چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎهەمە
حوزنی، جە ڕەفتارا شېخ مەحمووڎی فرە ناڕەحەت بې، کە ئینگلیسی کەرد بە فەرمانڕەواو کورڎەسانی؛ کەچی بە هەواو دینی و چۊڵەخرتې تورکانی، چەنی ئینگلیسی گژیا؛ ئڼا هەر پېسە یاردی فەیسەڵیشان دا و دۆڵەتو ئېراقیشان پەی مەرزنارە، ئاڎیچی ( گەر یاگې متمانې بیێ) مەکەرېنېش بە دۆڵەت و قازانجیچشان بې، مەواچې: کاتێ خەبەرو تېکشیەی کوردەسانو موکریم ئەژنی، فرە بە تاڵی گلەیېم جە سەفیرو ئینگلیسی کەردې، واتش: حوزنی! ڕەفیقانی ئېرانی ڕاسشان کەرد و ڕەفېقانو کورڎی درۊزن بەرشیې.
مەحمووڎ ئەحمەڎی وات: خەریکېنې بگېرام و حقووقم ببڕان، بۊ چەنیم؛ حوزنی ماچان تۊش وەشمەسیۊ. مەحمووڎ پېسە هەر کوردێ تەری، ئېتێ سمېڵې ستالینیې و چاکەتێ سووری نیشانې کومۆنیستیش پۆوەبې. حوزنی خېرئامای گەرمش کەرد و کە باسەکەم پەنەوات ماچۊ: خاسا هەرچی جە دەسم بێ قسووری نمەکەرو؛ بەڵام کام مەحمووڎ، تۊ مەزانی عەرەب ئەقڵشان ئینا چەمېشانە و مەژگشانە نییەن. گەر گونجیۊ کوچێ سمېڵەکات کوڵې بکەرۆ تاکو بەروت پەی لاو کاربەدەسانی.
مەحمووڎ وېش تووڕەکەرد چەنەش: جەناب تۊ جاهېلەنی! نمەزانی کومونیست چېشەن! من فەخر مەکەرون کە بە کومۆنیستم بزانان!
حوزنی فرە بە نەرمی واتش: ڕاسەن جاهیلەنان، تۊ مەتاوی بە زوانێ ساڎە پەنەم بواچی کومونیستی چېشش فرە خاسەن؟
ماچۊ: تۊ نمەزانی جە ڕووسیە گرڎکەس نان و کارش مەڎان؟
واتم: کاکە مەحمووڎ گیان! خۊ زیڼانو بەغڎایچ نان و کاری تەمامشان هەن!
هەرمانەو مەحمووڎیش هاسان ڕاییڎەکەرڎە و فرە مەمنوونو وېش کەردش.
جارێشا باسو بەڎفەڕی بڕێ نەجیمزاڎا بې؛ حوزنی وات: من جە ئیدارە گۊڤار بېنا قەت نەلابېنا پەی سەفارەتو بەریتانیای. تەلەفون کریا کە سەفیر گەرەکشەن بوینۊت. بەردانېش پەنێوە و بە چرپە واتش: کوردێ فرە دڵسۊزو ڕووسیەیمان ئینا لاوە؛ تۊ بدۊنەش و دڵوەشیش بڎۆ.
دلې هۊڎێ تایبەتینە کوردەکەم دیڎ، خوڎایا من پېسە ئا کابرایە بشناسو پاسەن.
ماچۊ: کاکە! نامېت بەخێر؟
واتم: مامۊسا حوزنی! نمەشناسیم؟ من عەمەراغانا، نۊکەرو حاجی سەیڎ عۆڵڵای؛ چن چاییېم پەی نیانیرە؟
تۊ و ئېگە کوجا مەرحەبا؟
واتم: بەڎبەختی، سەیڎ پۆشۆی سەیڎ تەهای هورخەڵەتنانې: بۊرێ مەکەروت بە کوردو ڕووسیەی و مەبەروت پەی لاو سەفیرو بەریتانیای و زەڕێ عالت دەس مەگنۊن. ئانا چېگە پېسەنا زیڼانی و ماچی تەرسایېنە زراوم تەقا، دەسم دامانت ڕزگارم بکەرە!
سەفیر ئې و لوې؛ چەمەڕاو هەواڵی وەشی بې. جە نووکۆ پەیم گېڵناوە، پېسە ویس کەسې ختلېش بڎان مەخوې: ئا پۆشۆ زیاتەر جە ویس جارانی دەسش بڕیەنان؛ بەڵام دیسان فایڎەش چەنە مەوینو.
مەبلەغێ زەڕم پەی عەمەراغای وەرگېرت و کیاستمۆ پەی مەرزو ئېرانی.
هەر حوزنی مەگېڵناوە کە: هۆلېر بېنا، مەلېنا پەی دیڎەنی حاکمو ئینگلیسی، مەڵڵێوە کەڵەگەتم دیڎ دلېبەرەو حاکمینە بە کزی مدرابې، لاڵیاوە: سەیڎ، توخوڎا کارێ بکەرە کە حاکمی بوینو؛ چن ڕوێن ڕام پەنە نمەڎۊ بوینووش.
حاکم جوابەنە ماچۊ: ئانە مەڵڵا خەلیلو گۆڕۆمەرەین؛ ئانەی پەنەمان ئەسپارابې، بە خاسی نەیاوناش؛ ئیسە ئامان داواو زەڕی مەکەرۊن! پەنەش بواچە گەر وېش نەشارۊوە پۊلیسې ئېراقی مەگېراش.
ئۆسا یاوانېنە کە ئا پیا موبارەکە ئا گرڎ مەنگوڕیېشە دێ کوشتەی و یانەوېرانېش کەردې، کې کیاستەن و ڕەسووڵ ناجی کە ئېمە جە سابڵاخ گېرتما و بەرکۆت جاسووسێ گۆرەو بەریتانیایەن و داما دەسو ڕووسەکاوە، جە غەزاو مەلا خەلیلینە ڕاواچکاری هەرە نزیکش بییەن. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]