نوژدارەکا ئێزدی کو تایبەتمەندا نەخۆشیێن ژنانە خەلاتەکێ نیڤدەولەتی وەرگرت، ژبەر خزمەتکرنا ڕزگاربوویێن ئێزدی و بو ڕوژناما ئەڤرۆ گۆت: ژ ساڵا 2014ێ دەمێ خەلکێ شنگالێ تووشی جینوسایدێ بووین من قەستا ناڤ ئاواران کر و من خزمەتێن تەندروستی پێشکیشی وان کچ و ژنێن ژ دەستێن تیرۆرستێن داعش ڕزگاربوی کرینە و هەتا نها 1200 ئافرەت هاتینە دەف من و چارەسەریا وان من کریە.
د. نەغەم حەسەن، تایبەتمەندا نەخۆشیێن ژنان دیار کر کو خەلاتێ (نانسن) یێ مافێ مرۆڤی سالانە پێشکێشی وان کەسان دکەن یێن خزمەتێن مرۆڤایەتی پێشکیشی خەلکی دکەن و گۆت: (ئەڤ سالە ئەز هاتمە هەلبژارتن و من خەلاتی (نانسن) یێ نیڤدولەتی و مافێ مرۆڤی ل وەلاتێ سویسرا وەرگرت).
د. نەغەمێ گۆتژی: (گەلەک کچێن ئێزدی یێن من چارەسەر کرین نوکە ل سەر مافێ مرۆڤی و ئاشتیێ ل سەرانسەری جیهانێ کار دکەن.
دکتورەیێ زێدەتر گۆت: (زوربەیا کچ و ژنێن ئێزدی تووشی دەردەسەریێن مەزن بووینە و تیرۆرستێن داعش گەلەک زولم ل کچ و ژنێن مە کریە د ماوێ ڤان سالان دا من هەست ب ئێش و ئازارێن وان کر و ئەس بو وان ئێشام).
تایبەتمەندا نەخوشیێن ژنان ئه و چەندە ژی گۆت: (ئەم دەنگێ ڕزگاربوویێن ئێزدی دگەهینینە دەولەتان و هیڤیا مە ئەوە مافێ ڕزگاربویان نەهێتە بەرزە کرن و پشتەڤانیا ڕزگاربوویان بهێتە کرن، چونکی ب ڕاستی گەلەک پێدڤی ب خزمەتێ نە دناڤ کەمپان دا و ڕەوشا وان یا باش نینە گەلەک ڕزگاربوویی هەنە هەتا نوکە هێشتا خێزانێن خوە نە دیتینە، ژبەر جینوسایدا شنگالێ هەموو ئەندامێن خێزانا خوە ژ دەست داینە تیرۆرستێن داعش گەلەک خەلکێ بێ گونەه یێ شنگال کوشتینە و بێ سەروشوون کرینە و هیشتا چارەنڤیسێ گەلەک کەسان دیار نینە ئەڤە هەموو کارتیکرنێ ل دەروونێ ڕزگاربویان دکەت).
د بەردەوامیا ئاخفتنێن خوەدا د. نەغەمێ گۆت: د گەلەک بەرنامێن ژێکجۆدا دا من کار کریە ژ بو خزمەتا ڕزگاربوویان ژ وان ژی سەنتەرێ چارەسەری و پشتەڤانیا ڕزگاربوویان ل دهۆکێ من ل ڤی جهی هزار و 200 حالەتێن ڕزگاربوویان دیتنیە هەروەسا د بەرنامێ ئەلمانی دا من کار کریە ژ بۆ چوونا ڕزگاربوویان بۆ دەرڤەی وەلاتی، هەتا هزار ڕزگاربوویان دگەل خێزانێن خوە ژی مفادار بوینە و بەردەوام بۆ دیتنا ڕەوشا ڕزگاربوویان من کار کریە و گەهاندیە دەولەتان داکو پشتەڤانی ل ڕزگاربوویان بهێتە کرن و زارۆکێن 12 سالی یێن تووشی نەخوشیا پەنجەشێرێ بوین ئەم ڕەوانەی ئیتالیا دکەین ژ بۆ وەرگرتنا چارەسەریێ.[1]