گورانی شاعېر یەک زوانش گەرەکەن پەی کوردی

یەک زوانی یام زوانێ ستاندارد ئاوات و بەشێ جە نویسەرو شاعېرە دڵسۆزەکان و نەتەبەو کوردی بیەن. گۆران پېسە یۊ چا کەسا دیارەن کە وایەش ئانە بیەن.
گلېربیەیۆ ماموسایا جە ساڵەو (1960 ز)ی جە شارو شەقڵاوەینە پەی چارەکەردەو کېشەو زوانی کوردی و فرە دیالێکتیکی.
گورانی شاعېر جە کونگرەکەنە بە پارچە شېعرێ باس جە جەواناو کوردی و ئازاییشا مەکەرۊن، گوران ماچۊن لاوۍ کوردی زادەو سلاح الدینی ئەیوبینۍ و کناچەکېچشا نەوۍ خانزادېنۍ.
دماتەر گۆران ئاوات و وېش بەرمەوزۊن ئەپېسە: ئەشۊم بەستەمان، چ نویستەی چ دەمیمان بە یەک زوان بنویسمېنەو هەم گۊکەرمۍ، ئەشۊم خانی سەردەمی کە بادینیەن بە زوانێ بنویسۊن (مەم ) کە نالی و مەحوی سۆرانی زوانۍ پەنەش گۊکەران و خانای قوبادی لۊڕ زوان و مەولەوی هەورامی واچ پەنەش بنویسان.
ئەوسا بەستەی بێخەمیمان
چ هی پێنووس، چ دەمیمان
بە تاقە یەک زاری شیرین
شاخ پڕ ئەکا لە پێکەنین
ئەوسا: (خانی )، خانی سەردەم
بە زمانێک ئەنووسێ (مەم )
کە پێی ئەدوون (نالی ) و (مەحوی )
وەک (قوبادی )، وەک (مەولەوی )
هەرچن ئاواتەکەو گۆرانی نامادی، بەڵکم دەمارگیری ناوچەیی و ناسیونالیستی زوانی ناوچەیی سەرەمڕە کارشان پەی تاونایۆ زوانەکا تەری و ۋستەیشان خزمەت و زوانێ ناوچەیی داراو دەسەڵاتی بیەن. ئی کارەیچشا نەک هەر بۍ یاوگا(ئەنجام ) بیەن، بەڵکم زوانەکەش بەشکەرد پەی چوار زوانا کە هەریۊشا ئیساتۍ پېسە زوانێ سەربەوۍ کار مەکەرۊن و پەنەش مەنویسیۊن.
ئارۊ زوانی سۆرانی(نالی و مەحوی ) باڵادەسێ ناوچەیین و پەنەش مەنویسیۊن، زوانی کرمانجی (خانی ) داراو دەسەڵاتێ ناوچەیین و پەنەش مەنویسیۊن، زوانی هۆرامی (مەولەوی) جە ئیدیم و ئەودیم پەنەش مەنوسیۊن، زوانی لۊڕی(خانای قوبادی) خەریکەن گنۊ سەروو پەیاو پەنەش مەنویسیۊن.[1][2]