ناونیشانی پەخشان: وێنە شکاوەکانی شار
ناوی نووسەر: #حەمە ئەحمەد جاف#
=KTML_Link_External_Begin=https://www.kurdipedia.org/docviewer.aspx?id=488482&document=0001.MP4=KTML_Link_External_Between=کلیک بکە بۆ بینین و بیستنی خوێندنەوەی پەخشانی وێنە شکاوەکانی شار بە دەنگی شەهاب زرێباری=KTML_Link_External_End=
(#قەڵادزێ#) یەک پڕ لە عیشق و...
سۆزی خۆشەویستی و ئەوین
لێرەوە شۆڕش و میللەت
گەیشتنە لوتکەی ڕاپەڕین
شارێک لە سرووشت وجوانی
نوقمی زام و شەڵاڵی خوێن
شارێک دوور لە ئاوەدانی و ..
کوشتەی سەدان وادەو بەڵێن!
لە ئامێزی گەرمی تەرمی تارماییە ڕاکشاوەکەی شاردا ، پەنجە دەخەمە سەر حەرف و کەلیمە سووتاوەکانی ناو وێنەو یادگارە تاڵ و شیرینەکانی تەمەنی شەکەتی شار.
ئەو شارەی، نیوسەدەی تەمەنمی لە ناخی سرووشت وجوانی خۆیدا، هەڵوێزنی!؟
ئەو شارەی، ئێستا پێی غەریبم و نامناسێتەوە!؟ ئەو شارەی دەیناسمەوەو ئەو نامناسێ!
ئەو شارەی ، لە دڵی قەڵاو حوسنی دڵما داوای ناسنامەم لێ دەکاو پێمدەڵێ:
بۆ کوێ؟
خەڵکی کوێی؟!
منیش ناچار پێی دەڵێم:
ئێرەییم و بەرەو شارێکی بێ بەهاروگوڵ و ڕووناکی دەڕۆم!؟
ئەو شارەی ، تێیدا لە دایکبووم و گەورە بووم!
ئەو شارەی دەیناسمەوەو نامناسێتەوە
ئەو شارەی یەکەم ئەویندارو خۆشەویستی خۆمم تێدا ناسی!؟
دەڵێن: (ماڵ لە ماڵخۆ حەرامە) ڕاستیان وتووە!
شارەکەم .. نەشمناسیەوە ...من تۆ هەر دەناسمەوە! خۆشمدەوێی؟
هەموو کاتێک لە شیعرەکانمدا بۆت ئەگەڕێم ولەخوێنما دەتدۆزمەوەو لەسۆمای چاوەکانمدا بۆتدەگریم و لە هەناسەمدا دەتلاوێنم و لەدڵمادەتخوێنمەوە و لەئەرشیفی سۆز و هەستمداا هەڵتدەگرم....هەڵتدەگرم...تا (وێنە شکاوەکانی شار) ت پتر تێکنەشکێن..
ئەو وێنانەی هەر لەتۆی سەربەرز دەوەشانەوە...
ئەو وێنانەی لەگەڵ گەڵارێزانی ئەستێرەوخەزانی پاییزی مرۆڤەکانتا لە دایکبوون و لەگەڵ ڕاگواستنی دڵی شارتا گەورە بوون و لەگەڵ ڕاپەڕینیشدا گەڕانەوە ئامێزت !
گەڕانەوە ئامێزێکی ساردوسڕو برسی!؟ گەڕانەوەشارێکی کاول و وێرانتر لە جاران !
گەڕانەوە ئەو شارە بی بە هارەی (هاوڕێکەم) گوتەنی:
شار لەسەر قەبرانەوە دەست پێدەکات !؟
ئەو شارەی بێ نیسانی گوڵ وشکۆفەو نێرگز، دەچێتە باوەشی سۆز و عاتیفەی بەهارەوە..
ئەو شارەی لەگەڵ هەر هەنگاوێکی تەمەندا ، مێرگی سەرابە عیشقێک دەکاتە هەڵم..!
ئێستاش.. (قەڵادزێ) لەخەڵوەتی ئەو تارماییەدا ، لە گێژەنی چاوی خوێنتێزاوی (جوتکانیان و مام قاسم و کانی شێخ و کانی زێن وکانی کوردە) دا کڕکەوتووەو دەیەوێ ڕوولەمینبەرو میحرابی ئەو وێنە هەڵواسراوە شکاوانە بکات ! کە لە (بیستوچواری چوارەکانی شارو حوزەیرانی تەرحیل و تەهجیرو تەقینەوەیدا) لەگەڵ شاردا جمینە خوار....
ئێستاش باسی (گردەچکۆل و داری والی و گردی حوسنیی و قەڵات و جوتکانیان و کانی کوردە و کانی شێخ و کانی زێن و مام قاسم و مەڵاسەعدی و بڵندگۆی مزگەوتەکانی کارەبا و خانەقات) بۆدەکەم ، کە هەواڵی تراژیدی کارەسات و ڕاسان وسەرکەوتن وخۆڕاگریی قەڵادزێییەکانیان دەگەیاندە چیاو شۆڕش و پێشمەرگە و چارۆکە خەونی قەترانیی و خەمی ڕەشماڵی تەمەنە باڵاکوورتەکانی شەوانی تەنیایی شاریان..بۆ پەنجەرەکانی ئەستێرەودەرگا کڵۆمدراوەکانی مانگ وخۆردەبرد... تا لەو دیودیوارەکانی وەهم وخەیاڵی خەزانەوە خەم و ڕەنگە ڕەشتاڵەییەکانی زستانی مەرگ بسووتێنن وخۆیان بە ئاگری خۆڵەمێشی جەستە و تارمایی تەرمەکانی شاری شەهیدم گەرمکەنەوە !
ئێستا (شار) وێنەیەکی شکاوی جەستە بەخوێنسووری خاکێکی سووتاوی وێرانە!
ئەو شارەی بەر لە مردن ، دەیەوێ بگەڕێتەوە ناو باوەشی (ڕەنگەکان) !
ئەو شارەی..هەڵۆ ئاسا...کاڵای خەمی ئاوێزەیی لە بەر دەکاو لەسەر وێنە شکاوەکانی شار هەڵدەنیشێ و...سەرجەم تارماییەکانی مەرگ لە کۆڵ دەنێ و... دەڕوا....
دەڕواو.... ڕەنگی خەمە وەنەوشەییەکان ، دەکاتە ڕواژای سۆز و عاتیفەی پاییزی وێنە شکاوەکانی تەمەنی شار .
ئەو شارەی ، لەگەڵ حاڵی زیکرو تەهلیلەی مەلا پەپوولە و سەعیدەشێت ومەڵاسەعدی و سەڵتە شین وسەید خەجێ وسەکینەی دامێنی مێژووی سوورو سپی قەڵای سەربەرزی شار دەکەونە سەما. سەمای مەرگ و ماڵاوایی ئازیزان، سەمای وردە شووشەی پەنجەرە شکاوەکانی تەمەن...
تەمەنێکی ژاکاو، تەمەنێکی سواغدراو بە مڕۆ! ئەمڕۆیەکی تاڵ وبێ ئاگا لەیەکدی!؟ ئەمڕۆیەکی بێ عیشق وخۆشەویستیی ! ئەمڕۆیەکی دوور لە هەموو عورفو عادەت و دابێکی کوردانەی جاران!؟
- قەڵادزێ ....ئێوارەت باش...
وەرەو...وێنە شکاوەکانی (چل و نۆ) ساڵی تەمەنی کارەسات و تراژیدی خۆت!
لە شارێکی وێرانەو لە جاران وێرانتر ببینە !
خەڵکینە..... شەوتان باش....
وەرن سەیری...وێنە شکاوەکانی تەمەنی شارە بێ بەهارەکەتان کەن، چۆن
بە تێکچڕژاوی بەدیواری ماڵەکانتاندا هەڵواسراون وحیکایەت و چیرۆکی دڵتەزێنی چل و نۆ ساڵەی ڕووداوەکانی شارێکی شەهید...سووتانی باخچەکان..رووخانی گەڕەکەکان...وێنا دەکات وهەر جارەی بەیت ونەقڵێکیان لەسەر دەگێڕێتەوە !
- کوردستان تۆش...بەیانیت باش..
قەڵادزێ.. جەستەیەکی لەخوێنهەڵکشاوی مێژووی تۆیە ، ئامێزی گەرمی دایکانەی بۆکەرەوە
ئێمەش، دەنگ و ڕەنگ و زەنگ و زەبری گورچکبڕی شارین !
تاهەتایە کپ نەبووین و کپ ناکرێین و کپیش نابین !
دەئاوڕێکمان لێ بەرەوە!
ئێمە هاتوین سەرجەم (وێنە شکاوەکانی شار ) لە مۆزەخانەی دڵەکاندا خڕکەینەوەو وێنەشکاوەکانی (ئەحمەدەکانی شار) هاوشێوەی (عومەرەکانی) هەڵەبجە بکەینە
پەیکەری شارێکی چەندین جار شەهیدو.وردە شووشەی پەنجەرە شکاوەکانی باڵای
خوێنینی تەلاری شاریش، بکەینە زیاتر لە سەدان مەدالیای گوڵڕەنگی یادێکی مەزن وپیرۆز.و بەگەردنی بڵندی سرووشتی بەهارو نەورۆزو نیسانی ئازادیدا هەڵیواسین وجا لێرەوە..خەونە وەدینەهاتووەکانی شار، بەناخی سرووشت و پاییزی جاران و بەهار و نەورۆزی دوێنێ وئومێدی ئەوڕۆو ئاوات وئامانج و هیواکانی سبەی دەسپێرین .
ئەوجا وەک هاوڕێکەم گووتەنی:
- لەسەر قەبرانەوە دێم ....
لە سەر قەبرانەوە، ڕووەو شارێکی شەهیدکراوی وێران و وێران و وێرانتر لە جاران دەکەومە ڕێ و....دەگەڕێمەوە...باوەشی گەرمی دایکم ...ئەو دایکەی لە بوونم تاوانبارە ! [1]
=KTML_Bold=کوردیپێدیا بە هیچ شێوازێک دەستکاری ڕێنووسی ئەم بابەتەی نەکردووە و وەکوو ڕێنووسی سەرچاوەی ئاماژەپێکراو نووسراوەتەوە.=KTML_End=