ھونەرمەندا دەنگ خوەش (گولبھار) ل ساڵا 1929 ژدایکبوویە، ل ساڵا 1949 پشکداری د ھەژمارەکا شانۆیان دا کریە، ل ساڵا 1963 ئێکەم ستران ب دەنگێ خوە ل رادیۆیا بەغدا بناڤێ( کورێ گوندی بەژن دارێ حەیزەران) تۆمارکریە، (285) ستران ھەنە، ئاھەنگ ل گەلەک وەلاتان گێراینە، ل ساڵا 2005 ب رێکا رێڤەبەریا رەوشەنبیری ڤیستەڤالا رێزگرتنێ بۆ ھاتیە سازکرن، ل ساڵا 2009 ل دووماھی ستران بناڤێ( چەلێ لبەر چەلا) ب ھاریکاریا تیپا دھۆک بەرھەم ئینایە، ل 23/2/2010 ل باژێرێ بەغدا وەغەرکریە و ل باژێرێ نەجەف ھاتیە ڤەشارتن.
وەک رێزگرتن ل ھەمبەر خزمەت و خەباتا ھونەرمەند(گولبھار) ێ مە ب گرنگی زانی وەک بەرپەرێ ھونەریێ رۆژناما ئەڤرۆ، چەند لاپەرێن ژیانا وێ لادەین و دبیرھاتنا چەندین نھێنێن وێ بۆ خواندەڤانان دیار بکەین.

حافز مايى: من ل سەر خواستا وێ کو ئەڤیندارا کەسەکی بوو، ھەلبەستا (دلێ بێ برین ھاژ چ نەبوو) بۆ چێکر
حافز مایی، خودانێ ھەلبەستا (کەوا سپێدێ بخوینە) کەسانێن دەسپێکی و خودانێ پشکا شێری یا ھەلبەستێن (گولبھارێ)، پتر ژ (40) ھەلبەستان داینێ و گۆت: ل سالا 1961 قوتابی بووم و دیسا بێژەر بووم ل رادیۆیا بەغدا وی دەمی مە ئێک دو نیاسی وی دەمی گولبھار کورس بوو، (محەمەد ئەمین ئوسمان) ھەلبەستەک دایێ وێ ئەحمەد خەلیلی ئاواز کر و ئێکەم ستران گۆت، حافزی گۆت: وی دەمی من ھەلبەست ھەبوون بتنێ من درۆژنامە و گۆڤاران دا بەلاڤەدکرن، دووڤ دا من ھەلبەستەک دایێ پەسنا وەرزێ بھارێ دکر(ئەی بھارێ پر خوناڤی) ئەحمەد خەلیلی ئاواز بۆ دانا و ئەڤە ئێکەم ھەلبەستا من بوو کریە ستران.

حافز مایی، چیرۆکا سترانا (کەوا سپێدێ بخوینە) ئاشکراکر و گۆت: قوتابی بووم ل بەغدا و شەر بوو و گەلەک ژ گوندی خەریب ببووم، ل چایخانا بەرازیلی ل جادا رەشید رونشتی بووم و ھزرا من بوو گوندی دچوو ل زارۆکینێ و دەمێ چووینە قوتابخانێ و کەوان دخواند، ئەو ھەلبەست من چێکر، بەردەوام گولبھارێ دخواستن و ژ من وەردگرت و دووڤ دا دگۆتن و بەر نیاس بوو.
حافزی نھێنیەکا گولبھارێ ئاشکراکر و گۆت: ل سەر خواستا وێ کو ئەڤیندارا کەسەکی بوو، پشتی دلێ وان ژێک مایی، ھەلبەستەک ژ من خواست و چیرۆکا خوە ڤەگێرا بۆمن و من ھەلبەستا (دلێ بێ برین ھاژ چ نەبوو) بۆ چێکر و ھەر ئەوێ ئاوازکر، پتریا ھەلبەستێن گۆتین سرۆشتی بوون، لدووماھیێ حافزی خواست ژی ئەرشیفێ گولبھارێ بھێتە پاراستن و چونکە ئەوێ خزمەت کریە و پێدڤیە ئەو خزمەت ل بەر چاڤ بھێتە وەرگرتن.

گولبهار

تاکە سترانبێژا کورد بوو ستران ب سەدامی و قادسیێ نەگۆتین

ھەلبەستڤان مەحفۆز مایی، چەندین ھەلبەست داینە گولبھارێ، گۆت:ڤیستەڤالەکا ھەلبەستڤانێن، گەنج ھەبوو دناڤبەرا دھۆکێ و سلێمانێ و ھەولێرێ دا و ب ھەلبەستا(بلبلۆ) شیام ببم سەرکەفتیێ ئێکێ و خەلاتی وەربگرم، مامۆستا (مەعسومم مایی) بەرنامەک ل رادیۆیێ ھەبوو بناڤێ(ھوزانڤانێن گەنج) مێھڤانکرم بەرنامەی، من و گولبھارێ وی دەمی ئێک و دو نیاسی و ئەو ھەلبەستا من حەزژێکر و من بۆ نڤیسی وێ کرە ستران و گەلەک ھەلبەستێن من گۆتن و گەلەک کرنە دو قولی ل گەل سترانبێژێ خودێ ژێ رازی عەبدولا زێرینی( نازدار چاڤێن تە دەریانە) و گەلەکێن دی.
مەحفۆزی ئاشکراکر ژی کو ل سالا 1980 ھەلبەستەک چێکر بناڤێ(ئەی دلێ من پر برینە، تو چووی مە خودان نینە) ل سەر وەغەرکرنا رەحمەتی بارزانی بوو، مەحفۆزی ئاشکراکر ژی کو سترانبێژ گولبھار تاکە سترانبێژا کورد بوو ستران ب سەدامی و قادسیێ نەگۆتین وی دەمی رژێمێ ل سەر سترانبێژ و ھەلبەستڤانان سەپاند بوو کو ڤێت بەرھەمەک ل سەر دکتاتوری یان قادسیێ ھەبیت.
مەحفۆزی ئاشکراکر کو ھەتا 80 ژ سترانێن گولبھارێ ھەلبەستێن حافز مایی بوون و ب ئەوان ھەلبەستان ھاتە پێش، دیسا سترانێن دو قولی ل گەل گەلەک سترانبێژان گۆتینە، پتری سترانێن وی ل سەر سرۆشتی و دیمەنێن کوردستانێ بووینە.
مەحفۆزی گۆتژی: نھێنیا سەرکەفتنا گولبھارێ ب سێ ئەگەران بوویە، نازکیا ھەلبەستا حافز مایی و دیسان ئاوازێن ئەحمەد خەلیلی، دیسان دەنگێ گولبھارێ ژی، گولبھار فەیرۆزا کوردانە و دڤێت سپێدەھی یا ھەموو رادیۆ گرنگیێ بدەنێ و ماوەکی بۆ دەنگێ وێ دەست نیشان بکەن.

سەمير زاخۆيى: هندەک خەلکێ دهۆکێ بوونە ئەگەر وەسيەتا وێ نەهێتە بجهئينان
ھونەرمەند سەمیر زاخۆیی، دیارکر کو دیدەڤان ھەنە کو وەسیەتا گولبھارێ ئەو بوویە ل زاخۆ بھێتە ڤەشارتن و ھندەک خەلکێ کوردستانێ بوونە ئەگەر ل نەجەف بھێتە پاراستن، کەسەک بۆ ئەگەر ئەو بەرنامە ھەموو بھێتە گوھۆرین.
سەمیر زاخۆیی ھێشتا گۆت: پتر ژ (20) سترانان من داینێ و ژ سترانێن بەرنیاس بووی(ئەزم یارا لاوێ دەلال) دیسان سترانا دو قولی ل گەل من گۆتیە( شڤان و برێڤان، دیسا بێریێ تو کچاکێی) زاخۆیی گۆت: گولبھار دیاردەکا ئێکانە بوو و تایبەت ل سالێن شێستان دوارێ سترانێ دا و دیسان گەلەکا رەوشەنبیر بوو، ناڤبری ئاشکراکر کو ل گەل ھەڤالەکی بزاڤکرینە کو جەنازێ گولبھارێ ژ نەجەف ببینە کوردستانێ، ل گورستانا نەجەف رێکخستنەک ھەیە و دڤێت چەند سال سەر مرنێ دا دەربازببن ھەتا جەنازە بھێتە ڤەگۆھاستن تایبەت ئافرەت، پەرلەمانێ عیراقێ رێ نەدا بچین، نوکە دروستە بچینە جەنازێ وێ چونکە پێنچ سال دەربازبوون و ھەتا وەزرەتا رەوشەنبیری رازیبوونا خوە دیارکر بوو.
ھونەرمەند : حەسەن بیبۆ، گۆت: ھەر ھونەرمەندەکی رێکەک بۆ خوە دانایە کو ھونەرێ خوە ل سەر دەربازبکەت، رێکا گولبھارێ ب خوە ھەلبژارتی ئەو بوویە کو پرانیا سترانێن وێ ل سەر سرۆشتێ جوانێ کوردستانێ و گرێدایی ب ژیانا رۆژانەیا مروڤێ کورداڤە بووینە، ئەڤ چەندە دھێتە پەسەندکرن ژ ڤیانا وێ بۆ سرۆشتی، ناڤێ خوە کریە (گولبھار) و ناڤێ کچا خوە کریە (بێری).