لە ئەوروپاوە و لەڕێی تەلەفزیۆنەوە ئەو کەسەی ناسییەوە کە پێشتر وەک کۆیلەیەک کڕین و فرۆشتنی پێوە کردبوو، بەڵام لەناو ئاوارەکاندا وەکو لێقەوماوێک قسەی دەکرد.
رۆژی 20ی ئاب ئۆپەراسیۆنی کۆنترۆڵکردنەوەی قەزای تەلەعفەر دەستیپێکرد، لەگەڵ پێشڕەویی هێزەکاندا شەپۆلی ئاوارە ناوچەکانی شەڕیان چۆڵ دەکرد.
رۆژی 21ی ئاب ئیڤانا وەلید، لە شاشەی ڕووداوەوە لەناو شەپۆلی ئاوارەکانی تەلەعفەردا کەسێک دەبینێت و دەیناسێتەوە، دواتر ئیڤانا وێنەکەی لە فەیسبووکدا بڵاوکردەوە و نووسی ئەمە ئەبوو عەلییە، ئەم کەسە زیاد لە جارێک کڕین و فرۆشتنی پێوەکردم و لێپرسراوێکی کڕین و فرۆشتنی کچانی ئێزدی بوو لە تەلەعفەر. پاشان ئەبوو عەلی لەلایەن هێزە ئەمنییەکانەوە دۆزرایەوە و دەستگیر کرا.
کە #داعش# لە سێی ئابی 2014 هێرش دەکاتە سەر شنگال، ئیڤانا لەگەڵ ماڵباتی مامی، ڕوویان لە چیای شنگال کرد، بەڵام بەر لەوەی بگاتە سەر لوتکەی چیاکە لەلایەن داعشەوە دەستگیر دەکرێن.
ئیڤانا دەڵێت: ژمارەمان گەیشتە 600 کەس، ژن و پیاوەکانیان جیاکردنەوە، ئەوانەی عەرەبی سوننە بوون ڕێگەیان پێدرا بڕۆن، ئێزدییەکانیشیان گواستەوە بۆ بارەگای فەرمانگەی باری شارستانی لە شنگال.
داعش کچەکان لە خێزانەکانیان جیادەکاتەوە، سەرەتا سێ پاس لە کچانی ئێزدی دەنێرن بۆ مووسڵ، تا کاژێر هەشتی ئێوارە کچەکان جیادەکرێنەوە، ئیڤانا کە لەگەڵ دوا کاروان بوو، بۆ قەزای بەعاج گواسترایەوە.
پاش دوو ڕۆژ ئیڤانا دەبەن بۆ تەلەعفەر، ئەو دەڵێ سێ شەو لەوێ ماینەوە، دواتر گواستراینەوە بۆ شوێنێکی دوور، وامانزانی سووریایە، بەڵام گرتووخانەی بادۆش بوو، لە گۆڕەپانەکەی کۆکراینەوە و نزیکەی 2000 کەس دەبووین.
لە بادۆش داعش ڕۆژانە یەک ژەم خواردنی دەدایە ئێزدییەکان، لەو کاتەدا فڕۆکەکان گرتووخانەکەیان بۆردومان کرد، بۆیە ئێزدییەکان گەڕێندرانەوە تەلەعفەر، لەوێ کچەکانیان جیاکردنەوە و بە حەوت پاس گواسترانەوە بۆ مووسڵ.
لە موسڵ، لە باڵەخانەیەکی چوار نهۆمیدا ئیڤانا لەگەڵ نزیکەی 1000 کچی ئێزدی دەستبەسەر بوون، ڕۆژێک ژمارەیەک ئەمیری داعش سەردانیان دەکەن و هەر یەکێکیان چوار بۆ پێنج کچ بۆ خۆی هەڵدەبژێرێت. ئەمیرێکی داعش دەیەوێت ئیڤانا بۆ خۆی ببات، بەڵام ئیڤانا بیردەکاتەوە و بە داعشەکە دەڵێت کە هاوسەرگیریی کردووە و هاوژینەکەی لای ئێوە دەستبەسەرە، ئەو کەسەشی ئیڤانا لە خەیاڵی خۆی وەک هاوژین داینابوو، ئامۆزاکەی خۆی بوو.
ئەمیرەکە ئیڤانا دەگەڕێنێتەوە بۆ تەلەعفەر و داوا دەکات لە زیندانەکە بکۆڵنەوە ئایا ئەو ناوەی ئیڤانا دەڵێت هەیە، لە بەختی ئەودا ئامۆزاکەی لە زیندانەکە بووە و نەکوژراوە.
ئیڤانا لە قوتابخانەیەک دادەنێن کە پڕە لە ژن و منداڵی دەستبەسەری ئێزدی، بۆ ڕۆژی دواتر پیاوەکانیش دەهێنن و ئیڤانا ئامۆزاکەی دەدۆزێتەوە و چیرۆکەکەی بۆ دەگێڕێتەوە.
ئیڤانا دەڵێت: داعشەکان ڕۆژانە دەهاتنە سەرمان و بەدوای کچاندا دەگەڕان، چوار جار هاتنە لامان، چونکە گومانیان هەبوو کە من و ئامۆزکەم هاوژین بین، هەر چوار جارەکە دوو کەس هاتن بە ناوەکانی باقر و ئەبوو عەلی.
لە تەلەعفەر داعش ئێزدییەکان لە گەڕەکەکاندا نیشتەجێ دەکات و داوایان لێدەکات مەڕوماڵاتیان بۆ بەخێو بکەن و کشتوکاڵیان بۆ بکەن.
ئیڤانا لەگەڵ 33 کەسی دیکە لە ماڵێکدا دەمێننەوە، ئەو دەڵێ ڕۆژانە هەواڵی هەڵاتنی خێزانەکانمان دەبیست، ئێمەش تەلەفۆنێکمان پێبوو و ژمارەی قاچاخچییەکمان پەیداکرد و بڕیارماندا هەڵبێین.
قاچاخچییەکە شوێنێکیان بۆ دەستنیشان دەکات کە خانوویەکی تەواونەکراوە، بە دوو ئۆتۆمبێلەوە دەگاتە لایان و 18 کەس دەبات و 15 کەس دەمێننەوە، پێیان دەڵێت بەر لە خۆرهەڵات دەگەڕێتەوە، ئیڤاناش یەکێک دەبێت لەوانەی کە ماوەتەوە تا بەیانی نەهاتەوە، پێنج ڕۆژ تێپەڕی بەبێ نان و ئاو، دەترساین داعشەکان پێمان بزانن چونکە منداڵەکان دەگریان. ئیڤانا دەیگێڕێتەوە. بەناچاری بڕیاردەدەن داوای هاوکاری لە خەڵکی تەلەعفەر بکەن، بەڵام ئەو کەسانەی ئەمان داوای هاوکارییان لێدەکەن، دووبارە ڕادەستی داعشیان دەکەنەوە.
چەکدارانی داعش دەیانبەنە زیندانێک و لەوێ پیاوەکان دەکوژن، ئەبوو عەلی ئیڤانا بە کەسێک دەفرۆشێت بەناوی خەلو تەبابە دەستدرێژی کردە سەرم و لێیدام ئیڤانا دەڵێت دوای دوو ڕۆژ لای ئەو هەڵاتم.
ئەمجارەیان ئیڤانا داوای هاوکاری لە سەوزەفرۆشێک دەکات تا ڕزگاری بکات، ئەویش ڕازی دەبێت و دەیباتەوە بۆ ماڵەکەی خۆی، بەڵام لەوێ دووبارە ڕادەستی داعشی دەکاتەوە.
ئیڤانا دەکەوێتەوە دەستی خەلو تەبابە و دەیباتەوە ماڵ و ئەشکەنجەی دەدات، دواتر وەک دیاری پێشکەشی بە کەسێک دەکات بەناوی حاجی حەسەن ئەویش دەستدرێژی کردە سەرم، دواتر فرۆشتمی بە باقر کە خۆی بازرگانی بە کچانی ئێزدییەوە دەکرد.
ئیڤانا بەو حاڵە سێ مانگ دەمێنێتەوە و کڕین و فرۆشتنی پێوەدەکرێت، بەڵام جارێکی دیکە لەگەڵ هاوڕێیەکی بڕیاری هەڵاتن دەدەن، ئەمجارەیان پلانەکەیان سەردەگرێت و لە 15ی تەمووزی 2015 لەدەستی داعش ڕزگاریان دەبێت.[1]