ئازاد کەریم مام عەلی
ناسراو بە ئازادە ڕەش
لە 22-11-1965 لە گوندی شێخ هۆمەر سەربە شارەدێی تانجەرۆ لە دایک بووە
مانگی 10ی ساڵی 1981 پەیوەندی کردووە بە هێزی پێشمەرگەوە لە ناوچەی شارەزوور سەر بەهەرێمی 5ی قەرەداغ لای شەهید حەمە سەعید سێتەڵانی
سەرەتای ساڵی 1982 گەشتۆتە ناوزەنگ و ناوەندی کۆمەڵە
لەسەر داوای مام جەلال تاڵەبانی وەک بچوکترین پێشمەرگەی شۆڕش لە ڕێگەی دەنگی شۆڕشی ئێراق (کە دواتر ناونرا دەنگی گەلی کوردستان) بە خەڵکیان ناساند.
کۆتایی ساڵی 1982 گەڕاوەتەوە ناوچەی قەرەداغ و بەردەوام بووە لە خەبات.
لە 21-09-1984 لەگەڵ شەهید گژەی حەسەن بەلاش کەوتونەتە بەر هێرشی کۆپتەرەکانی تانجەرۆ، گژە شەهید دەبێت و ئازادە ڕەشیش بەسەختی بریندار دەبێت.
تا کۆتایی ساڵی 1985 بەردەوام بووە و پاشان پەیوەندی کردووە بە (ئاڵای شۆڕش) ەوە.
لە ڕۆژی 21-07-1986 لەلایەن استخباراتی بەعسەوە لە کاتی ئەنجام دانی چالاکییەکدا لە سلێمانی لە جادەی پیرەمێرد دەکەوێتە بۆسەوە و بەچەکەوە دەستگیر دەکرێت.
دوای ماوەیەکی زۆر لە زیندانەکانی بەعس و حوکمی هەتاهەتایی لە مەحکەمەی سەورە بە لێبووردنی گشتی لە ڕۆژی 16-09-1988 ئازاد کراوە.
دواتر بەردەوام بووە لە چالاکی سیاسی تا بەرەبەیانی 07-03-1991 بەپێی نەخشەیەکی ورد و درێژراو لەبەر دەرگای ماڵی خۆیانەوە لە فولکەی دەستارەکە لە شاری سلێمانی یەکەم تەقەو بانگەوازی ڕاپەڕینی دەست پێ کردووە و بەرەو خوار فولکەی خەبات و کانی دۆمان و عەرزەکانی حەمە مستەفا بە تەقەو بانگەوازی ڕاپەڕین دەکەوێتە ڕێ و دوای نیو کاتژمێر تەقەو بانگەواز گەڕاوەتەوە فولکەی دەستاڕەکە.
بەپێی ئەو نەخشەی دایان نابوو بە هاوکاری شێخ وەهاب و شێخ عومەرو شێخ کەریم تیماری و شەهید خالیدی مەلا عەلی و دکتۆر نەبەز خالید و یاسین سالەی کەریمان و نەسرەدین و هەموو ئەو ژن و پیاوە جەربەزەو چاونەترسانەی ڕێکیان خستبوون و بەپشتیوانی خەڵکی سەرشەقام و خەبات ڕاپەڕینیان دەستپێکردووە و سەرکەوتوبوون.
دواتر وەک کادرێکی سەربازی و ئیداری لەناو مەکتەب عەسکەری و پاشان فەرماندەیی گشتی و لێپرسراوی ئیدارەی مەڵبەندی پێشمەرگە درێژەی بە کاری خۆی داوە.
ماوەیەکی زۆریش لێپرسراوی لیژنەی زەوی بووە بێ کەموکووڕی کارەکانی خۆی ئەنجام داوە.
ماوەیەکی زۆریش ئەندامی لیژنەی خانەنشینی پێشمەرگە بووە و بە ئەمانەتەوە ئەرکەکانی جێ بە جێ کردووە ئێستا خانەنشینی پێشمەرگەیە.
لەگەڵ خەبات و تێکۆشان وەک هونەرمەندێک بەردەوام بووە لە کاری هونەری لە بواری مۆسیقاو گۆرانی و هەروەها نووسینی هۆنراوە و کورتە پەخشان و چیرۆک
کەحەز و ئارەزووی گەورەی خۆی بووە کە لەو بوارەدا کاربکات.
ئێستا وەک هونەرمەندێک بەردەوامە لە خەبات و کارەکانی. [1]