لەماوەی دوو هەفتەی یەکەمی ئۆپەراسیۆنی ڕزگارکردنی شاری موسڵ لەدەست چەکدارانی داعش، نۆ هەزار کەس لەناوچەکانی دەوروبەری موسڵەوە ئاوارەی هەرێمی کوردستان بوون.
هۆشەنگ محەمەد بەڕێوەبەری گشتی سەنتەری هاوبەشی قەیرانەکان لە لێدوانێکدا بۆ ماڵپەری حکومەتی هەرێمی کوردستان ڕایگەیاند"لەوەتەی کە ئۆپەراسیۆنی ڕزگارکردنی موسڵ لە ڕۆژی 17 تشرینی یەکەم دەستیپێکردووە، نۆ هەزار کەس لە ناوچەکانی دەوروبەری موسڵ بەتایبەتی لە قەزا و ناحیە و گوندەکانی باکوور، ڕۆژهەڵات و باشووری موسڵ بۆ هەرێمی کوردستان ئاوارەبوون".
بەڕێوەبەری گشتی سەنتەری هاوبەشی قەیرانەکان وتیشی"80%ی ئاوارەکانی ئەم دوو هەفتەیە بۆ پارێزگای هەولێر ئاوارە بوونەو لە کەمپەکانی دیبەگە و حەسەن شام نیشتەجێکراون و 20% دیکەشی لە کەمپی زەلیکان لە دهۆک نیشتەجێکراون".
17ی ئەم مانگە، پرۆسەی فراوانی هێزی پێشمەرگە لەخازر و بەهەماهەنگی هێزەکانی سوپای عیراق لەگوێڕ و گەیارەوە دەستیپێکرد، ئەوەش وەکو قۆناغی یەکەمی ئازادکردنی موسڵ؛ دووەم گەورەترین شاری عیراق کە لەناوەڕاستی ساڵی 2014ەوە کەوتۆتە دەست داعش.
لەسەرەتای دەستپێکردنی ئۆپەراسیۆنی موسڵەوە پێشمەرگەو هێزە عیراقییەکان بە پاڵپشتی هاوپەیمانی نێودەوڵەتی، دەیان گوندیان لەچەکدارانی داعش پاککردۆتەوە.
لە بارەی چۆنییەتی هاتنی ئەو ئاوارانە بۆ سەنگەرەکانی هێزەکانی پێشمەرگەو گواستنەوەیان بۆ کەمپی ئاوارەکان، هۆشەنگ محەمەد ئەوەی خستەڕوو، خەڵکی ناوچەکانی شەڕ لەمیانەی بەڕێوەچوونی ئۆپەراسیۆنە سەربازییەکانی هێزەکانی پێشمەرگە و عێراق بەهەرشێوەیەک بێت خۆیان دەگەیەننە سەنگەرەکانی پێشمەرگەو لە پشت سەنگەرەکانەوە بە هاوکاری وەزارەتی کۆچ و کۆچبەرانی عێراقی ئۆتۆمبێلی پاس ئامادەکراوە بۆ گواستنەوەیان بۆ ناو ئەو کەمپانەی کە بۆیان دیاریکراوە.
بەرلەدەستپێکردنی ئۆپەراسیۆنی موسڵ، هەریەکە لە حکومەتی هەرێم و عیراق و ڕێکخراوە نێودەوڵەتییەکان هۆشداریی ئەوەیاندابوو کە ژمارەیەکی زۆر خەڵک ئاوارە دەبن، بۆ ئەو مەبەستەش ڕێوشوێنی پێویست گیراوەتەبەر بۆ بەهاناوە چوونیان.
بەڕێوەبەری گشتی سەنتەری هاوبەشی قەیرانەکان، گلەیی ئەوەی لەکۆمەڵگای نێودەوڵەتی کرد کە "وەک پێویست بەهانای ئاوارەکان یان هەوڵەکانی حکومەتی هەرێم بۆ ئەم پرسە نایەت" باسیلەوەشکرد لەسەرەتای گەیشتنی ئاوارەکان خواردنی وشک و ئاویان بۆ دابین دەکرێت، تائەوکاتەی بە هاوکاری نەتەوەیەکگرتووەکان پێداویستییەکانی تری ژیانیان لەناو کەمپەکان بۆ دابین دەکرێت.
هۆشەنگ محەمەد ئەوەشی خستەڕوو، تەنیا لەشەوی دووشەممەی ڕابردوو دوو هەزار ئاوارە گەیشتونەتە سەنگەرەکانی هێزەکانی پێشمەرگە لە میحوەری ناوەران و لەوەدەترسن بە یەکجار ژمارەیەکی زۆری خەڵک ئاوارەببن، بۆ ئەوەش ئاماژەی بەئەگەری هاتنی لەناکاوی 260 هەزار کەس پێکەوە کرد.
"ئەگەر بەپێی ئەو پلانەی بۆ پێشوازیکردن لەئاوارەکان دانراوە، بتوانین مامەڵە لەگەڵ پرسی ئاوارەکانی موسڵ و دەوروبەری بکەین دەتوانین 33 هەزار خێزان یان 215 هەزار ئاوارە وەربگرین کە پێشتر پلانی دروستکردنی پێنج کەمپ لە هەولێر، پینج کەمپ لە دهۆک و کەمپێک لە سلێمانی بۆ ئەم مەبەستە دانراوە. بەڵام لەوە دەترسین و پێشبینی دەکەین لانیکەم لە‌سەرەوەی نیو ملیۆن کەس لەمیانەی ئۆپەراسیۆنی ڕزگارکردنی موسڵ، بەتایبەتی ئەوکاتەی شەڕەکە دەگاتە ناو شاری موسڵ هانای خۆیان بۆ هەرێمی کوردستان بهێنن" هۆشەنگ محەمەد وای وت.
موسڵ دووەم گەورە شاری عیراقەو لەناوەڕاستی ساڵی 2014وە لەژێر دەستی داعشدایە، لەئێستاشدا زیاتر لە یەک ملیۆن کەس تێیدا دەژین.
- 01-11-2016