#میرزای لوڕستانی#
دۇ سێ دەقیقە مدرا نەدیار
مەنزۇرش مەکەرد به و پەری ڕوخسار
ئاخر سەرەنجام خاتۇنی نازدار
واتش وە ئەمیر غەمزەدەی غەمبار
ئەر عەزمت وزۇن باوەر وە ئەنجام
ئەر ئاب مەنۊشی بنۊشە وە جام
دېرەن وەقتی دېر ڕاھی بەر نە ڕات
تاکو من بشۊرۇن ئی قاب و حاجات
ئاما بە جواب ئەمیری دوڵجۇ
تەشنەم نېیەنان سەندەنم وزۇ
ئەمما عەرزەیێ دارۇن ئەر دانی
پەنەت بواچۇن نە ڕای نېھانی
خاتۇن وات وە مەم مەر ھۊشت نېیەن
عەجەب ھەی عەجەب من کەی تۊم دېیەن
ئاما بە جواب ئەمیری دوڵڕېش
ڕاستشان واتەن عاقڵانی پېش
ڕازشان مەقبۇڵ ئەو نیکۇکاران
زەن و ئەسپ و شېر وەفا نەداران
باز ئاما وە ڕاز خاتۇن وە زەرۇر
من کەی تۊم دېیەن ماچی بەی دەستۇر
ئاما وە سوخەن میری خۆش کەلام
واتش وە خاتۇن ئەی ماهۍ تەمام
ئەو ڕۊم شناسای ئەی نازک بەدەن
نە جزیر ئامای وە شەھری یەمەن
بە حوکم ئیزەد لامەکانی فەرد
نە ئاغۇش منت قەراردادە کەرد
بە خوابی ڕاحەت سەر وە ھەم بەردیم
سەری ئېتاعەت وە ھەم سپوردیم
ھەر دۇ نشانان بە یەک سپوردیم
ھەردۇ جە ناگاە جە ھەم وېیەردیم
منت وست نە دام ھەم نە کۇرەی نار
ئېستە مەواچی نەدارۇن ئەخبار
خاتۇن چۇن ئەژنی ئی قەوڵ وگوفتار
ڕېزا بە چەم دا ئەسرینان ھەزار
وات بە فەدات بۊ گېیانی شیرینم
دات بە ئاو دا ڕەنجی وەرینم
نەزانام تۊنی نۇری دیدە و گېیان
من جە گوفتەی وېم ھا بیم پەشیمان
ئومید ھەن جە لای زیشەوکەت و شان
مەعزۇر بداریم جەی حەرفی نادان
ئاما بە جواب ئەمیری نازدار
حەرفی مەعزۇریت با بۊ بەرکەنار
نە جایێ خەڵوەت بنیشین وە ھەم
ئاشکارا کەرین گردین دەرد و غەم
ئاما وە گوفتار شای پەری ئەندام
عەرزکەرد وە خدمەت ئەمیری ئەنام
بەغەیر جە ئۊتاق وېم جاگەیێ کۊ
ھەر وەقتێ بەخێر تەشریفت مەیۊ
قەدەم ڕەنجان کەر گېیانم بۊ فەدات
وېنەی کەنیزان سەرم ھا نە ڕات
زەڕینەی بازن کېشا نە ڕۇی دەست
داش وە دەستی مەم نە بەغەل پەیوەست
ھەر دۇ جە مەنزۇر سېر بی دیدەشان
گېرتشان جە ھەم نشان پەی نشان
جودا بین جە ھەم زوھرە و موشتەری
بە ئەمرو فەرمان حەیێ داوەری
[1]