بە تاوانو کناچە بییەیم
بەشۍ: یەرەمە
هۆرئەوەگېڵنای: گوڵزار شەریفی
ڕاسەکېش بابەت تەسادفش کەردەبۍ و ئاوردەنشا ئی نەوەشخانە.
تا مامۆم واتش بابەت تەسادفش کەردەن وەڵێ گردی هەواڵوو ئەڎایم پەرسام و واتم: ئەڎام، ئەڎام چېش حاڵش چەنېیەن؟خاسەنە؟
مامۆم واتش: ئەرۍ خاسەنە، پا حاڵە وېرانەموە دلۍ ماشینینە وەسانیرە و ڕەمانی پەی دلۍ ساڵۆنەکێ، دلۍ دڵوو وېمەنە ویرم سەرو ڕەزایوە بێ، چوون مامۆم وېش قسێش کەردێبێنێ چەنی بابەیم و واتیچش ئەڎام خاسەنە. واتم حەتم ڕەزا چېوێوەش سەر ئامان کە بە پەلەپەل ئېمەش یاونایمێ ئیگە. ئامانی دلۍ ڕاڕەوەکەو نەوەشخانەی و فامیلەکەو وېم وات بە یۆوە جە پەرستارەکا واتم: ئەڎا و بابەو من هەنێ کام بەشەنە؟ پەرستارەکێ حەر چەمش پەنە کەوتانی لاش کەرد لاو مامۆویموە و واتش: ئی کناچۍبۊ بە چېشەشا؟مامۆم سەرەنجێوە پەرستارەکېش دا و دڵە پەڕەکەش کەرد هاوارێ وېش نامنارە ملو پایاشەرە و گرەوە گرەو واتش: کناچېشانەنە، عازا کەوت دڵم پەی ئەڎایم مقەدەرېو بېیەن. کتووپڕ حاڵم خراو بی و ۋېیەردانیوە. فەقەت ئانەمە هۊش بۍ داریانیوە و گرم و قاڵوو دلۍ ڕاڕەوەکەی ئێ.
بە ئێشوو سەرو دەسیموە چڵاکیانیرە و ئامانیوە هۊش، دیم سرۆمێوە هەنە قۆرخەو دەسیموە سەرو تەختیوە درێژ کېشېیاینا. بۍ تفاوەت بە سرۆم و چەنەکەو قۆرخەو دەسیم هۆرێستانیوە و بە دەنگی بەرز دەسم کەرد هاوار و داڎ کەردەی، بە قیژە‌قیژ چڕیم ئەڎایم، ئەڎام یاگێ حەرچی کەسیم بێ. بە دەنگو هاوارام مامۆم زاناش و ئاما پاڵو تەختەکەیم و باوەشیش پۊرە کەردانی و بە گرەوایوە واتش: ئڼە تڼ ئامێبېنۍ دلۍ ڕایرە ماشینەکەشا تەسادفش کەردەبېیەن و براژەنیم سەعاتێو وەڵێ ئانەیە بېیاوۆ نەوەشخانە عەمرەو خوڎایش کەردێنە. شوکروو خوڎای ڕەزا تەنانەت ونیچ نامێنە لووتەش. پا حاڵە بەوڎ حاڵەموە هەکە دلۍ چەمام پەڕ بیەبێوە هەرسی و حیچ یاگێو نەوینێنێ، بە وېم واتم: ئی مقەدەرە فەقەت قەسدش گېرتای گېیانوو ئەڎایم و وېرانی تەماموو ژیوایم بۍ و ئێتر حیچ.
چا وەختەنە کە ئەڎام تەسادف مەکەرۊ و ئەڎا گەورێچمبۊنەو حەمڵەی قەلبیوە وسنایبېیېنەشا، یۊ ملۆ هەواڵوو فەوتوو ئەڎایمش پەنە مڎەو و ئاڎەیچ بە ئەژنەویەی ئا مقەدەریە عازا سەکتێوەتەر حەمڵەش پەنە کەرۊ و ئاڎەیچ فەوت کەرۊ.
جە سنحوو ساڵوو چواردە ساڵەییمەنە دوێ حامیێ گەورێم جە دەس دای.
چوون کە شماڵەنە کەسما نەبۍ، جەنازەکەو هەر دوەیشا ئاوردشاوە پەی تارانی و چاگەنە ئەسپەردەو خاکیشا کەردێ. ڕۊ کەفن و دەفنیشانە گېیان و جەسەم تاقەتوو ئا گردە خەمە گەورەیشە نەبۍ چن جارێ ۋېیەردانیوە.
وەختێو ئەڎام خاکی شاردەوە گردو ئاواتەکاو منیچش چەنی وېش بەرڎۍ. و منیچ تاق و تەنیا بە کوڵېو خەم و پەژارەوە مەنانیوە. دمای ئەسپەردە کەردەیشارە لوایمێوە یانەو مامۆویم. چوون کە بابەم هەڵای نەوشخانەو شماڵینە وسنابېشا وبۊنەو حاڵی خراویشوە نەتاوێنێ واڕاشوە تاران. دمای یەک حەفتەی واڕاشاوە نەوەشخانېو نزیکوو یانەو وېماوە جە تاران. نزیکوو چلێ ئەڎایم بۍ بابەیچم ئاوردشاوە یانە و تەنیا پەی چلەکېش تاواش دلۍ ڕاوڕەسمەکانە بەشداری کەرۊ.
دەقێقەن دمای ڕاوڕەسموو چلەکێرە وردە وردە دەروو و بەرما چۆڵ بی، ئېمە مەنەیمێوە و خەموو نەبېیەی ئەڎایما. فرە‌فرە سەخت بێ، تاقەتوو هۆرگېرتای ئا خەمە قۆرسەیە پەی من مەحاڵ بێ. بابەم وېش سەرقاڵوو هەرمانێ کەرۍ و تەنانەت شەوانیچ دێر ئێوە یانە، ئەسڵەن نەواچۍ یەرێ زاڕۆڵێم هەنێ یانەنە تاق و تەنیاینێ. ئیسە من بەتوون ئەوەڵیچوە موحێبەتش پەنە نەکەردێبێنێ، بەڵام سەرەم سڕ مەنەبۍ پەی چێ لایکەموە پەی کوڕەکایچش پاسەنە و هەواڵېوەشا چەنە نمەپەرسۆ؟
گردو هەوڵوو وېم دێنا تاکو یاگێ هاڵیەو ئەڎایم پەڕ کەروە پەیشا، بەڵام موحەمەد و ڕەزا حەر دڵتەنگی ئەڎایم کەرېنێ. فرە سەختی کېشێنا و هېزم نەبۍ بېیاو هەم پاڎیشارە و هەمیچ یانەی وەروەڵاویرە.
دوێ مانگێ ۋېیەرد و نزیکوو ئەوەڵ مانگوو پاییزێ کەوتێمێوە، مەشېیایا من و موحەمەد نامېما نوویستایا پەی وانگای. مەنێبێنېرە ڕەزای چېش پەنە کەروو ئەر بلوو وانگا؟ دلۍ ئا ویرانە بێنێ، شەوۍ بابەم ئاماوە پەی یانەی واتم پەنەش،
واتم بابە، سەوای بلمێ پەی نام‌نویسی وانگای؟
بابەم چرکە ساتێو بێ‌دەنگ بی و واتش: سەوای موحەمەدی بەروو پەی نام‌نویسی. تۆویچ ئێتر لازم نمەکەرۊ فکروو وانگاینە بی، یانەنە پەی وېت بنیشەرە و هاگات براڵەکات بۊ و بېیاوە دەرسەکەو موحەمەدیرە. پا قسێشە حەساوی پەشۆکیانی، فکرم لاو هەرچی چېویوە بۍ غەیر جە نەلوای پەی وانگای.
بە من‌من واتەی واتم: بابە!!! نمەکریۆ من نەلوو وانگا و جیاش بازوو. من عاشقوو دەرس و واناینا، قەوڵم دان بە ئەڎایچم بوو بە دوکترە.
مشۊم ئا ئاواتێ ئەڎایمە بە ڎی باروو.[1]