی کەرکووک، شکاندنی زیندانەکان و بەردانی تیرۆریستانی داعش لە کەرکووک و دەستبەسەرداگرتنی فەرمانگە ئەمنی و بینا بەرزەکانی کەرکووک دابەشکرابون".
ئاماژەی‌ بەوەشکردووە، بەڵام بەهۆی گیانفیدایی ڕۆڵە قارەمانەکانی کوردستان، تیرۆریستان نەیانتوانی ئامانجە چەپەڵەکانیان بپێکن و "لە ئەنجامی بەرپەرچدانەوەی هێزەکانیاندا، ئۆپەراسیۆنەکەیان پەکخرا، و (ئەبو ئیسلام) ئەمیری سەربازیی ویلایەتی کەرکووک و گرنگترین ئەندامی گروپەکە و چەندین گەورە تیرۆریستی تر، دەستگیرکران و ئێستا لەبەردەستی هێزەکانی دەزگای دژە تیرۆرن".
بەپێی ڕاگەیەنراوەکە، ئەم گروپە 100 کەسییەی داعش، تەفروتونا بوون، تەرمی‌ 48 تیرۆریستیان لە پزیشکی دادوەری تۆمار کراوە و ئەوانی تریان بەهۆی ئەوەی تەقێندراونەتەوە یان کەوتونەتە بەر زەبری خەڵکی کوردستان و فرۆکەی هاوپەیمانان، پارچەپارچە بون و کۆناکرێنەوە.
- 23-10-2016

K24 – هەولێر
لە پەلاماری ڕۆژی هەینی ڕابردووی چەکدارانی داعش بۆ سەر کەرکووک 99 کەس شەهید بوون و 230 دیکەشی بریندار بوون.
زۆربەی قوربانییەکانی پەلاماری داعش بۆ سەر کەرکووک پۆلیسن.
لەم پەلامارەدا 42 پۆلیس، 26 هاووڵاتی، 17 پێشمەرگە، 11 ئەندامی ئاسایشی پارتی، 2 ئەندامی ئاسایشی یەکێتی و ئەندامێکی دژە تیرۆر شەهید بوون.
لە شاری داقوقیش 15 ئافرەت بەهۆی پەلاماری چەکدارانی داعش شەهید بوون.
گوتەبێژی وەزارەتی دەرەوەی ئێران بەهرام قاسمی ڕۆژی هەینی ڕایگەیاند سێ تەکنیکاری وڵاتەکەی لە وێستگەی بەرهەمهێنانی کارەبا لە دوبز شەهید بوون و چواری دیکەشی بریندار بوون.
چەکدارانی داعش بەرەبەیانی ڕۆژی هەینی ڕابردوو دزەیان کردە ناو شار کەرکووک و لە‌گەڕەکەکانی‌ یەکی‌ حوزەیران و ئەسره و مەفقودین و تسعین‌ و دۆمیز پەلاماری چەند شوێنێکیان دا و ژمارەیەک لە چەکدارەکانی‌ لە هۆتێلەکانی سنوبەر، مەجیدیە و جیهاد و مزگەوتێکی‌ گەڕەکی‌ دۆمیز جیگیر بوون و بەچەکی‌ قەناس تەقەیان لە هێزە ئەمنییەکان و هاوڵاتیان کرد.
هێزە ئەمنییەکان و هاوڵاتیانی خۆبەخشی کەرکووک بەرەنگاری پەڵاماری چەکدارانی داعش بوونەوە و توانیویان شکست بەم پیلانەی داعش بێنن کە پیلانێکی گەورەی داعش بوو بە ئامانجی دەست بەسەردا گرتنی شاری کەرکووک و پەلاماردانی سەنگەرەکانی هێزی پێشمەرگە و کۆنترۆڵ کردنی تەواوی کەرکووک، هەر وەک شیخ جەعفەر شێخ مستەفا فەرماندەی یەکەی 70 هێزی پێشمەرگە بە کوردستان24 ڕایگەیاند.
چۆنییەتی دزەکردنی چەکدارانی داعش
بەڕێوەبەری گشتی پۆلیسی کەرکووک، عەمید خەتاب عومەر لەبارەی چۆنییەتی دزەکردنی چەکدارانی داعش بۆ ناو شاری کەرکووک گوتی لەم شارە 600 هەزار ئاوارە هەیە،‌‌ دیارە لەگەڵ ئەوانە دزەیان کردووە، یان لەوانەیە هێنرابن، بەڵام هاتوون و چوونە ناو ماڵی هاووڵاتیان و دوای لێکۆلینەوە ئەنجامەکانی بۆ ڕای گشتی ڕادەگەینین.
شاخەوان عەبدوڵڵا پەرلەمانتاری عێراق لەمبارەوە بە کوردستان24 ڕایگەیاند، ناکرێت چیدیکە بە هەست و سۆزەوە مامەڵە لەگەڵ پرسی ئاوارەکاندا بکرێت، بەپێچەوانەوە دەبێ هەموو ڕۆژێک چاوەڕوانی ئەوەبین، ڕۆڵەکانی کەرکووک خەڵتانی خوێن بن و ئه و جۆرە ڕووداوانە دووبارە ببنەوە.
سەرچاوەیەکی سەربازی لەبارەی دزەکردنی تیرۆریستانی داعش بۆ ناو شاری کەرکووک ئاشکرای کرد،‌ لێکۆلینەوەکان دەستیپێکردووە و زانیاریی سەرەتایی هەن کە دزەکردنەکەی‌ تیرۆریستانی داعش‌ بۆ ناو کەرکووک لە ئەنجامی ئه و بۆشاییە بووە کە لە میحوەری داقوق - بەشیر بە مەودای زیاتر لە چوار کیلۆمەتر لە‌ هێڵەکانی پێشەوەی بەرەی ڕوبەڕووبوونەوەی دژ بە تیرۆریستانی داعش لەم ناوچەیە نێوان هێزی پێشمەرگە و حەشدی شەعبیدا هەیە.
لە لایەن خۆیەوە مەحمود سەنگاوی لە بارەی چۆنییەتی دزەکردنی ئه و چەکدارانە بۆ ناو شاری کەرکووک بە کوردستان24 ڕایگەیاند دەزگا ئەمنییەکانی شارەکە کارئاسانی زۆریان بۆ هاتنە ناوەوەی ئاوارەکان کردووە و هەندێکیان نوسراویان بۆ ئه و ئاوارانە کردووە. گوتیشی ‌تا ئه و ئاوارانە به و شێوەیە بهێنرێنە ناو سەنتەری شارەکانەوە ئەگەری دووبارەبوونەوەی ئه و هەڕەشانە زۆرە.
هەر لەمبارەوە هەڵۆ نەجات بەڕێوبەری ئاسايشی کەرکووکی سەر بە پارتی ديموکراتی کوردستان بە کوردستان 24 ڕایگەیاند لە ڕۆژێکدا 1500 کەسی ئاوارە خۆيان دەگەيەننە شاری کەرکووک و بە 11 دەزگای ئەمنييەوە هێشتا نەتوانراوە زانياری هەمە لايەنە لەبارەی ئاوارەکانەوە کۆبکرێتەوە.
ژمارەی چەکدارانی داعش
زانیاری ورد لەبارە ژمارەی ئه و چەکدارانەی داعش لەبەر دەست نییە کە دزەیان کردبووە ناو شاری کەرکووک، بەڵام هەموویان لەم پەلامارەدا کوژراون.
دەزگا ئەمنییەکانی کەرکووک و فەرماندە سەربازییەکان باس ‌لە دزەکردنی زیاتر لە 100 چەکداری داعش دەکەن و لە ناو شاریشدا کەسانێک هاوکارییان کردوون‌.
لە گەڵ ئەوەشدا بە دەیان چەکداری دیکەی داعش لە کاتی پەلاماردانی سەنگەرەکانی هێزی پێشمەرگە لە میحوەرەکانی کەرکووک کوژران و کوردستان24 وێنەی زۆرێک لەوان بڵاو کردەوە.
تا ئێستا لاشەی 63 ئه و چەکدارانەی داعش دزە‌یان کردبووە ناو شاری کەرکووک لە نەخۆشخانەی کەرکووکن و ژمارەیان ڕوو لە بەرزبووونەوەیە.
بەشی هەرە زۆری چەکدارانی داعش لە ڕۆژی یەکەمی پێکدادانەکان کوژران و ئەوانەی دیکەشیان پاش شکستی پیلانەکەیان‌، خۆیان لە ناو هەندێ لە گەرەکانی شاری کەرکووک حەشار دا یان بۆ ناوچەکانی خوارووی کەرکووک ڕایانکرد‌، لەماوەی ئەم دوو ڕۆژەدا کەوتنە بە کێوماڵ و ڕاوەدوونان لە لایەن پێشمەرگە و هێزە ئەمنییەکان و هاووڵاتیانی خۆبەخش و هەموویان کوژران و بە تەواوەتی شکست بە پیلانی داعش هێنرا و ئارامی بۆ شاری کەرکووک گەڕایەوە.

[1]

21-10-2016

دوای ئەوەی لە بەرەبەیانی ڕۆژی هەینی 21-10-2016 لە لایەن تیرۆریستانی داعشەوە هێرش کرایە سەر چەندین گەڕەکی باشووری شاری کەرکووک و قەزای دبس، هێزەکانی ئاسایش و پۆلیس و پێشمەرگە بە پاڵپشتی جەماوەر، توانیان ئازایانە ڕەوشەکە کۆنترۆڵ بکەن و شکست بەو نیازەی داعش بێنن کە بتوانن بۆ ماوەیەکی زۆر خۆیان لە چەند گەڕەکێکی کەرکووکدا حەشار بدەن و بە دروستکردنی پشێوی گوایە گوشار لە سەر موسڵ کەم دەکەنەوە.
لە پەرچەکرداری هێزەکانی ئاسایش و پۆلیس و پێشمەرگە و خۆبەخشانی شاری کەرکووکدا، توانرا زۆربەی تیرۆریستان لە ناوەوە و دەرەوەی شار لەناو ببردرێن. هەروەها لە میانەی ئۆپەراسیۆنێکی تایبەتی هێزەکانی ئاسایشی کەرکووک و ئاسایشی هەولێر، لە ناو شاری کەرکووکدا توانرا چەند تیرۆریستی بەشداربووی ئەم کردارە تیرۆریستیە دەستگیر بکرێن بە ناوەکانی:
1. ئەکرەم تاها عیدان ئەحمەد دلێمی، ناسراو بە ئەبو مستەفا، ئەمیری ئەمنیی کەرتی کەرکووکی داعش، بەشداربووی کردەوە تیرۆریستیەکە.
2. عەبدولرەحمان فازل عەبولرەحمان ئەلعززی، ناسراو بە ئەبو محەمەد بەرپرسی ئیداری و مالیی داعش لە ناو کەرکووک، بەشداربووی کردەوە تیرۆریستیەکە.
3. عەبدولعەزیز مەحمود عیدان دلێمی، ناسراو بە عەزاوی، بەشداربووی کردەوە تیرۆریستیەکە و کاری چاودێری پێشوەختەی ئامانجەکان.
4. عەبدولرەحیم ئەحمەد عەبدوللا یاسین، ناسراو بە ئەبو عەلی، هاوکاری ئیداریی تیرۆریستان بەر لە هاتنیان بۆ ناو شار و دواتر بەشداریی کردەوەکە.
5. لەیس فەلاح نعمە ئەحمەد جەبوری، ناسراو بە ئەبو غەسان، بەشداربووی کردەوە تیرۆریستیەکە و ئەندام لە کەتیبەی ئینغماسی.
6. عەبدولرەحمان فازل عەباس محەمەد عوبێدی، ناسراو بە ئەبو یەحیا، گواستنەوەی خۆکوژەکان بۆ دبس.
7. عەلی حوسێن حەمەد ئیبراهیم جەبوری، ناسراو بە ئەبو موحەمەد، داڵدەدانی تیرۆریستان و گواستنەوەیان.
8. موهەنەد ئیبراهیم عەلی دلێمی، ناسراو بە ئەبوو لەیس، بەشداربووی کردەوە تیرۆریستیەکە و گواستنەوەی تیرۆریستان بە قەلاب بۆ نزیک کەرکووک.
ئێستا لێکۆلینەوە لەم کەسانە بەردەوامە و بە پێی ئەنجامە سەرەتاییەکان دەرکەوتووە کە، سەرپەرشت و پلاندانەری ئەم کردەوە تیرۆریستیە کەسێکە بە ناوی(مازن نەزهان ئەحمەد عەبدوللا ئەلعوبێدی ئەلریاشی) کە ناسراوە بە (ئەبو ئیسلام ئەنساری) ناوبراویش بە برینداری لە گەرەکی یەکی حوزەیران لە لایەن هاوولاتیانەوە دەستگیر کراوە و دراوەتە دەست لایەنە ئەمنیەکانی کەرکووک.
ئەم تیرۆریستانە توانیویانە لە بۆشاییەکی نێوان داقوق و بەشیر سوود وەرگرن و دەستە دەستە چەکدارەکانیان لە حەوێجەوە بهێننە نزیک شەریکەی تارق لە باشووری کەرکووک و دواتر تیرۆریستان کە ژمارەیان لە سەرووی سەد چەکدار بووە بە چوار بارهەلگری کیا و قەلابێک گواستراونەتەوە بۆ کەرکووک و بە سەر ئەو شوێنانە دابەشکراون کە کرانە ئامانجی هێرشە تیرۆریستیەکەیان. لێکۆلینەوە لەم کەسانە بەردەوامە و لە ماوەیەکی نزیکدا هاوولاتیانی خۆراگری کەرکووک و کوردستان لە ئەنجامەکان ئاگادار دەکەینەوە.
ئەنجوومەنی ئاسایشی هەرێمی کوردستان
23-10-2016