بەناوی خوای بەخشندەی میهرەبان
راگەیەنراوێک بۆ ڕای گشتی
ئەمڕۆ گەلەکەمان لە باشوری کوردستان لەبەردەم مەترسییەکی جدیدایە، کە دور نیە ببێتە مایەی لەدەستدانی دەستکەوتەکانمان و بەفیڕۆدانی خوێن و فرمێسکی هەزاران تێکۆشەر و قوربانیانی خەڵکی کوردستان، هەموو ئەو مەترسیانەش لە ئەنجامی بڕیاری سیاسی نادروست و بەهەندنەگرتنی مەترسییەکان و گەڕانە بەدوای بەرژەوەندی کەسی و حیزبی دا، یەکێک لەو بڕیارە هەڵەو مەترسیدارانەش ڕەتکردنەوەی داواو دەستپێشخەری کۆمەڵگای نێودەوڵەتی و هەوڵە ناوخۆییەکان و ئەنجامدانی ڕیفراندۆم بو لەم هەلومەرجەدا بەبێ‌ زەمینەسازی.
بڕیاردان لەلایەن سەرکردایەتی چەند حیزبێکی کوردستان، کە هەر ڕۆژەی لەژێر ناوێکی داتاشراوەوە دەردەکەون، بەبێ‌ گوێدانە یەکڕیزیی نیشتمانی و بەرژەوەندیی باڵای نەتەوەیی، هەنگاوێکی مەترسیدارە لەسەر دواڕۆژی گەلەکەمان، ئەم هەنگاوەیان بوەتە مایەی پەراوێز خستنی ڕۆڵی دامەزراوە شەرعیەکانی کوردستان. کاراکردنەوەی پەرلەمان لەدوای دو ساڵ پەکخستنی بەو شێوازەی ئێستا و هەوڵەکانیان بۆ دواخستنی هەڵبژاردنی گشتی و بەکارهێنانی پەرلەمان بۆ شەرعیەتدان بە بڕیارە کەسی و حیزبیەکانیان و پێشێلکردنی بنەماکانی دیموکراسی و مافی هاوڵاتیان، گورزێکی کوشندەی دیکەیە لە خەون و ئامانجەکانی گەلەکەمان. بۆیە ئێمە هەموو ئەو هەوڵ و هەنگاوانە بە تەواوی ڕەتدەکەینەوە.
ئێمە لە #کۆمەڵی ئیسلامیی کوردستان# و #بزوتنەوەی گۆڕان#، کە سێ یەکی پەرلەمانی کوردستانی عێراق پێکدەهێنین و، نوێنەرایەتی ڕێژەیەکی بەرچاوی خەڵکی کوردستان دەکەین، ڕایدەگەیەنین کە سەرکردایەتی ئەو حیزبانە بەرپرسیارن لە هەر مەترسی و هەڕەشەیەک کە لە ئەنجامی بڕیاری هەڵەی ئەوانەوە ڕوبەڕوی خەڵکی کوردستان دەبێتەوە. لەسەر حکومەتی فیدراڵی عێراقیش پێویستە هیچ هەنگاوێک نەنێت کە ببێتە مایەی تێکدانی ئارامی و خوێنڕژانی هاوڵاتیان، بەڵکو گفتوگۆو دانوستان تاکە ڕێگای چارەسەری کێشەکانی نێوان هەرێم و حکومەتی فیدراڵیە.
بزوتنەوەی گۆڕان و کۆمەڵی ئیسلامیی کوردستان
12-10-2017