پۊشای پۊشاکو خەڵکیما لاوە عەیبەن، کەچی مەژگما بە ویرو باوەڕو خەڵکی ڕازنمێ.
مەڵڵا نەسرەدین پاڵێکېش کۊنۍ بیېبېنۍ، دڕیێبېنۍ، پەی پینەکەردەیشان مەلۊ پەی لاو پینەچی، وەختێ مەیاوۊ دووکانو کابرای پینەچی، ئاڎ خەریکەن دووکانەکەیش ۋزۊرە، بە مەڵڵای ماچۊ: سەوای بۊرێ پەی پاڵەیەکات، ئیسە دېرەن، دووکان وزوورە. مەڵڵا نەسرەدینیچ ماچۊ: چەنی چېوی چامنە بۊن، من هەر ئی ئېتە پاڵێمە هەنۍ، گەر جیاشا بازوو، مەشۊم بە پاخروایی گېڵوە، کابرای پینەچی ماچۊ: قەی مەکەرۊ، من ئېتێ پاڵێ کۊنېت مڎەو پەنە، تا ئانۍ وېت تەمامیا، مەڵڵا نەسرەدین هاوارش چەنەبەرزبۊوەو ماچۊ: چەنی بۊ من ئیتێ پاڵێ کەروونە کە وەڵتەر پاو کەسێ تەرینە بیېبا.
پینەچیەکەیچ بە نەرمی ماچۊ: هۊرگېرتەی ویروباوەڕو خەڵکی ناڕەحەتت نمەکەرۊ، بەڵام پاکەردەنەی ئېتێ پاڵێ کەسێ تەری ناڕەحەتت کەران!
ئېمە ئاماڎېنمۍ بە بۍ ڕاگیری و بە ئاسانی ویروڕاو کەسەکاتەری هۊرگېرمۍ، گنمۍ شۊنەو خەڵکا تەری، بەڵام وېما جە تەممەڵیېنە نمەتاومۍ بیمۍ بە خاوەنو ویرو باوەڕو وېما.[1]