بەناوی خوای گەورە و میهرەبان
بەبۆنەی سەری ساڵی ئاشووری بابلی و جەژنەکانی ئەکیتۆ، پیرۆزباییەکی گەرم ئاراستەی خوشک و برا ئاشووری و کلدانی و سریانییەکانی کوردستان و عیراق و جیهان دەکەم.
ئەمساڵ لەکاتێکدا بەشداریی له و جەژنەی ئێوەی خۆشەویست دەکەین کە گەلەکەمان بە هەموو پێکهاتە ئایینی و نەتەوەییەکانییەوە بەره و ڕووی شەڕێکی داسەپاوی تیرۆریستانی دڕندە و هەڵگرانی بیری نکۆڵیکاری و شۆڤێنیزم بووەتەوە و بەهۆیەوە ژمارەیەکی زۆر لە خوشک و برایانی کریستیانی پارێزگای موسڵ لەگەڵ پێکهاتەکانی دیکەی ئه و پارێزگایە ناچار بوونە ماڵ و موڵکی خۆیان بەجێبهێڵن و ڕوو لە هەرێمی کوردستان بکەن، هەرێمی کوردستانیش وەک هەمیشە نەوایەکی ئارام و ماڵی هەموو لێقەوماوانە و ئه و بەها بەرزانەی گەلەکەمان لە هەموو ناوەندە نێودەوڵەتییەکاندا بووەتە جێی ستایش و پێزانین.
لێرەوە جارێکی دیکە داوا لە ئێوەی خۆشەویست دەکەم بیر لە بەجێهێشتنی وڵات نەکەنەوە، دڵنیاتان دەکەمەوە کە پێشمەرگە قارەمانەکانی کوردستان وەک چۆن ئێستا تیرۆریستان تێک دەشکێنن و زۆربەی ناوچە داگیرکراوەکانیان لە دوژمنانی مرۆڤایەتی پاک کردووەتەوە و بەرگرییان لە هەموو پێکهاتەکانی ناوچە ئازادکراوەکان کردووە، لە داهاتوویشدا هەروا کوردستان سەروماڵی ئێوە و هەموو هاونیشتیمانیان دەپارێزێت، تیرۆریستانیش هیچ داهاتوویەکیان نییە و هەموو ئەوانەی ناچار بوونە ناوچەکانی خۆیان بەجێ بهێڵن، بە سەربەرزی دەگەڕێنەوە سەر ماڵ و موڵکی خۆیان.
هیوادارم ئێوەی ئازیز هەموو ساڵێک لەژێر سایەی ئارامی و ئاسوودەییدا جەژن و شادییەکانتان بە خۆشی بگێڕن.
مەسعود بارزانی
سەرۆکی هەرێمی کوردستان
31-03-2015