کورد دلۍ چەرخەکا تارېخینە
هۊرئەوەگېڵنای و ئاماڎەکەرڎەی: ئەسعەد ڕەشید
بەشۍ: سەڎ و هەشتەمە
ساڵەو (1728ز.): خالید پاشا، پەی جاری دوەمی بیۆ بە میرو بابانی. هەر ئەچی ساڵېنە سوبحان وېردی خان بېیەن بە والی سنەی.
ساڵەو (1730ز.): سەڎەی وەڵینەنە تاکو ئېساڵ پایتەختو میرنشینو سۊرانی قەڵاو (دوێن)ی بیېنە، دماتەر میر شکالی بەگ جە تەرسەو هېرشو بابانەکا پایتەختش فارانۆ پەی هەریری.
ساڵەو (1731ز.): عوسمانییەکۍ ئەچی ساڵېنە ناوچەکانو تەورێز، کرماشان، ئەردەڵان و لوڕستانیشان دانۆ دەسو ئێرانییەکا. هەر ئەچی ساڵېنە شاباز میرو دونبولی دلۍ جەنگێنە چەنی عوسمانییەکا کوشېیان. دیسان ئەچی ساڵېنە جەنگو میانو ئێرانییەکا و عوسمانییەکا خېزیانۆ.
ساڵەو (1732ز.): پێماڼامێ دۊسانە مېیانو عوسمانییەکا و فارسەکانە ئەچی ساڵېنە بەسیان. خانە پاشا میرو بابانی هەرئەچی ساڵېنە کوشېیان. داستانو لەیلۍ و مەجنونی ئەچی ساڵېنە نویسیان بە دەسو مەلا موحەمەڎی قوڵیی کەندوڵەیی.
ساڵەو (1733ز.): تاکو ساڵەو 1737ز. سوبحان وێردی خان پەی یەرەم جاری کریانۆ بە والی سنەی. هەر ئەچی ساڵېنە (نادر قولی) هېرشش کەردەن سەرو (قەفقاز و تەفلیس)ی، دلۍ ئا جەنگەینە شش هەزار کوردۍ کوشیێنۍ. تاریخو (26-10-1733ز.) جەنگێ میانو ئێران و عوسمانینە قۊمیان، دلۍ ناوچەو لەیلانی نزیک بە کەرکوکی، کە دلېشەنە تورکەکۍ مەڕیێنۍ.
ساڵەو (1736ز.): تاکو ساڵەو 1747ز.، کوردەکۍ وەرکۆتو کوردەسانی بە فەرمانو (نادرشا)و ئەفشاری فاڕێنېشاوە پەی ناوچە جیاجیاکانو ئێرانی.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید.[1]