قرتانێوە جە کتېبوو گوژمانەی؛ هووشییاری شاعێرانە
شێعرە خولقیاو زەینه و تاکەکەسیەنە و پېسە جە ئۊسایینەنه وچیێ؛ ‌ ئا کەسیچە ساحېبوو بەهرێوە لەمئاوەردین کە ئادش بەساحېبوو تەوانوو خولقنای شێعرێ کەرڎەن. ئا بەهرە لەمئاوردە (توان بالقوە) جە وېشەنە یاگې سەرنجېن و بنەمای بنەڕەتینوو خولقنای ئا نێعمەته ئەدەبییەنە کە بۊ باعیسوو لەزەت بەردەی و سوکنایی پنە دای.
ڕەنگە جە سەردەمانێوەنە و لاو بڕێ سەرنجەکاوە ئی بەهرە لەمئاوردە بییەبۆ بە شەرتەی کامڵه و شێعرێ و شاعێر بە دڵنیابییەی چانەی کە شێعرە ئێلهامێوە هۊشیەنە قەناعەتش کەرڎەبۆ و ئەوپەڕوو بەرهەمەکەیش بییەبۆ بە لاونایۆ، یان تام و لامەدایۆ ڕېکوزیای ئاهەنگاویی کە گۊشلاون بییەبۆ و هەستوو وەردەنگیش جمنابۆ.
بەڵام جە ڕوانگېوۆتەرۆ ئا بەهرە لەمئاورد‌ە پێسه و زەمینێوەن کە جەوېشەنە قابلوو بەرهەم ئاردەی زەرعاتین، کەچی تاکو هەرمانەش سەرنەکریۆ و ڕەنجش چنە نەدریۆ بەهیچ مەبۊ. بەڵام ڕەنجی ژیرانە و بەئەزموون، کەرۊش بە باخ و بۊلاخێوە وەش و پەڕبەهرە. (ئینەیچ بابەتێ فرە ئاسایین و ساڵانی ساڵا ساحیب نەزەرێ دووبارەش کەراوە!).
بەڵام جە ڕوانگێورەتەرۆ، پەروەردە و وێ پنەیاونای بابەتێوە بەبایەخا کە مەبۊ وەرچەم نەگیریۆ. هەر ئی بابەتەنە کە زەینێ شاعێرانە حازرو ئامادە و بەجووڵە کەرۊ. بابەتێ کە چېگەنە دووبارە کریۊوە، بابەتێوەن کە پێسه و هووشییاریی شێعریی نامېش بریۊ و پەی ئاستۊ زانیاریی و بەرینایی دەرەتانوو چېوزانای شاعێری گېڵۆوە. زانیاریێ کە جە دەقی شێعریەنە و بەئەدەبی کریۆ و ڕەنگە بدۆوە.
ڕەئوف مەحموود پوور.[1]